الاش قوزعالىسىننىڭ كوشباسشىسى, كورنەكتى مەملەكەت قايراتكەرى ءاليحان بوكەيحاننىڭ تۋعانىنا – 160 جىل. ول ازاتتىقتى اڭساپ, تۋعان ەلىنىڭ ساياسي تۇتاستىعى مەن بەكەمدىگى جولىندا جانىن قۇربان ەتتى. جۇرتىنىڭ مۇراسىن تۇگەندەپ, مۇراتىن ايقىندادى. الاش ۇعىمىن ەلدىك ءھام مەملەكەتتىك رامىزگە اينالدىرعان تۇلعانىڭ قۇرمەتىنە استاناداعى زيالى قاۋىم ءۇش ارىس – ءاليحان, احمەت, مىرجاقىپ ەسكەرتكىشىنە گۇل شوقتارىن قويىپ, تاعزىم ەتتى. ءىس-شاراعا Alash.kz ۇلتتىق پورتالى مۇرىندىق بولدى.
سالتاناتتى ءىس-شاراعا فيلولوگيا عىلىمدارىنىڭ دوكتورى, پروفەسسور تۇرسىن جۇرتباي قاتىسىپ, الاش رۋحانياتى تۋرالى ءسوز سويلەدى. ء«اليحان بوكەيحان جانە ول تۇيىندەپ بەرگەن يدەيا ناتيجەسىندە قازاقتىڭ تاۋەلسىزدىك نىساناسى بەكىدى. ول قازاقتىڭ مۇددەسىنە كەشەگى كۇنى قىزمەت ەتكەن, بۇگىن دە, ەرتەڭ دە قىزمەت ەتە بەرەدى. ۇلت كوشباسشىسىنىڭ ءومىرى مەن شىعارماشىلىعىنا بايىپتى كوزقاراس, سىندارلى زەرتتەۋ ءالى دە قاجەت. جۇرت ىسىنە جۇمىلاتىن جاستار باردا الەكەڭنىڭ تىككەن تۋى قاشاندا بيىك بولادى», دەدى ت.جۇرتباي.
راسىندا, ءاليحان بوكەيحان باتقان كۇننىڭ شۇعىلاسىنا ەمەس, اتار تاڭنىڭ شاپاعىنان كوپ ءۇمىت كۇتتى. وقىعان جاستارعا سەنىم ارتىپ, ەل كەلەشەگىن سولاردىڭ ءبىلىم-بىلىگى مەن ازاماتتىق جاۋاپكەرشىلىگىنە تاپسىردى. ء«بىز – سۋدى تەرىس اعىزعان اتانىڭ بالاسىمىز» دەپ ارۋاقتى بابالارعا يىق تىرەي وتىرىپ, «الدا ءالى كۇندى كورە بىلەتىن ۇرپاق كەلەدى» دەپ ەرتەڭگە ەلجىرەي قارايدى. سالتاناتتى راسىمدە الاشتانۋشى, پروفەسسور ايگۇل ىسماقوۆانىڭ دا ءسوزى وسى ويدى قۋاتتادى.
ء«بىز بەيبىت حالىقپىز. سونىمىزبەن باسقاعا ۇلگى كورسەتىپ كەلەمىز. ادامدىق مۇراتتى بارىنەن جوعارى قوياتىن تولەرانتتى, زايىرلى مەملەكەت – ەلدىڭ باقىتى. مۇنىڭ باسىندا ءاليحان بوكەيحان تۇجىرىمداعان الاش يدەياسى تۇر», دەدى ا.ىسماقوۆا.
ەلورداداعى تاعىلىمدى ءىس-شارا سول كۇنى ءتۇرلى فورماتتا جالعاسىن تاپتى.