ءماجىلىس دەپۋتاتى ەرلان سايروۆ ەل ازاماتتارىنىڭ بىرىككەن اراب امىرلىكتەرىندەگى قىمبات ۇيلەرىنە قاتىستى ماسەلەنى قۇقىقتىق تۇرعىدان تەكسەرۋدى سۇراپ, باس پروكۋراتۋراعا رەسمي حات جولداۋعا نيەتتى. اڭگىمە بۇرىنعى جوعارى لاۋازىمدى تۇلعالار مەن ولاردىڭ جاقىندارىنىڭ يەلىگىندەگى م ۇلىك تۋرالى بولىپ وتىر, دەپ جازادى Egemen.kz
بۇل ماسەلە تاياۋ شىعىستاعى سوڭعى شيەلەنىس كەزىندە دۋبايداعى Fairmont The Palm تۇرعىن ءۇي كەشەنى ماڭىنا زىمىران قۇلاپ, ءورت شىققاننان كەيىن قايتادان قىزۋ تالقىلانا باستادى. الەۋمەتتىك جەلىلەردە سول اۋداندا ەل ازاماتتارىنىڭ قىمبات پاتەرلەرى بولۋى مۇمكىن دەگەن پىكىرلەر تارادى.
دۋبايداعى امەريكا كونسۋلدىعى وتقا وراندى
جۋرناليستىك زەرتتەۋلەرگە سۇيەنسەك, اتالعان تۇرعىن ءۇي كەشەنىندەگى 97 پاتەر قازاقستان ازاماتتارىنا تيەسىلى بولۋى ىقتيمال. ولاردىڭ اراسىندا بۇرىنعى ىقپالدى شەنەۋنىكتەردىڭ تۋىستارى مەن جاقىندارى بولۋى مۇمكىن دەگەن بولجام دا ايتىلىپ ءجۇر.
ءماجىلىس كۋلۋارىندا سويلەگەن ەرلان سايروۆ بۇل جاعدايعا قۇقىقتىق باعا بەرىلۋى قاجەت دەپ سانايتىنىن جەتكىزدى.
«مەن باس پروكۋراتۋرانىڭ اتىنا حات جولدارمىن. ولار بۇل ماسەلەگە قۇقىقتىق تۇرعىدان باعا بەرسىن. ال مورالدىق تۇرعىدان قاراساق, بۇل دۇرىس ەمەس. بۇل ءتىپتى حالىققا قاتىستى انتيگۋماندىق ارەكەت», دەدى دەپۋتات.
دەپۋتاتتىڭ پىكىرىنشە, ەگەر مەملەكەتتىك قىزمەتتە بولعان ادامداردىڭ نەمەسە ولاردىڭ جاقىندارىنىڭ شەتەلدە قىمبات م ۇلىك يەلەنگەنى انىقتالسا, ونىڭ زاڭدىلىعى مەن قارجى كوزدەرى مۇقيات تەكسەرىلۋى كەرەك. ساراپشىلاردىڭ ايتۋىنشا, مۇنداي ماسەلەلەر قوعامداعى ادىلەتتىلىك پەن اشىقتىق تالاپتارىن كۇشەيتۋ تۇرعىسىنان دا ماڭىزدى.