2013 جىلدىڭ ماۋسىم ايىندا ەلىمىزدە ءبىلىم الۋدىڭ قولجەتىمدىلىگىن قامتاماسىز ەتۋ ماقساتىنداعى حالىققا قولداۋ كورسەتۋدىڭ جاڭا باعدارلاماسى – مەملەكەتتىك ءبىلىم بەرۋ جيناقتاۋ جۇيەسى ىسكە قوسىلدى. اتالمىش جۇيە ەلىمىزدە عانا ەمەس, سونداي-اق, شەتەلدە ءبىلىم الۋ ءۇشىن دە قاراجات جيناقتاۋعا مۇمكىندىك بەرەدى.
جۇيە ىسكە قوسىلعان ءبىرىنشى جىلدىڭ قورىتىندىسى ادەتتە مۇنداي جاعدايدا بولاتىن ورىندى قورقىنىش پەن سەنىمسىزدىككە قاراماستان, حالىقتىڭ وسىنداي جيناقتاۋلارعا ۇلكەن قىزىعۋشىلىعى بارىن كورسەتتى.
بۇل جاعدايدا سالىمشىلاردى قىزىقتىراتىن باستى سۇراق – سالىمنىڭ ساقتالۋى جانە كەپىلدىك ماسەلەسى. وكىنىشكە قاراي, بۇل ومىردە ەشكىم ەشنارسەگە ءجۇز پايىز كەپىلدىك بەرە المايدى. ءتىپتى, جولدىڭ ارعى بەتىنە ءوتۋدىڭ ءوزى قاۋىپتى, ايتسە دە ءبىز مۇنى كۇندەلىكتى جاسايمىز. بۇل كۇندەلىكتى قاربالاس ءومىردىڭ تالاپتارى.
وسى رەتتە, زاڭمەن سالىمدى ساقتاۋدىڭ بىرنەشە امالدارى قاراستىرىلعان. اتاپ ايتساق, دەپوزيتتىڭ بۇل ءتۇرى 10 ملن. تەڭگەگە دەيىنگى سومادا جەكە تۇلعالاردىڭ دەپوزيتتەرىن كەپىلدەندىرۋ قورىمەن ساقتاندىرىلعان. سونداي-اق, ينفلياتسيا دەڭگەيى جوعارى بولسا, نەمەسە ەكونوميكادا باسقا دا وزگەرىستەر ورىن العان جاعدايدا بانك سىياقىسى مەن مەملەكەت سىياقىسىنىڭ مولشەرلەمەلەرىن ءوسۋ جاعىنا قاراي قايتا قاراۋ مۇمكىندىگى زاڭمەن كوزدەلگەن.
جالپى, حالىق بولاشاقتا ءبىلىم الۋعا جوسپارلى تۇردە اقشا جيناقتاۋ يدەياسىن وتە جاقسى قابىلدادى. وسىلاي دەۋگە بۇگىندە 11 مىڭعا جۋىق سالىمشىلاردىڭ سانى نەگىز بولا الادى.
قازىردىڭ وزىندە ەلىمىزدىڭ كوپتەگەن تۇرعىندارى مۇنداي دەپوزيتتى اشۋ ءۇشىن وتە از قۇجات قاجەت ەتىلەتىندىگىن بىلەدى. ەگەر ءوز اتىڭىزعا ءبىلىم بەرۋ جيناقتاۋ شوتىن اشقىڭىز كەلسە, وندا قولىڭىزدا جەكە باسىڭىزدى كۋالاندىراتىن قۇجاتىڭىز بولسا جەتكىلىكتى. ال ەگەر شوتتى بالانىڭ اتىنا اشاتىن بولساڭىز, ونىڭ تۋ تۋرالى كۋالىگى مەن جسن قاجەت. بۇل دەپوزيتتى جاس ەرەكشەلىگىنە قاراماستان, قازاقستاننىڭ كەز كەلگەن ازاماتى اشا السا دا, حالىق اراسىندا ول «بالالاردىڭ ءبىلىم الۋىنا ارنالعان شوت (سالىم)» رەتىندە كەڭ تانىمال. سوندىقتان دا, ءوز بالالارىنىڭ بولاشاعىن وتە ەرتە جاستان جوسپارلايتىن اتا-انالار تاراپىنان وعان دەگەن قىزىعۋشىلىق جوعارى.
قاجەتتى قاراجاتتى جيناقتاۋ ءۇشىن وتباسىلىق بيۋدجەتكە ۇلكەن اۋىرتپالىق تۇسىرمەيتىن بەلگىلى ءبىر سومانى سالىمعا سالىپ وتىرۋ كەرەك. ءوزىڭدى نەمەسە پەرزەنتىڭدى جوعارى بىلىممەن قامتاماسىز ەتۋ ءۇشىن وتباسىڭا اۋىر جۇك تۇسىرمەستەن, ءبىلىم بەرۋ جيناقتاۋ سالىمىن رەسىمدەۋ ارقىلى مەملەكەتتىڭ كومەگىمەن قاراجات جيناقتاۋعا بولادى. ول ءۇشىن قاتىسۋشى بانككە بارىپ, مەنەدجەردەن كەڭەس الاسىز. ول سىزگە قاجەتتى سومانى وزىڭىزگە ىڭعايلى مولشەردە, تەز ءارى ءتيىمدى جيناقتاۋدىڭ امالدارىن ەسەپتەپ, تۇسىندىرەدى.
جالپى, بولاشاققا جاقسى نيەتپەن, ۇمىتپەن قاراعان ءاربىر ازامات قازىردەن-اق ءوزىنىڭ جانە ءوز بالالارىنىڭ لايىقتى ءبىلىم الۋىن قامتاماسىز ەتە الادى, سوندىقتان مۇنى ابىرويلى مانساپقا, تابىسقا جانە قوعام تاراپىنان قۇرمەتكە جەتۋدىڭ كەپىلى رەتىندە قاراۋعا ابدەن بولادى.
شاريمان رياد سالىم ۇلى,
«قارجى ورتالىعى» اق ۆيتسە-پرەزيدەنتى.
استانا.