پرەزيدەنتتىڭ ۇلتتىق قۇرىلتايدىڭ قىزىلوردا قالاسىندا وتكەن V وتىرىسىندا بەرگەن تاپسىرماسىن ورىنداۋ اياسىندا جاركەنت مەشىتى جانە ۆوزنەسەنسك شىركەۋى يۋنەسكو-نىڭ بۇكىلالەمدىك مۇرا نىساندارىنىڭ الدىن الا تىزىمىنە ەنگىزىلدى (Tentative List). بۇل تۋرالى مەملەكەتتىك كەڭەسشى ەرلان قارين الەۋمەتتىك جەلىدەگى پاراقشاسىندا حابارلادى.
ونىڭ ايتۋىنشا, جاركەنت مەشىتى ءحىح عاسىر سوڭىنداعى ءدىني ساۋلەت ونەرىنىڭ بىرەگەي ەسكەرتكىشى سانالادى. سونىمەن قاتار ونى يسلام ساۋلەت ءداستۇرى مەن شىعىس ازيا قۇرىلىس ونەرى سينتەزىنىڭ جارقىن مىسالى دەۋگە بولادى.
ينجەنەرلىك جانە كوركەمدىك ءادىس-تاسىلدەرىمەن تانىمال بولعان ۆوزنەسەنسك شىركەۋى – حح عاسىردىڭ باسىنداعى پراۆوسلاۆ اعاش ساۋلەت ونەرىنىڭ وزىق ۇلگىسى.
«بۇل نىسانداردىڭ تىزىمگە بىرگە ۇسىنىلۋى ەلىمىزدە مادەني ارالۋاندىقتىڭ بار ەكەنىن اڭعارتادى. سونداي-اق ورتالىق ازيا ايماعىندا يسلام جانە حريستيان داستۇرلەرىنىڭ ۇيلەسىمدى تۇردە قاتار دامىعانىن, ءبىر-بىرىنە ىقپال ەتۋدىڭ تاريحي تاجىريبەسى قالىپتاسقانىن كورسەتەدى. مەشىت پەن شىركەۋدىڭ الدىن الا تىزىمگە ەنگىزىلۋى – قازاقستاننىڭ مادەني مۇرالارىن ساقتاۋ جانە ولاردى دارىپتەۋ ءىسىنىڭ ماڭىزدى كەزەڭى. بۇل قادام يۋنەسكو-نىڭ راسىمدەرى مەن تالاپتارىنا سايكەس نوميناتسيا قۇجاتتارىن ازىرلەۋگە نەگىز بولادى», دەپ جازدى ە.قارين.