وسكەمەندە جاڭا كونستيتۋتسيا جوباسىنا ارنالعان قوعامدىق كەزدەسۋ ءوتتى. زيالى قاۋىم وكىلدەرى, ەتنومادەني بىرلەستىكتەر مەن جاستار الداعى رەسپۋبليكالىق رەفەرەندۋمعا شىعارىلعان قۇجاتتى تالقىلاپ, ءوز ۇستانىمدارىن ءبىلدىردى, دەپ جازادى Egemen.kz.
سارسەن امانجولوۆ اتىنداعى شىعىس قازاقستان ۋنيۆەرسيتەتىندە جالپىۇلتتىق كواليتسيانىڭ «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» باستاماسىمەن كەزدەسۋ ءوتتى. دەلەگاتسيانى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا باستاپ كەلدى. جيىنعا ءماجىلىس دەپۋتاتتارى لۇكبەك تۇماشينوۆ, سەرگەي پونومارەۆ, قازاقستان كاسىپوداقتار فەدەراتسياسىنىڭ توراعاسى ساتىبالدى داۋلەتالين, «ەۋرازيا» ءبىرىنشى ارناسىنىڭ ءباسپاسوز حاتشىسى پولينا شيمانسكايا, ۋنيۆەرسيتەت رەكتورى مۇحتار تولەگەن جانە وزگە دە وكىلدەر قاتىستى.
اتا زاڭ ەۆوليۋتسياسى: وتپەلى كەزەڭنەن كەمەل كەلەشەككە
كەزدەسۋ بارىسىندا ايدا بالاەۆا كونستيتۋتسيالىق رەفورما جەكەلەگەن تۇزەتۋلەرمەن شەكتەلمەيتىنىن, ەل دامۋىنىڭ ساپاسىنا اسەر ەتەتىن تۇبەگەيلى وزگەرىستەردى كوزدەيتىنىن اتاپ ءوتتى.
«بۇگىن جاڭا كونستيتۋتسيا جوباسىن تالقىلاي وتىرىپ, ءبىز ۇلكەن نە كىشى تۇزەتۋلەر جايىن ءسوز ەتىپ وتىرعان جوقپىز. ەل دامۋىنىڭ باعىتى تۇبەگەيلى جاڭارادى. بۇل, بىرىنشىدەن, ۇلتتىق قۇندىلىقتاردىڭ ماڭگىلىگى, ەڭ بيىگىندە تاۋەلسىزدىگىمىز تۇرعان ۇستانىم. ەكىنشىدەن, قۇقىعى مەن بوستاندىعى عىلىم, مادەنيەت جانە يننوۆاتسيا قۇندىلىقتارىمەن نىعايتىلعان, باسەكەگە قابىلەتتى ۇرپاق قالىپتاستىرۋ. ۇشىنشىدەن, ۇلتتىڭ قازىرگى الەمدىك تارتىپتەگى ورنى مەن ءرولىن قايتا پايىمداۋ», دەدى ول.
ۆيتسە-پرەمەر جوبانىڭ تۇعىرنامالىق نەگىزىن مەملەكەت باسشىسىنىڭ باستامالارى قۇرايتىنىن دا ايرىقشا ايتتى.
«جاڭا كونستيتۋتسيانىڭ تۇجىرىمدامالىق وزەگىن «ادال ازامات», «زاڭ مەن ءتارتىپ», «تازا قازاقستان» سياقتى پرەزيدەنت باستامالارى قالىپتاستىردى. وسىعان بايلانىستى قاسىم-جومارت كەمەل ۇلىن نەگىزگى زاڭنىڭ باستى اۆتورى دەۋگە تولىق نەگىز بار. مەملەكەت باسشىسى قوعامنان تۇسكەن ءاربىر ۇسىنىستى جەكە قاراپ, ايتىلعان سىنعا دا ءمان بەرىپ, ودان ناقتى قورىتىندى شىعاردى», دەپ تۇيىندەدى ايدا بالاەۆا. بۇل جەردە قاسىم-جومارت توقاەۆتىڭ جەكە قاتىسۋىمەن قالىپتاسقان قوعامدىق ديالوگتىڭ ماڭىزى اتاپ ءوتىلدى.
شىعىس قازاقستان وبلىسىنىڭ اكىمى نۇرىمبەت ساقتاعانوۆ جوبانىڭ كەڭ قوعامدىق تالقىلاۋدان وتكەنىن جەتكىزدى.
«جاڭا كونستيتۋتسيا جوباسى ازاماتتار, ساياسي پارتيالار, قوعامدىق ۇيىمدار مەن ساراپشىلار قاۋىمىنىڭ ۇسىنىستارىن ەسكەرە وتىرىپ دايىندالدى. بۇل – شىن مانىندە بۇكىلحالىقتىق جۇمىس ناتيجەسى», دەدى ول.
ايدا بالاەۆا: جاڭا اتا زاڭ ادام قۇقىعى مەن بوستاندىعىن باستى ورىنعا قويادى
ينستيتۋتسيونالدىق جاڭالىقتارعا توقتالعان ءماجىلىس دەپۋتاتى لۇكبەك تۇماشينوۆ تاريحي ساباقتاستىق پەن باسقارۋ جۇيەسىنىڭ تۇراقتىلىعى ماسەلەسىن تارقاتتى.
«قۇرىلتاي اتاۋى تەرەڭ تاريحتان باستاۋ الادى. ۆيتسە-پرەزيدەنت ينستيتۋتىنا قاتىستى پىكىر كوپ ايتىلدى, الايدا مۇنداي تاجىريبە كوپتەگەن ەلدەردە بار. بۇل ينستيتۋت جۇيەنىڭ ورنىقتىلىعىن قامتاماسىز ەتۋگە باعىتتالعان. قۇرىلتاي قالىپتاسقان سوڭ پرەزيدەنت كانديداتۋرا ۇسىنادى, دەپۋتاتتار داۋىس بەرەدى. ۆيتسە-پرەزيدەنت بىرقاتار باعىتتا, سونىڭ ىشىندە حالىقارالىق بايلانىستاردا جۇمىس اتقارادى, ال توتەنشە جاعدايدا بيلىك ساباقتاستىعىن ساقتاپ, سايلاۋدى بەلگىلەنگەن مەرزىمدە ۇيىمداستىرۋعا جاۋاپتى», دەدى دەپۋتات.
ۋنيۆەرسيتەت الاڭىنداعى پىكىرتالاستا ادامي كاپيتالدىڭ ءرولى دە كەڭىنەن ءسوز بولدى. ۋنيۆەرسيتەت رەكتورى مۇحتار تولەگەن ادام دامۋىنا باسىمدىق بەرۋ ءبىلىم مەن عىلىمدى وڭىرلىك باسەكەگە قابىلەتتىلىكتىڭ وزەگىنە اينالدىراتىنىن ايتتى.
«2026 جىلعى كونستيتۋتسيالىق رەفورما – نورمالاردى جاڭارتۋ عانا ەمەس, ادىلەتتى قازاقستاندى قۇرۋ لوگيكاسىنا ساي ينستيتۋتسيونالدىق جاڭعىرۋ. ادامي كاپيتالدى دامىتۋعا كونستيتۋتسيالىق دەڭگەيدە باسىمدىق بەرۋ – ەلدىڭ ستراتەگيالىق تاڭداۋى. ءبىلىم مەن عىلىم ەكونوميكالىق ءوسىمنىڭ, تەحنولوگيالىق ەگەمەندىكتىڭ جانە وڭىرلىك باسەكەگە قابىلەتتىلىكتىڭ قوزعاۋشى كۇشىنە اينالىپ وتىر», دەدى ول.
جاڭا اتا زاڭدا «ادام» ءسوزى 76 رەت كەزدەسەدى: ەرلان قارين جاڭا كونستيتۋتسيا جوباسىنىڭ باستى ەرەكشەلىگىن اتادى
كەزدەسۋ قورىتىندىسىندا قاتىسۋشىلار جاڭا كونستيتۋتسيا ەلدىڭ بولاشاعىنا ايقىن باعدار بەرەتىنىن, ماتىندە ءبىلىم, عىلىم, يننوۆاتسيا, ەكولوگيالىق جاۋاپكەرشىلىك جانە كەلەر ۇرپاق الدىنداعى مىندەتتەرگە ەرەكشە ءمان كۇشەيگەنىن اتاپ ءوتتى. قويىلعان ساۋالدارعا جان-جاقتى جاۋاپ بەرىلىپ, رەفەرەندۋمنىڭ ءمانى ءتۇسىندىرىلدى.