اقش-تىڭ سەنت-لۋيس قالاسىندا ەركىن كۇرەستەن ۇيىمداستىرىلعان RAF 10 تۋرنيرىندە ريزابەك ايتمۇحان امەريكالىق ءاپايتوس حەيدەن زيلمەرمەن كۇش سىناسىپ, 6:4 ەسەبىمەن جەڭىسكە جەتتى. جارىستىڭ باستى بەلدەسۋلەرىندە ارمەنيالىق ارمان تسارۋكيان اقش-تىڭ ارلانى, UFC-ءدىڭ ەكس-چەمپيونى توني فەرگيۋسوندى ايقىن جەڭسە, ءباا-ءنىڭ تۋى استىندا ونەر كورسەتىپ جۇرگەن چەشەن جىگىتى حامزات چيماەۆ پەن تاعى ءبىر امەريكالىق سپورتشى ديللون دەنيس اراسىنداعى ايقاس جاپپاي توبەلەسكە ۇلاستى. باسەكە بارىسىنا ديللون حامزاتتى قىلقىندىرماق بولدى. ال RAF جارىستارىندا ونداي ءتاسىلدى قولدانۋعا قاتاڭ تىيىم سالىنعان. توبەلەس توقتاتىلعاننان كەيىن جەڭىس چيماەۆقا بەرىلدى.
جاقىندا سەربياداعى تۋرنيردە ەڭ ۇزدىك باپكەر دەپ تانىلعان باقىت سارسەكباەۆ كۇنى كەشە عانا سولتۇستىك ماكەدونيادا ءدال سونداي قۇرمەتكە بولەندى. بەيجىڭ وليمپياداسىنىڭ جەڭىمپازى جاتتىقتىرعان ەلىمىزدىڭ جاستار قۇراماسى ميروسلاۆ پەتروۆيچ مەموريالىنىڭ جالپى كوماندالىق ەسەبىندە ءبىرىنشى ورىن الدى. وتاندىق بوكسشىلار اراسىنان ارمان ءمىرسابيت (55 كگ), نۇرمۇحاممەد الدابەرگەن (65 كگ), شامسات لەسباي (75 كگ) باس جۇلدە ولجالادى.
ەل تەننيسشىلەرى قارت قۇرلىقتا وتكەن ءتۇرلى تۋرنيرلەردە باق سىنادى. لوندونداعى دودانىڭ باستى ءفاۆوريتى سانالعان الەمنىڭ ەكىنشى راكەتكاسى ەلەنا رىباكينا شيرەك فينالدان اسا المادى. ول WTA رەيتينگىندە 73-ورىندى ەنشىلەگەن ۇلىبريتانيالىق كەتي بۋلتەردەن 5:7, 6:2, 4:6 ەسەبىمەن ۇتىلدى. الەكساندر بۋبليك شتۋتگارتاعى جارىستىڭ جارتىلاي فينالىندا تەيلور فريتسپەن كۇش سىناستى. وتانداسىمىزدىڭ اتر رەيتينگىندە وزىنەن ەكى ساتى جوعارى تۇرعان اقش تەننيسشىسىنە ءالى جەتپەدى – 4:6, 4:6. الەكساندر شەۆچەنكو براتيسلاۆاداعى باسەكەنىڭ فينالىنا شىقتى. باس جۇلدە ءۇشىن تارتىستا ول جاپونيالىق چينا تارو دانيەلگە ەسە جىبەردى – 6:3, 0:6, 6:7. دميتري پوپكو اقش-تاعى ءتۋرنيردىڭ شيرەك فينالىندا اۋستراليالىق ەنتسو اگياردان ايلاسىن اسىرا المادى – 3:6, 6:7.
فۋتبولدان ەلىمىزدىڭ پرەمەر-ليگاسىنىڭ 13-تۋرىنداعى باستى باسەكە سەمەيدە «ەلىماي» مەن «ورداباسى» اراسىندا ءوتىپ, شىمكەنتتىكتەر جەڭىسكە جەتتى – 1:3. ولاردىڭ باستى قارسىلاسى «قايرات» ءوز الاڭىندا «اتىراۋمەن» تەڭ وينادى – 1:1. نەگىزى ماتچ الماتىلىقتاردىڭ باسىمدىعىمەن ءوتتى. ولار 69-مينۋتقا دەيىن الدا تۇردى. بىراق سول مەزەتتە قاقپاشى تەمىرلان اناربەكوۆتىڭ قاتەلىگىن پايدالانىپ, اياعىنداعى دوپتى تارتىپ العان ايبار ابدۋللا تارازى باسىن تەڭەستىرىپ كەتتى. قالعان ماتچتاردىڭ ناتيجەلەرى مىناداي: «توبىل» – «قىزىلجار» 2:0, «جەتىسۋ» – «وقجەتپەس» 2:2, « ۇلىتاۋ» – «جەڭىس» 2:1, «استانا» – «ەرتىس» 2:0 , «كاسپي» – «قايسار» 1:2, «اقتوبە» – «التاي» 2:0.