پرەزيدەنت قاسىم-جومارت توقاەۆ قازاق ەلىنىڭ كوك پاسپورتىن يەلەنگەن ءاربىر وتانداسىمىز الەمنىڭ قاي تۇكپىرىندە جۇرسە دە مەملەكەتتىڭ قورعاۋى مەن قامقورلىعىندا بولاتىنىن ءجيى ايتىپ ءجۇر. كۇنى كەشە ءماسليحات دەپۋتاتتارىنىڭ ءىىى فورۋمىندا دا تاياۋ شىعىستاعى شيەلەنىستى احۋالعا توقتالا كەلە, ەلىمىز قاقتىعىس ايماعىندا جۇرگەن ازاماتتارىن دالادا قالدىرماي, تۋعان جەرگە اكەلىپ جاتقانىن اتاپ ءوتتى.
«ازاماتتارىمىزدى قيىن جاعدايدا قالدىرمايمىز». بۇل – جاي عانا ۇران نەمەسە پوپۋليزم ەمەس, مەملەكەتتىك ساياساتىمىزدىڭ بۇلجىماس قاعيداتى», دەپ اتاپ ءوتتى ق.توقاەۆ.
پرەزيدەنت ايتقانداي, شىن مانىندە قازاقستان ءوز ازاماتتارىن ەشۋاقىتتا تاعدىر تالكەگىنە قالدىرعان ەمەس. پاندەميا كەزىندە دە, ءوز ەلىمىزدە سۋ تاسقىنى, ءورت, باسقا دا توتەنشە جاعدايلار تۋىنداعان شاقتا دا مەملەكەت قيىندىققا دۋشار بولعان تۇرعىندارعا جان-جاقتى قول ۇشىن سوزعانى ءمالىم.
ال شەت ايماقتاردا جاردەمگە مۇقتاج بولعان ادامدارعا جاسالعان قامقورلىقتىڭ جارقىن مىسالدارىن سوناۋ تاۋەلسىزدىك العان العاشقى جىلداردان دا كەلتىرۋگە بولادى. ماسەلەن, 90-جىلداردىڭ باسىندا تاجىكستاندا ازامات سوعىسى باستالعاندا سول جاقتاعى قازاقتاردى ۇشاقپەن العاش بولىپ الىپ شىققان دا ءبىزدىڭ ەلىمىز ەدى. ودان بەرگى تاريحقا كوز جۇگىرتسەك, ەڭ ءبىرىنشى بولىپ ويعا ورالاتىن وقيعا – «جۋسان» گۋمانيتارلىق وپەراتسياسى. راديكالدى ءدىني يدەولوگيانىڭ ىقپالىنا ەرگەن جۇزدەگەن وتانداسىمىز «حاليفات ورناتامىز» دەگەن الداپ-ارباۋعا سەنىپ, تۋعان جەرىن تاستاپ, جىراققا كەتكەنى بەلگىلى. كوپشىلىگى وتباسىمەن, بالا-شاعاسىمەن بىرگە شەكارا اسىپ, وق پەن وتتىڭ ورتاسىندا ءومىر ءسۇرىپ جاتقان ەدى.
دەگەنمەن سول جولى دا مەملەكەتىمىز جات جەردەن جۇماق ىزدەپ, اداسقانداردى كوزدەن تاسا قىلماي, دالاعا تاستاماي, بىرنەشە كەزەڭنەن تۇراتىن «جۋسان» وپەراتسياسىن ۇيىمداستىرىپ, 500-دەن استام وتانداسىمىزدى تۋعان جەرگە الدىردى. نەگە؟ ويتكەنى ولار دا قاستەرلى كوك پاسپورتتىڭ يەگەرلەرى. پرەزيدەنت ق.توقاەۆ اتاپ وتكەندەي, پاسپورتىمىزدىڭ قۋاتى مەملەكەتىمىزدىڭ ىقپالىنان, حالقىمىزدىڭ جاسامپاز رۋحىنان, زاماننىڭ وزىق يدەيالارىن يگەرە الاتىن قابىلەتىمىزدەن كورىنەدى.
ال بۇل جولى مەملەكەتىمىز تاياۋ شىعىستاعى شىنايى سوعىس جاعدايىندا تۇرعان ەلدەردەن قازاقستان ازاماتتارىن قوسىمشا ارنايى ۇشاق جىبەرىپ, ەۆاكۋاتسيالاۋدى ءوز جاۋاپكەرشىلىگىنە الدى. سىرتقى ىستەر مينيسترلىگىنىڭ 10 ناۋرىزداعى مالىمەتىنشە 8 585 وتانداسىمىز ەلگە ورالعان. ونىڭ 66-سى يراننان.
«ايماقتاعى احۋالعا بايلانىستى ازاماتتاردى اۋە جانە قۇرلىق ارقىلى ەۆاكۋاتسيالاۋ جۇمىستارى جالعاسىپ جاتىر. الداعى كۇندەرى يزرايلدەن – 78, قاتاردان – 350, بىرىككەن اراب امىرلىكتەرىنەن – 550, ساۋد ارابياسىنان – 300 ادامدى قايتارۋ جوسپاردا بار», دەپ مالىمدەدى ءسىم ءباسپاسوز قىزمەتى.
قازىر الەمدە ءوزىنىڭ ەلى مەن جەرى, پاسپورتى جوق وتانسىز حالىقتار از ەمەس. وتانى بولسا دا, سوعىس پەن وزگە دە كۇردەلى جاعدايدىڭ سالدارىنان تۋعان جەرىنەن بەزگەن بوسقىندار قانشاما؟ وسىندايدا «قازاقستان» اتتى كيەلى شاڭىراعىمىزدىڭ, ۇلانعايىر جەرىمىزدىڭ, وسى ەلدىڭ ءتول پەرزەنتى ەكەنىڭدى بىلدىرەتىن كوك پاسپورتىڭنىڭ بارىنا شۇكىر ەتۋ كەرەك. «ەرىم دەيتىن ەل بولماسا, ەلىم دەيتىن ەر قايدان شىقسىن!» دەيدى احمەت بايتۇرسىن ۇلى. كوك تۋى مەن كوك پاسپورتىن قاسىق قانى قالعانشا قورعايتىن وتانشىل ازاماتتارىمىز باردا, قازاق ەلىنىڭ ىرگەسى بەرىك, شاڭىراعى بيىك بولا بەرەرى ءسوزسىز!