تاياۋ شىعىستاعى شيەلەنىسكە بايلانىستى Air Astana اۋە كومپانياسى 11-31 ناۋرىز ارالىعىندا الماتىدان دۋبايعا جانە استانادان دۋبايعا تۇراقتى رەيستەردى توقتاتاتىنىن حابارلادى, دەپ جازادى Egemen.kz.
اۋە كومپانياسى توقتاتىلعان رەيستەردىڭ جولاۋشىلارىنا ايىپپۇلسىز تولىق قايتارۋ نەمەسە 1 ساۋىردەن 31 مامىردى قوسا العانداعى كەزەڭدە ورىندالاتىن رەيستەرگە تەگىن قايتا برونداۋدى ۇسىنىپ وتىر.
بۇعان دەيىن Air Astana دۋباي, جيددا, مەدينا جانە دوحا قالالارىنا جوسپارلانعان بارلىق تۇراقتى رەيستەردى 10 ناۋرىزدى قوسا العانعا دەيىن توقتاتاتىنىن, اتالعان باعىتتار بويىنشا بيلەتتەردى ساتۋ 17 ناۋرىزعا دەيىن ۋاقىتشا توقتاتىلعانىن مالىمدەگەن ەدى.
ەندى بۇل مەرزىم اي سوڭىنا دەيىن ۇزارتىلىپ وتىر.
اۋە كومپانيا تاياۋ شىعىستاعى وقيعالاردى مۇقيات قاداعالاۋدى جالعاستىرماق.
ەسكە سالا كەتەيىك, يزرايل 28 اقپان, سەنبى كۇنى تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي وتىر. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.