قازاقستاندا ۇندىستاندىق «دەسيلماكس» دارىلىك پرەپاراتىنىڭ مەديتسينالىق قولدانىسى مەن اينالىمىنا رەسمي تۇردە تىيىم سالىندى. دەنساۋلىق ساقتاۋ مينيسترلىگى جۇرگىزىلگەن ساراپتاما ناتيجەسىنەن كەيىن وسىنداي شەشىم قابىلدادى, دەپ جازادى Egemen.kz.
2026 جىلعى 11 اقپاندا مەديتسينالىق جانە فارماتسەۆتيكالىق باقىلاۋ كوميتەتىنىڭ توراعاسى ارنايى بۇيرىققا قول قويدى. قۇجاتقا سايكەس «دەسيلماكس» تابلەتكالارىن مەديتسينالىق ماقساتتا قولدانۋعا تىيىم سالىنادى. پرەپارات ەل اۋماعىنداعى بارلىق ءدارىحانالاردان كەرى قايتارىلادى.
تىيىم قابىقپەن قاپتالعان, 100 مگ دوزاداعى, 4 تابلەتكادان بليستەرگە سالىنعان, كارتون قوراپتاعى ونىمگە قاتىستى. ءوندىرۋشى – ۇندىستاندىق «ماكلەودس فارماسيۋتيكالز ليميتەد» كومپانياسى. سەرياسى – BSE92301A, جارامدىلىق مەرزىمى – 2026 جىلعى شىلدەگە دەيىن.
شىمكەنت فارماتسەۆتيكاسىنا 39,5 ملرد تەڭگە ينۆەستيتسيا قۇيىلادى
بۇيرىق قول قويىلعان ساتتەن باستاپ كۇشىنە ەندى. ياعني پرەپاراتتى مەديتسينالىق مەكەمەلەردە قولدانۋ مەن ءدارىحانالاردا ساتۋ دەرەۋ توقتاتىلدى.
پرەپاراتتى اينالىمنان الۋ تۋرالى شەشىم ۇلتتىق دارىلىك زاتتار مەن مەديتسينالىق بۇيىمداردى ساراپتاۋ ورتالىعى جاساعان قورىتىندىعا نەگىزدەلگەن.
ءتورت فارماتسەۆتيكالىق زاۋىت سالىنادى
ماماندار بۇل ءدارىنى قابىلداپ جۇرگەن ازاماتتارعا بالامالى ءارى قاۋىپسىز ەم ءتۇرىن تاڭداۋ ءۇشىن دارىگەرگە جۇگىنۋ قاجەتتىگىن ەسكەرتەدى. ءدارىحانا يەلەرى مەن مەديتسينالىق مەكەمەلەر بۇيرىق تالاپتارىن مۇلتىكسىز ورىنداۋعا مىندەتتى. رەسمي تالاپتاردى بۇزعان جاعدايدا زاڭناماعا سايكەس اكىمشىلىك جاۋاپكەرشىلىك قاراستىرىلعان.فارماتسەۆتيكا سالاسىنداعى بىلىق: جالعان قۇجاتپەن مەديتسينالىق جابدىقتار جەتكىزگەن كومپانيا انىقتالدى