قايبىر جىلدارى قازاقتىڭ بەتاشارى ماتەريالدىق ەمەس مادەني مۇرا قۇندىلىعى رەتىندە يۋنەسكو تىزىمىنە ەنگەندە, توبەمىز كوككە جەتەردەي قۋانعانبىز. بەتاشار دەگەن سوڭ ساۋكەلەنى اتتاپ وتە المايسىز. جاڭا تۇسكەن جاس كەلىننىڭ ساۋكەلەسى دەگەن سوڭ, اجەلەردىڭ كيمەشەگى ەسكە تۇسەدى. وسىنداي قۇندىلىقتار جاساۋشى قولى التىن جاندار قاسىمىزدا جۇرگەنىن بىلە بەرمەيمىز. سونىڭ ءبىرى ءھام بىرەگەيى – بۇلبۇلحان سەرعازىقىزى.
بىلتىر كورشى رەسەيدىڭ ومبى قالاسىندا XXIV ەۋرازيالىق ۇلتتىق كيىمدەردىڭ ءسان بايقاۋى ءوتىپ, وعان استانانىڭ ىرگەسىندەگى قوياندى اۋىلىنىڭ تۇرعىنى, ايتۋلى قولونەر شەبەرى بۇلبۇلحان سەرعازىقىزى قاتىسىپ, ءىى ورىننان كورىنىپ, ۇلتتىق ءسان ۇلگىسىنىڭ مەرەيىن ۇستەم ەتتى. 2025 جىلدىڭ قاراشاسىندا ۇيىمداستىرىلعان «ەتنو-ەراتو» اتتى ەۋرازيالىق ۇلتتىق كيىمدەر ءسان بايقاۋىندا 40 مەملەكەتتەن 300-گە جۋىق ۇمىتكەر جارىسقا تۇسكەن. وسىنشاما قاتىسۋشىنىڭ اراسىنان وزا شاۋىپ, ۇلتتىق كيىم ۇلگىلەرىنىڭ ديزاينەرى رەتىندە اق كيمەشەك توپتاماسىن ۇسىنعان بۇلبۇلحان اپاي جۇلدەلى ورىن يەگەرى اتاندى. ونىڭ ەڭبەگىن قازىلار القاسىنىڭ 19 مۇشەسى ءبىراۋىزدان قولداپ, جوعارى باعالادى. ءوزى بولسا, «قولداۋ بىلدىرگەن بارشا قازىلار القاسىنا العىسىم شەكسىز» دەيدى.
بۇلبۇلحان سەرعازىقىزى – 58 جاستا, ەلدە جانە شەتەلدەردە وتكەن ءتۇرلى قولونەر بايقاۋلارىنىڭ جەڭىمپازى. رەسپۋبليكالىق «اق كيمەشەك – ۇلت اجارى» اتتى بايقاۋدا باس جۇلدەنى يەلەنسە, اقمولا وبلىسىندا وتكەن ء«ساندى ساۋكەلە مەن كيەلى كيمەشەك شەبەرى» بايقاۋىندا دا باس جۇلدەگە قول جەتكىزىپ, تۋعان اۋىلى قوياندىنىڭ مەرەيىن ۇستەم ەتتى.
30 جىلدىق تاجىريبەسى بار قولونەر شەبەرى اجەلەردىڭ اق كيمەشەگى مەن باسقا دا ۇلتتىق بۇيىمدارعا امانات دەپ قاراپ, اتا-بابادان جەتكەن اسىل مۇرانى ناسيحاتتاۋدان جالىققان ەمەس. بۇلبۇلحان سەرعازىقىزى ونەرىن مۇمكىندىگى شەكتەۋلى جاندارعا جانە ءوسىپ كەلە جاتقان جاس ۇرپاققا ۇيرەتىپ, ۇلتتىق قۇندىلىقتاردى دارىپتەپ ءجۇر.
الپىس جاسقا تاياپ قالسا دا, ول «ۇرپاققا بەرەرىم ءالى دە كوپ» دەپ, ىزگىلىك جولىنداعى ەڭبەگىن تالماي جالعاستىرىپ كەلەدى.