ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسىندا «كانيكۋلعا – كىتاپپەن» اتتى وقۋ مارافونىنىڭ سالتاناتتى اشىلۋى ءوتتى. جازعى دەمالىس كەزەڭىندە جاستاردىڭ كىتاپ وقۋعا قىزىعۋشىلىعىن ارتتىرۋدى ماقسات ەتكەن يگى باستاماعا ۋنيۆەرسيتەتتىڭ ءبىلىم الۋشىلارى مەن وقىتۋشى-عالىمدارى قاتىستى.
وقۋ مارافونىنىڭ اشىلۋ راسىمىندە ۋنيۆەرسيتەتتىڭ باسقارما توراعاسى – رەكتور ەرلان سىدىقوۆ ءسوز سويلەپ, كىتاپتىڭ جاستار تاربيەسىندەگى ورنىنا ەرەكشە توقتالدى. ول وقۋ مادەنيەتىن قالىپتاستىرۋ ءبىلىم ساپاسىن ارتتىرۋدىڭ, باسەكەگە قابىلەتتى ۇرپاق تاربيەلەۋدىڭ ماڭىزدى شارتى ەكەنىن اتاپ ءوتتى.
كەيىن ءسوز العان جازۋشى الدان سمايىل كىتاپتىڭ ۇلت رۋحانياتىن ساقتاۋداعى, جاس ۇرپاقتىڭ دۇنيەتانىمىن قالىپتاستىرۋداعى ەرەكشە ءرولىن باياندادى. ول جاستاردى كوركەم ادەبيەتتى تۇراقتى وقۋعا شاقىرىپ, كىتاپ وقۋ مادەنيەتىن دامىتۋ ەلدىڭ ينتەللەكتۋالدىق الەۋەتىن ارتتىرۋدىڭ ماڭىزدى تەتىگى ەكەنىن ايتتى. سونداي-اق قالامگەر قازىرگى اقپاراتتىق داۋىردە ساپالى ادەبيەتتىڭ ماڭىزى بۇرىنعىدان دا ارتا تۇسكەنىن جەتكىزدى.
مارافون ەرەجەسىنە سايكەس قاتىسۋشىلار جاز بويى وزدەرى وقىعان كوركەم ادەبي شىعارمالار تۋرالى الەۋمەتتىك جەلىلەردە پىكىر جازىپ نەمەسە قىسقاشا بەينەروليكتەر جاريالاي الادى. وقىلاتىن كىتاپ سانىنا شەكتەۋ قويىلمايدى. جوبا قورىتىندىسى بويىنشا بەلسەندى قاتىسۋشىلار الداعى قىركۇيەك ايىندا ماراپاتتالادى.
كەش بارىسىندا مادەني باعدارلاما ۇسىنىلدى. بىرنەشە رەسپۋبليكالىق جانە حالىقارالىق بايقاۋلاردىڭ جەڭىمپازى, جاس كۇيشى ەرسۇلتان مەدەت كۇي ونەرىنەن شاشۋ شاشىپ, كورەرمەننىڭ ىستىق ىقىلاسىنا بولەندى.
سونداي-اق عىلىمي كىتاپحانانىڭ ديرەكتورى باقىتجان ورازاليەۆ كىتاپحانانىڭ وقۋ مادەنيەتىن قالىپتاستىرۋ مەن وقىرمان قاۋىمنىڭ رۋحاني سۇرانىسىن قاناعاتتاندىرۋ باعىتىنداعى جۇمىسى تۋرالى ايتتى. كەزدەسۋدە زيالى قاۋىم وكىلدەرى مەن عالىمدار جاستارعا كىتاپ وقۋدىڭ ماڭىزى جونىندە تاعىلىمدى پىكىرلەرىن ورتاعا سالدى.
پوەزيا ءبولىمى دە كوپشىلىكتىڭ كوڭىلىنەن شىقتى. الەۋمەتتىك جەلىدە تانىلىپ جۇرگەن جاس تالانت, قاراوتكەل ورتا مەكتەبىنىڭ وقۋشىسى اسىلاي تولەندى مەن №101 ورتا مەكتەپتىڭ وقۋشىسى بالىم ورازعالي ولەڭ وقىدى. جۇمەكەن ناجىمەدەنوۆتىڭ «اكە مەن بالا» شىعارماسى اسەرلى وقىلىپ, ادەبيەتسۇيەر قاۋىمدى ەرەكشە تولقىتتى.
ءىس-شارانىڭ «مەن ۇسىناتىن كىتاپ» اتتى بولىمىنە فيلولوگيا عىلىمدارىنىڭ دوكتورى, پروفەسسور سەرىك نەگيموۆ جەتەكشىلىك ەتتى. عالىم كىتاپتىڭ ادام ومىرىندەگى ورنى مەن كوركەم ادەبيەتتىڭ تۇلعا قالىپتاستىرۋداعى ءرولى تۋرالى مازمۇندى ويلارىن ورتاعا سالدى. ءوزىنىڭ ءسۇيىپ وقيتىن شىعارمالارى جونىندە اڭگىمەلەپ, جاستارعا رۋحاني ازىق بولاتىن تۋىندىلاردى وقۋعا كەڭەس بەردى.