پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن ەكونوميكالىق ءوسۋدى قامتاماسىز ەتۋ جونىندەگى جەدەل شتابتىڭ كەزەكتى وتىرىسى ءوتتى. جيىندا وڭدەۋ ونەركاسىبىنىڭ بىرقاتار سالالارىن دامىتۋ باعىتىنداعى الدىن الا ناتيجەلەر قارالدى.
جىلدىڭ العاشقى ەكى ايىندا ازىق-ت ۇلىك پەن سۋسىن وندىرىسىندە جوعارى ءوسىم بايقالىپ وتىر. ازىق-ت ۇلىك ءوندىرىسىنىڭ كولەمى 665 ملرد تەڭگەگە جەتتى. ناقتى كولەم يندەكسى جوسپارداعى 104,3%-دىڭ ورنىنا 111,9% بولدى. ءبىرىنشى توقساننىڭ قورىتىندىسىندا بۇل كورسەتكىش 112% بولادى دەگەن بولجام بار.
سۋسىن وندىرىسىندە دە ءوسىم بايقالادى. بۇل سالاداعى ءوندىرىس كولەمى 175,4 ملرد تەڭگەگە جەتتى. ناقتى كولەم يندەكسى 104,2% بولسا, جوسپار بويىنشا ول 110,2% دەڭگەيىندە بولۋعا ءتيىس ەدى. قاڭتار-ناۋرىز ايلارىنىڭ قورىتىندىسىنا بولجام – 110,3%. سالىستىرۋ ءۇشىن ايتساق, 2025 جىلدىڭ قورىتىندىسىندا ەلىمىزدە 1,2 ترلن تەڭگەگە سۋسىن وندىرىلگەن.
اۋىل شارۋاشىلىعى ۆيتسە-ءمينيسترى ازات سۇلتانوۆتىڭ ايتۋىنشا, تاماق ونەركاسىبى كەيىنگى جىلدارى تۇراقتى دامۋ قارقىنىن كورسەتىپ كەلەدى.
«تاماق ونەركاسىبى تۇراقتى دامىپ جاتىر. 2025 جىلدىڭ قورىتىندىسىندا تاماق ونىمدەرىن ءوندىرۋ كولەمى 3,9 ترلن تەڭگەگە جەتتى. بۇل 2024 جىلمەن سالىستىرعاندا 8,1%-عا جوعارى, ول كەزدە ءوندىرىس كولەمى 3,3 ترلن تەڭگە بولعان. ال بيىل بۇل كورسەتكىشتى 4,7 ترلن تەڭگەگە دەيىن جەتكىزۋ جوسپارلانىپ وتىر. ءوسىم ەگىس القاپتارىن ءارتاراپتاندىرۋ, جۇمىس ىستەپ تۇرعان كاسىپورىنداردىڭ جۇكتەمەسىن ارتتىرۋ, ىشكى نارىقتى قورعاۋ مەن جاڭا ينۆەستيتسيالىق جوبالاردى ىسكە اسىرۋ ەسەبىنەن بولعان. وسى فاكتورلاردىڭ قوسىمشا ۇلەسى شامامەن 600 ملرد تەڭگەگە باعالانىپ وتىر. بۇل بيىلعى جىلدىڭ سوڭىنا قاراي وڭدەلگەن اۋىل شارۋاشىلىعى ونىمدەرىنىڭ ۇلەسىن 70%-عا دەيىن جەتكىزۋگە مۇمكىندىك بەرەدى», دەدى ازات سۇلتانوۆ.
شيكىزات بازاسىنىڭ كەڭەيۋى مەن قايتا وڭدەۋ كولەمىنىڭ ارتۋى بىرقاتار ءوندىرىستىڭ وسۋىنە ىقپال ەتپەك. ماسەلەن, كۇنباعىس مايىنىڭ ءوندىرىسى 890 مىڭ تونناعا دەيىن ارتادى. بۇل وتكەن جىلمەن سالىستىرعاندا شامامەن 100 ملرد تەڭگەگە ارتىق ءونىم شىعارۋعا مۇمكىندىك بەرەدى.
جۇگەرىنى قايتا وڭدەيتىن ەكى جاڭا زاۋىت ىسكە قوسىلعاننان كەيىن 640 مىڭ توننا شيكىزاتتى قايتا وڭدەۋ جوسپارلانىپ وتىر. سونىمەن قاتار كراحمال ونىمدەرى مەن امينقىشقىلدارىنىڭ ءوندىرىسىن 205 مىڭ توننادان 260 مىڭ تونناعا دەيىن ۇلعايتۋ كوزدەلگەن. بۇل شامامەن 55 ملرد تەڭگەنىڭ قوسىمشا ءونىمىن شىعارۋعا مۇمكىندىك بەرەدى.
ءسۇت سالاسىندا دا ءوسىم بولۋعا ءتيىس. بۇل باعىتتا 2,4 ملن توننا شيكىزاتتى قايتا وڭدەۋ جوسپارلانىپ وتىر. ناتيجەسىندە, شامامەن 36 ملرد تەڭگەگە قوسىمشا ءونىم وندىرىلمەك. سالاداعى ءىرى كاسىپورىندار دا ءوندىرىس كولەمىن ارتتىرۋدى جوسپارلاپ وتىر. مىسالى, «سالامات» ۇن تارتۋ كاسىپورنى ۇن ءوندىرىسىن 232 مىڭ توننادان 257 مىڭ تونناعا دەيىن ۇلعايتۋدى كوزدەپ وتىر. بۇل – شامامەن 11% ءوسىم. «Qazaq Astyq Group» كاسىپورنى وسىمدىك مايى ءوندىرىسىن 106 مىڭ توننادان 126 مىڭ تونناعا دەيىن جەتكىزۋدى جوسپارلاعان. بۇل – 19% ءوسىم. «ماسلو-دەل» ءسۇت وڭدەۋ كاسىپورنى وڭدەلگەن ءسۇت ءوندىرىسىن 98,2 مىڭ توننادان 121 مىڭ تونناعا دەيىن ارتتىرۋدى كوزدەپ وتىر. بۇل – 23% ءوسىم. ال جاركەنت كراحمال-سىرنە زاۋىتى كراحمال مەن سىرنە ءوندىرىسىن 61,5 مىڭ توننادان 67,6 مىڭ تونناعا دەيىن جەتكىزۋدى جوسپارلاعان. بۇل – 10% ءوسىم. «Coca-Cola الماتى بوتتلەرس» كاسىپورنى الكوگولسىز سۋسىن ءوندىرىسىن ايتارلىقتاي ارتتىرۋدى كوزدەپ وتىر. قازىرگى 4,3 ملرد ليتر كولەمى 6,7 ملرد ليترگە دەيىن وسەدى دەپ جوسپارلانعان. بۇل – 55% ءوسىم. سونىمەن قاتار «كۋبلەي» ەت وڭدەۋ كاسىپورنى مەن «ايس» ءسۇت كاسىپورنى دا ءوندىرىس كولەمىن ۇلعايتۋعا ءتيىس.
جالپى, وڭدەۋ ونەركاسىبىنىڭ باسقا سالالارىندا دا وڭ ديناميكا بايقالىپ وتىر. جىلدىڭ العاشقى ەكى ايىندا ناقتى كولەم يندەكسىنىڭ جوعارى ءوسىمى تىركەلگەن. ماشينا جاساۋ سالاسىندا بۇل كورسەتكىش – 115,5%. قۇرىلىس ماتەريالدارىن ءوندىرۋ – 127,4%. مەتالل بۇيىمدارى ءوندىرىسى – 131,4%. جەڭىل ونەركاسىپ – 156,4%. رەزەڭكە جانە پلاستماسسا بۇيىمدارى ءوندىرىسى – 111,5%.
ساۋدا سالاسىندا دا ءوسىم بايقالادى. 2026 جىلدىڭ قاڭتار-اقپان ايلارىنىڭ قورىتىندىسى بويىنشا ناقتى كولەم يندەكسى 103,4% بولدى. جالپى, ساۋدا اينالىمى 9,7 ترلن تەڭگەگە جەتتى. ال وتكەن جىلدىڭ وسى كەزەڭىندە بۇل كورسەتكىش 8,9 ترلن تەڭگە بولعان. ياعني ءوسىم 0,9 ترلن تەڭگەنى نەمەسە 10,2%-دى قۇرادى.
كوتەرمە ساۋدادا دا وڭ ديناميكا بايقالادى. ناقتى كولەم يندەكسى – 103,8%. اينالىم كولەمى – 6,5 ترلن تەڭگە. ال 2025 جىلعى قاڭتار-اقپاندا بۇل كورسەتكىش 6,1 ترلن تەڭگە بولعان. بولشەك ساۋدا سالاسى دا تۇراقتى ءوسىمدى كورسەتىپ وتىر. مۇندا ناقتى كولەم يندەكسى 102,6% بولدى. جالپى اينالىم 3,2 ترلن تەڭگەگە جەتتى. ال ءبىر جىل بۇرىن بۇل كورسەتكىش 2,8 ترلن تەڭگە بولعان. ازىق-ت ۇلىك تاۋارلارىن ساتۋ كولەمى ايتارلىقتاي ارتقان. ءوسىم +22% نەمەسە شامامەن 0,4 ترلن تەڭگەنى قۇرادى. بۇل باعىتتاعى ەڭ جوعارى ءوسىم تۇركىستان وبلىسىندا – 112,1%. الماتى وبلىسىندا – 110,9%. اتىراۋ وبلىسىندا – 103,9%. اقتوبە وبلىسىندا – 102,7%. شىمكەنت قالاسىندا – 105,4%.
ازىق-ت ۇلىك ەمەس تاۋارلار بويىنشا ماڭعىستاۋ وبلىسى كوش باستاپ تۇر – 119,2%. سولتۇستىك قازاقستان وبلىسىندا – 108,5%. جەتىسۋ وبلىسىندا – 108,1%. شىعىس قازاقستان وبلىسىندا – 107,6%. تۇركىستان وبلىسىندا – 106,0%. تالقىلاۋ قورىتىندىسى اياسىندا ۆيتسە-پرەمەر سالالىق مينيسترلىكتەرگە ءوندىرىستى كەڭەيتۋگە ءارى جۇمىس ىستەپ تۇرعان كاسىپورىنداردىڭ جۇكتەمەسىن ارتتىرۋعا كەدەرگى كەلتىرەتىن ماسەلەلەردى جان-جاقتى قاراستىرىپ, ولاردى شەشۋ جولدارىن پىسىقتاۋدى تاپسىردى.