پرەزيدەنت قاسىم-جومارت توقاەۆ ساۋد ارابياسىنىڭ تاق مۇراگەرى مۇحاممەد بەن سالمان ءال ساۋدپەن تەلەفون ارقىلى سويلەستى. مەملەكەت باسشىسى تاق مۇراگەرىمەن اڭگىمەلەسۋ بارىسىندا تاياۋ شىعىستاعى قاقتىعىستىڭ ۋشىعۋى ايماقتىق قانا ەمەس, جاھاندىق قاۋىپسىزدىك پەن تۇراقتىلىققا وراسان قاتەر توندىرەتىنىنە نازار اۋداردى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت پەن تاق مۇراگەرى قاقتىعىسقا قاتىسپاعان ەلدەردىڭ اۋماعىنا شابۋىلداردىڭ جالعاسۋى مۇسىلمان ۇمبەتىنىڭ ءوزارا قۇرمەت پەن توزىمدىلىك تانىتاتىن ايىندا ورىن العانىنا قىنجىلاتىندارىن جەتكىزدى. مەملەكەت باسشىسى وتانداستارىمىزدى قازاقستانعا ەۆاكۋاتسيالاۋعا كومەكتەسكەن كورولدىك ۇكىمەتىنە العىس ايتتى.
ءوز كەزەگىندە تاق مۇراگەرى قولداۋ كورسەتكەنى ءۇشىن قاسىم-جومارت توقاەۆقا ريزاشىلىعىن ءبىلدىرىپ, قاسيەتتى رامازان ايىندا قازاقستان حالقىنا ىزگى تىلەگىن جولدادى.
تاراپتار ەكىجاقتى قاتىناستاردى جاڭا ءارى ساپالى دەڭگەيگە كوتەرۋ, سونداي-اق حالىقارالىق ارەناداعى بىرلەسكەن كۇش-جىگەردى ۇيلەستىرۋ ماقساتىندا تۇراقتى ساياسي ديالوگتى ارتتىرۋعا ۋاعدالاستى.
بۇعان دەيىن پرەزيدەنت ومان سۇلتانى جانە باحرەين كورولىمەن تەلەفون ارقىلى سويلەسكەنىن حابارلاعانبىز.