پرەزيدەنتتىڭ تاپسىرماسى بويىنشا «كاسپي تەڭىزىنىڭ قازاق عىلىمي-زەرتتەۋ ينستيتۋتى» كوممەرتسيالىق ەمەس اكتسيونەرلىك قوعامى (كاسپي تەڭىزىنىڭ عزي) قۇرىلدى, دەپ جازادى Egemen.kz.
ينستيتۋت قىزمەتىنىڭ نەگىزگى ماقساتى تابيعي رەسۋرستاردى ساقتاۋ مەن مولىقتىرۋعا, سونداي-اق كاسپي ماڭى مەملەكەتتەرىنىڭ عىلىمي-زەرتتەۋ ۇيىمدارى اراسىنداعى عىلىمي ىنتىماقتاستىقتى دامىتۋعا باعىتتالعان كاسپي تەڭىزىنىڭ قازاقستاندىق سەكتورىندا عىلىمي-زەرتتەۋ جۇمىستارىن جۇرگىزۋ.
كاسپي تەڭىزى عىلىمي-زەرتتەۋ ينستيتۋتى 2025 جىلدىڭ قىركۇيەگىندە قىزمەتىنە كىرىستى.
ۇكىمەت كاسپيدى زەرتتەۋگە 1,1 ملرد تەڭگە ءبولدى
وتكەن كەزەڭدە ينستيتۋت عىلىمي ىنتىماقتاستىق پەن زەرتتەۋ قىزمەتىن دامىتۋ بويىنشا بىرقاتار ءىس-شارا وتكىزدى. اتاپ ايتقاندا, كاسپي تەڭىزى عزي كاسپي ماڭى ەلدەرىنىڭ ۋنيۆەرسيتەتتەرى مەن عىلىمي-زەرتتەۋ ورتالىقتارىنىڭ قاۋىمداستىعىنا كىردى.
كاسپي ماڭى مەملەكەتتەرىنىڭ بەيىندى مەملەكەتتىك ورگاندارىمەن جانە عىلىمي-زەرتتەۋ ۇيىمدارىمەن ءوزارا ءىس-قيمىل جولعا قويىلعان. ازەربايجاننىڭ مەملەكەتتىك مەكەمەلەرى جانە عىلىمي ۇيىمدارى, سونىڭ ىشىندە ەكولوگيا جانە تابيعي رەسۋرستار مينيسترلىگىمەن, اۋىل شارۋاشىلىعى مينيسترلىگىمەن, ۇلتتىق گيدرومەتەورولوگيالىق قىزمەتىمەن ۇلتتىق عىلىم اكادەمياسىنىڭ گەوگرافيا ينستيتۋتىمەن جۇمىس كەزدەسۋلەرىن وتكىزگەن.
كاسپي تەڭىزى ارقىلى ەلەكتر جەلىسى تارتىلادى
سونداي-اق استراحان قالاسىندا رەسەي فەدەراتسياسىنىڭ عىلىمي جانە ءبىلىم بەرۋ مەكەمەلەرىمەن كەزدەسۋلەر ءوتتى, ولاردىڭ اراسىندا كاسپي تەڭىز عىلىمي-زەرتتەۋ ورتالىعى, ۆنيرو ەدىل-كاسپي فيليالى (كاسپنيرح), پ.شيرشوۆ اتىنداعى وكەانولوگيا ينستيتۋتى جانە استراحان مەملەكەتتىك تەحنيكالىق ۋنيۆەرسيتەتى بار.
ماسكەۋ قالاسىندا عىلىمي ءوزارا ءىس-قيمىل مەن بىرلەسكەن زەرتتەۋلەردى دامىتۋعا باعىتتالعان كاسپي تەڭىزى عزي, ن.زۋبوۆ اتىنداعى مەملەكەتتىك وكەانوگرافيالىق ينستيتۋت جانە پ.شيرشوۆ اتىنداعى وكەانولوگيا ينستيتۋتى اراسىندا ءوزارا تۇسىنىستىك تۋرالى مەموراندۋمعا قول قويىلدى.
دالالىق زەرتتەۋلەر شەڭبەرىندە ينستيتۋت ماەك, سارىتاس شىعاناعى جانە قايداق شىعاناعى اۋداندارىندا كاسپي تەڭىزىنىڭ قۇرعاعان ءتۇبىن مونيتورينگتەۋ ءۇشىن ءۇش شىعۋ جۇرگىزدى.
سونىمەن قاتار عىلىمي جاريالانىمداردى دايىنداۋ, ونىڭ ىشىندە كاسپي تەڭىزى دەڭگەيىنىڭ اۋىتقۋىنىڭ جايىق وزەنى اتىراۋىنىڭ گيدرولوگيالىق رەجيمىنە اسەرى ماسەلەلەرى, سونداي-اق قيعاش وزەنى مىسالىندا كاسپي تەڭىزىنىڭ قازاقستاندىق سەكتورىنىڭ تەڭىز ورتاسىنىڭ مونيتورينگى جۇيەسىن قالىپتاستىرۋ ماسەلەلەرى بويىنشا جۇمىستار جۇرگىزىلىپ جاتىر.
وسى جىلى كاسپي تەڭىزى عزي كاسپي تەڭىزىنىڭ قازاقستاندىق سەكتورىنىڭ جاعالاۋ ايماعىندا عىلىمي زەرتتەۋلەر جۇرگىزۋمەن قاتار, تىكەلەي تەڭىز اكۆاتورياسىندا كەشەندى مونيتورينگ جۇرگىزۋدى جوسپارلاپ وتىر. زەرتتەۋ دەرەكتەرى تەڭىز ورتاسىنىڭ گيدرومەتەورولوگيالىق, گيدروحيميالىق جانە گيدروبيولوگيالىق پارامەترلەرىن جۇيەلى باقىلاۋلاردى قامتيدى.
كەشەندى مونيتورينگتى ىسكە اسىرۋ كاسپي تەڭىزىنىڭ ەكوجۇيەسىندە بولىپ جاتقان وزگەرىستەردى باعالاۋ جانە ىقتيمال ەكولوگيالىق تاۋەكەلدەردى ۋاقتىلى انىقتاۋ ءۇشىن وبەكتيۆتى عىلىمي بازانى قالىپتاستىرۋعا مۇمكىندىك بەرەدى.