بۇگىن ەلىمىزدە جاڭا كونستيتۋتسيانى قابىلداۋ ماسەلەسىنە ارنالعان رەسپۋبليكالىق رەفەرەندۋم ءوتىپ جاتىر. بۇل ماڭىزدى ساياسي ناۋقانعا ۇلتتىق ۇلاننىڭ اسكەري قىزمەتشىلەرى دە بەلسەندى قاتىسۋدا, دەپ حابارلايدى Egemen.kz.
ۇلتتىق ۇلاننىڭ اسكەري بولىمدەرىندە رەفەرەندۋمدى جوعارى دەڭگەيدە وتكىزۋ ءۇشىن بارلىق جاعداي جاسالدى. جالپى سانى 36 سايلاۋ ۋچاسكەسى اشىلىپ, اسكەري قىزمەتشىلەردىڭ كونستيتۋتسيالىق قۇقىعىن جۇزەگە اسىرۋعا مۇمكىندىك بەرىلدى. داۋىس بەرۋ ءراسىمى زاڭ تالاپتارىنا ساي, اشىقتىق پەن ايقىندىق قاعيداتتارى نەگىزىندە ۇيىمداستىرىلدى.
ەرلان قارين: قازاقستاندىقتار ەل بولاشاعىن تاڭداۋ تۋرالى شەشىم قابىلداۋدا
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ العاشقى بولىپ, №266 سايلاۋ ۋچاسكەسىندە داۋىس بەردى.
بۇل كۇن اسىرەسە 5573 اسكەري ءبولىمىنىڭ قاتارداعى جاۋىنگەرى ارتۋر ياروۆوي ءۇشىن ايرىقشا ەستە قالدى. سەبەبى ول ومىرىندە العاش رەت داۋىس بەرىپ وتىر جانە بۇل ماڭىزدى ءسات ونىڭ تۋعان كۇنىمەن تۇسپا-تۇس كەلدى.
قازاقستاندا جاڭا كونستيتۋتسيا جوباسى بويىنشا داۋىس بەرۋ باستالدى
ارتۋردىڭ ايتۋىنشا, اسكەري قىزمەتتە ءجۇرىپ ەل تاعدىرىنا قاتىستى ساياسي ناۋقانعا قاتىسۋ – ۇلكەن جاۋاپكەرشىلىك. ونىڭ سوزىنشە, مۇنداي ءسات ءار ازاماتتىڭ ەل بولاشاعىنا بەيجاي قارامايتىنىن كورسەتەدى.
رەفەرەندۋمعا وفيتسەرلەر, كەلىسىمشارت بويىنشا اسكەري قىزمەتشىلەر, ولاردىڭ وتباسى مۇشەلەرى, ارداگەرلەر جانە مەرزىمدى قىزمەتتەگى ساربازدار قاتىسىپ جاتىر. كوپتەگەن جاس سارباز ءۇشىن بۇل العاشقى داۋىس بەرۋ تاجىريبەسى بولدى.
ۇلتتىق ۇلاننىڭ باس قولباسشىسى تۋعان كۇن يەسى مەن ءبىرىنشى رەت ساياسي ناۋقانعا قاتىسىپ وتىرعان اسكەري قىزمەتشىلەردى قۇتتىقتاپ, ازاماتتىق بەلسەندىلىك تانىتقاندارى ءۇشىن العىس ءبىلدىردى.
وسىلايشا ۇلتتىق ۇلان ساربازدارى رەفەرەندۋم كۇنى تەك اسكەري انتقا ادال قىزمەت ەتەتىنىن عانا ەمەس, ەل ومىرىندەگى ماڭىزدى ساتتەردە ازاماتتىق ۇستانىمىن دا ايقىن كورسەتتى.