ەلىمىزدىڭ قاي وڭىرىندە بەنزين مەن ديزەل ارزان؟

Finprom.kz زەرتتەۋىنە سۇيەنسەك, 2026 جىلدىڭ قاڭتارىندا ەلىمىزدە بەنزين مەن ديزەل باعاسى كەيىنگى ءبىر جىلداعى ەڭ جوعارى دەڭگەيگە جەتكەن. ۇلتتىق ستاتيستيكا بيۋروسىنىڭ دەرەكتەرىنە سايكەس, كەڭ تارالعان بەنزين تۇرلەرى بويىنشا تۇتىنۋ باعاسىنىڭ يندەكسى 116,8% بولعان. ال ەڭ كوپ قولدانىلاتىن اي-92 بەنزينى ءبىر جىل ىشىندە 17%-عا قىمباتتاعان. ديزەل وتىنىنىڭ باعاسى دا ءوسىپ, 14,2%-عا ارتقان.

بۇل ءوسىم اۆتوكولىك يەلەرى ءۇشىن كۇتپەگەن جاڭالىق بولعان جوق. وتكەن جىلدىڭ كۇزىنەن باستاپ جانارماي باعاسىنىڭ بىرتىندەپ ءوسىپ كەلە جاتقانى بايقالعان. ستاتيستيكاعا قاراساق, بىلتىرعى جىلدىڭ باسىنان قىركۇيەككە دەيىن بەنزين باعاسىنىڭ يندەكسى 101%-106% ارالىعىندا بولعان. الايدا تامىز ايىنان باستاپ باعانىڭ ءوسۋ قارقىنى كۇشەيىپ, يندەكس 108%-دان 116,8%-عا دەيىن جەتكەن.

وڭىرلەر بويىنشا باعا وسىمىنە كەلسەك, بەنزين باعاسىنىڭ ەڭ جوعارى ءوسىمى پاۆلودار وبلىسىندا تىركەلگەن. مۇندا يندەكس 126,3% بولعان. ودان كەيىن استانا – 120% كورسەتكىشىمەن ەكىنشى ورىندا تۇر. ال العاشقى بەستىككە اباي وبلىسى (117,6%), الماتى وبلىسى (117,1%) جانە ۇلىتاۋ وبلىسى (116,9%) كىرگەن.

بەنزين مەن ديزەل باعاسى قىمباتتادى

ال باعا ەڭ از وسكەن ءوڭىر – باتىس قازاقستان وبلىسى, مۇندا يندەكس 112% عانا بولعان. اتىراۋ وبلىسىندا – 113,1%, ماڭعىستاۋ وبلىسىندا – 113,9%. ورتالىق جانە وڭتۇستىك وڭىرلەردە ءوسىم سالىستىرمالى تۇردە ورتاشا دەڭگەيدە قالىپتاسقان. مىسالى, تۇركىستان وبلىسىندا يندەكس – 114,5%, شىمكەنتتە – 115%, قاراعاندى وبلىسىندا – 115,1%.

جانارمايدىڭ ناقتى باعاسىنا كەلسەك, ەڭ قىمبات بەنزين ءىرى قالالاردا تىركەلگەن. مىسالى, ەل بويىنشا اي-92 بەنزينىنىڭ ورتاشا باعاسى 236 تەڭگە بولسا, استانادا ونىڭ ءليترى 251 تەڭگەدەن ساتىلعان. ال اي-98 بەنزينىنىڭ ورتاشا باعاسى 322 تەڭگە بولعانىمەن, الماتىدا ول 355 تەڭگەگە دەيىن جەتكەن.

ەنەرگەتيكا مينيسترلىگى بەنزين مەن گاز باعاسىنا قاتىستى شاعىمداردى قابىلدايتىن جەلى اشتى

باسقا قالالاردا جاعداي ءارتۇرلى. جەزقازعاندا اي-92 بەنزينى – 242 تەڭگە, تالدىقورعاندا – 239 تەڭگە. ال ەڭ ارزان باعا تۇركىستاندا – 224 تەڭگە, اتىراۋدا – 218 تەڭگە دەڭگەيىندە تىركەلگەن.

اي-95 جانە اي-96 بەنزينى بويىنشا ەڭ جوعارى باعا الماتىدا – 317 تەڭگە, تالدىقورعاندا – 314 تەڭگە, پەتروپاۆلدا – 308 تەڭگە بولعان. ال اقتوبە مەن اتىراۋدا بۇل بەنزيننىڭ باعاسى شامامەن 280 تەڭگە, ياعني, ورتاشا دەڭگەيدەن تومەن.

فوتو: energyprom.kz

ديزەل وتىنىنىڭ ەڭ جوعارى باعاسى ورتالىق وڭىرلەردە بايقالعان. قىستىق ديزەلدىڭ ءليترى قاراعاندىدا – 666 تەڭگە, كوكشەتاۋدا – 628 تەڭگە, استانادا – 614 تەڭگە بولعان. ال ەڭ ارزان ديزەل قىزىلوردادا – 491 تەڭگە, اقتاۋدا – 473 تەڭگە دەڭگەيىندە ساتىلعان.

ەلىمىزدە بەنزين باعاسى وسە مە؟

ساراپشىلاردىڭ ايتۋىنشا, وتكەن جىلدىڭ سوڭىندا جانارماي باعاسىنىڭ ءوسۋ قارقىنى ەۋرازيالىق ەكونوميكالىق وداقتىڭ باسقا ەلدەرىنە قاراعاندا جوعارى بولعان.

«سوڭعى ايلاردا جانارماي باعاسىنىڭ ءوسۋى تەك ىشكى نارىقتاعى فاكتورلارمەن عانا بايلانىستى ەمەس. قازاقستانداعى باعا ديناميكاسى ەاەو ەلدەرىندەگى ۇردىستەرمەن دە استاسىپ جاتىر. 2025 جىلدىڭ جەلتوقسانىندا ەلىمىزدە بەنزين باعاسىنىڭ يندەكسى 115,7% بولدى. بۇل ەاەو بويىنشا ورتاشا كورسەتكىشتەن (111,1%) الدەقايدا جوعارى. مۇنداي ايىرماشىلىق جانارماي نارىعىنداعى قىسىمنىڭ كۇشەيگەنىن كورسەتەدى. دەگەنمەن سوعان قاراماستان قازاقستاندا جانارماي باعاسى كورشى ەلدەرمەن سالىستىرعاندا ءالى دە تومەن دەڭگەيدە قالىپ وتىر. مىسالى, قازاقستاندا بەنزيننىڭ ءليترى ورتا ەسەپپەن 0,5 دوللار بولسا, رەسەيدە ول 0,8 دوللار شاماسىندا, ياعني 78,3% قىمبات. ديزەل وتىنى دا قازاقستاندا ارزان – شامامەن 0,7 دوللار, ال رەسەيدە 1 دوللار, بۇل 49,2% جوعارى», دەيدى زەرتتەۋ اۆتورلارى.

ساراپشىلار تاعى ءبىر ماڭىزدى ماسەلەگە نازار اۋدارادى. قازىرگى سالىستىرمالى تۇردە تومەن باعا ۇزاققا سوزىلماۋى مۇمكىن.

«قازىرگى باعا ايىرماشىلىعى ۇزاق مەرزىمدە ساقتالا بەرمەۋى ىقتيمال. سەبەبى 2027 جىلدىڭ 1 قاڭتارىنان باستاپ ەاەو ەلدەرى اراسىندا مۇناي مەن مۇناي ونىمدەرىنىڭ ورتاق نارىعىن قۇرۋ تۋرالى كەلىسىم كۇشىنە ەنەدى. ەگەر بۇل جوسپار تولىق جۇزەگە اسسا, قازاقستانداعى جانارماي باعاسى بىرتىندەپ وداقتاعى باسقا ەلدەردىڭ دەڭگەيىنە جاقىنداۋى مۇمكىن. سوندىقتان بۇگىنگى باعا بولاشاقتاعى جاعدايمەن سالىستىرعاندا الدەقايدا تومەن كورىنۋى ىقتيمال», دەپ اتاپ وتەدى ساراپشىلار.