16 ناۋرىزدا قازاقستاندىق جاس جازۋشىلار مەن اقىندارعا ارنالعان پرەزيدەنتتىك ارناۋلى ادەبي سىيلىققا ۇمىتكەرلەردەن ءوتىنىم قابىلداۋ باستالادى, دەپ حابارلايدى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
سىيلىق جاس قالامگەرلەرگە مەملەكەتتىك قولداۋ كورسەتۋ, دارىندى اقىن-جازۋشىلاردىڭ جاڭا بۋىنىن قالىپتاستىرۋ ماقساتىندا بيىل ءتورتىنشى رەت تاعايىندالىپ وتىر.
ادەبي سىيلىققا 18-35 جاس ارالىعىنداعى قالامگەرلەر بۇرىن حالىقارالىق جانە ۇلتتىق بايقاۋلارعا قاتىسپاعان تۋىندىلارىمەن ۇمىتكەر بولا الادى.
ءوتىنىم «پروزا», «پوەزيا», «دراماتۋرگيا» جانە «بالالار ادەبيەتى» نوميناتسيالارى بويىنشا قابىلدانادى. اۆتور تەك ءبىر نوميناتسياعا عانا ءوتىنىم جولداۋى ءتيىس.
ءوتىنىمدى 2026 جىلعى 16 ناۋرىز بەن 16 ماۋسىم ارالىعىندا قاعاز جانە ەلەكتروندى تۇردە كەلەسى مەكەنجايعا جولداۋ قاجەت: استانا قالاسى, ماڭگىلىك ەل داڭعىلى, 8, 14 كىرەبەرىس, قر مام ارحيۆ, قۇجاتتاما جانە كىتاپ ءىسى كوميتەتى, 273 كابينەت.
ايتا كەتەيىك, استانادا مەملەكەت باسشىسىنىڭ باستاماسىمەن تاعايىندالعان پرەزيدەنتتىك ارناۋلى ادەبي سىيلىق پەن «ايبوز – 2025» ۇلتتىق ادەبي بايقاۋى لاۋرەاتتارىن ماراپاتتاۋ ءراسىمى ءوتتى.