قارۋلى كۇشتەرىمىزدىڭ تسيفرلىق ترانسفورماتسياسى – قورعانىس پەن ۇلتتىق قاۋىپسىزدىك سالاسىنداعى مەملەكەتتىك ساياساتتىڭ باسىم باعىتىنىڭ ءبىرى. بۇل جۇمىس قارۋلى كۇشتەردىڭ جوعارعى باس قولباسشىسى – پرەزيدەنت قاسىم-جومارت توقاەۆتىڭ تاپسىرمالارىنا ساي جۇرگىزىلىپ جاتىر, سونداي-اق ارميامىزدىڭ قازىرگى كەزدەگى ءارى بولاشاقتا الدىمىزدان شىعۋى مۇمكىن قاۋىپ-قاتەرلەرگە تيىسىنشە تويتارىس بەرۋى ءۇشىن ونىڭ جاۋىنگەرلىك دايارلىعىن, اسكەردى باسقارۋ جۇيەسىنىڭ ورنىقتىلىعىن ءارى مۇمكىندىكتەرىن ارتتىرۋدىڭ تەتىگى رەتىندە قاراستىرىلىپ وتىر.
قازىرگى الەمدەگى اسكەري-ساياسي احۋالدىڭ جەدەل وزگەرۋى, گەوساياسي تۇراقسىزدىقتىڭ بەلەڭ الۋى, قاقتىعىستىڭ گيبريدتى فورمالارىنىڭ كەڭىنەن تارالۋى مەن اسكەري سالادا تسيفرلىق تەحنولوگيالاردىڭ بەلسەندى ەنگىزىلۋى تسيفرلاندىرۋ ماسەلەسىن ستراتەگيالىق ماڭىزعا يە مىندەت دەڭگەيىنە شىعارىپ وتىر. مەملەكەت باسشىسى بۇگىنگى اسكەرىمىز ءموبيلدى, جوعارى تەحنولوگيالى, وزگەرمەلى جاعدايعا بەيىم بولۋعا, ۋاقتىلى ءارى سەنىمدى دەرەكتەرگە نەگىزدەلگەن باسقارۋ جۇيەسىمەن تولىق قامتاماسىز ەتىلۋگە ءتيىس ەكەنىن ءجيى ايتىپ كەلەدى. بۇل ورايدا تسيفرلىق ترانسفورماتسيا اسكەردىڭ جاۋىنگەرلىك قابىلەتىن ارتتىرۋدىڭ, باسقارۋ تيىمدىلىگىن كۇشەيتۋدىڭ جانە جاڭا سىن-قاتەرلەرگە جەدەل دەن قويۋدىڭ شەشۋشى فاكتورى سانالادى.
قورعانىس مينيسترلىگى اقپاراتتىق تەحنولوگيالار دەپارتامەنتىنىڭ باستىعى, پودپولكوۆنيك بەكجان مىرزاعاليەۆتىڭ ايتۋىنشا, وسى ورايدا قارۋلى كۇشتەردى تسيفرلاندىرۋ قوسالقى باعىت رەتىندە ەمەس, مەملەكەتتىڭ قورعانىس قابىلەتىن نىعايتۋدىڭ, اسكەردى باسقارۋ جۇيەسىنىڭ تيىمدىلىگىن ارتتىرۋدىڭ جانە بارلىق دەڭگەيدە شەشىم قابىلداۋ جۇيەسىن قامتاماسىز ەتۋدىڭ نەگىزگى تەتىكتەرىنىڭ ءبىرى رەتىندە قاراستىرىلىپ وتىر.
«پرەزيدەنت تاپسىرمالارىن ورىنداۋ ماقساتىندا قارۋلى كۇشتەردە اسكەر مەن قارۋ-جاراقتى باسقارۋدىڭ اۆتوماتتاندىرىلعان جۇيەلەرىن قۇرۋ مەن ەنگىزۋدىڭ ۇيىمداستىرۋشىلىق, تەحنيكالىق ءارى نورماتيۆتىك ءىس-شارالار كەشەنى كەزەڭ-كەزەڭىمەن جۇزەگە اسىرىلىپ جاتىر. اتالعان جۇيەلەر بارلىق دەڭگەيدەگى كومانديرلەر مەن شتابتارعا اسكەري-ساياسي جانە اعىمداعى احۋال تۋرالى, كۇشتەر مەن قۇرالداردىڭ قۇرامى, ولاردىڭ دايىندىق دەڭگەيى مەن قامتاماسىز ەتىلۋى جونىندەگى وزەكتى اقپاراتقا جەدەل قول جەتكىزۋ مۇمكىندىگىن بەرەدى», دەيدى پودپولكوۆنيك ب.مىرزاعاليەۆ.
ونىڭ ايتۋىنشا, اۆتوماتتاندىرىلعان باسقارۋ جۇيەلەرىن پايدالانۋ قابىلداناتىن شەشىمدەردىڭ جەدەلدىگىن ارتتىرۋعا, جوسپارلاۋ مەن بۇيرىقتاردى جەتكىزۋ ۋاقىتىن قىسقارتۋعا, بولىمشەلەر ءىس-قيمىلىنىڭ ۇيلەسىمدىلىگىن كۇشەيتۋگە, سونداي-اق ادام فاكتورىنا بايلانىستى تاۋەكەلدەردى تومەندەتۋگە مۇمكىندىك بەرەدى. ناتيجەسىندە, بۇل اسكەرلەردىڭ جاۋىنگەرلىك دايارلىق دەڭگەيى مەن قويىلعان مىندەتتەردى ورىنداۋ قابىلەتىنە تىكەلەي ىقپال ەتەدى.
«كادر دايارلاۋ, اسكەرگە شاقىرۋ مەن جۇمىلدىرۋ ۇدەرىستەرىن تسيفرلاندىرۋ دا – باسىم باعىتتىڭ ءبىرى. جەكە قۇرامدى ەسەپكە الۋدىڭ بىرىڭعاي تسيفرلىق كونتۋرىن قالىپتاستىرۋ دەرەكتەردىڭ تولىقتىعىن, وزەكتىلىگىن جانە شىنايىلىعىن قامتاماسىز ەتۋگە, اسكەري قىزمەت وتكەرۋ راسىمدەرىنىڭ اشىقتىعىن ارتتىرۋعا, سونداي-اق كادرلىق رەسۋرستاردى جوسپارلاۋ تيىمدىلىگىن كۇشەيتۋگە سەپتىگىن تيگىزەدى», دەپ ءتۇسىندىردى قم اقپاراتتىق تەحنولوگيالار دەپارتامەنتىنىڭ باستىعى.
پودپولكوۆنيك ب.مىرزاعاليەۆ لوگيستيكا مەن رەسۋرستاردى باسقارۋدى تسيفرلاندىرۋعا دا ايرىقشا دەن قويىلىپ جاتقانىن ايتتى. بەرىلگەن مالىمەتتەرگە قاراعاندا, قارۋلى كۇشتەردە قارۋ-جاراق پەن اسكەري تەحنيكانى, وق-دارىلەردى, ماتەريالدىق-تەحنيكالىق قۇرالداردى, مەديتسينالىق جانە تىلدىق قامتاماسىز ەتۋدى اۆتوماتتى تۇردە ەسەپكە الۋ جۇيەلەرى كەزەڭ-كەزەڭىمەن ەنگىزىلىپ, ودان ءارى دامىپ جاتىر. مۇنداي ءتاسىل بيۋدجەت قاراجاتىن جۇمساۋدىڭ اشىقتىعىن قامتاماسىز ەتىپ, باقىلاۋدى كۇشەيتەدى ءارى لاۋازىمدى تۇلعالاردىڭ جەكە جاۋاپكەرشىلىگىن ارتتىرادى.
سونداي-اق تسيفرلىق لوگيستيكا جابدىقتاۋ ۇدەرىستەرىن وڭتايلاندىرۋعا, جوسپارلاۋ دالدىگىن ارتتىرۋعا, تەحنيكانى جوندەۋ مەن تەحنيكالىق قىزمەت كورسەتۋگە دەگەن قاجەتتىلىكتى دەر كەزىندە انىقتاۋعا, بۇعان قوسا اسكەرلەردى قامتاماسىز ەتۋ بارىسىندا بەيبىت ۋاقىتتاعى كۇندەلىكتى قىزمەتتە دە, جاۋىنگەرلىك مىندەتتەردى ورىنداۋ كەزىندە دە ىركىلىستەردىڭ تۋىنداۋ ىقتيمالدىعىن تومەندەتۋگە مۇمكىندىك بەرەدى.
سالا ماماندارى تسيفرلىق ترانسفورماتسيا جۇيەسىندە جاساندى ينتەللەكت تەحنولوگيالارىن ەنگىزۋ ەرەكشە ورىن الاتىنىن ايتىپ وتىر. بۇل تەحنولوگيالار باسقارۋشىلىق شەشىمدەردى قولداۋ, تاۋەكەلدەردى باعالاۋ مەن اسكەري نىسانداردى كۇزەتۋ, قورعاۋ تيىمدىلىگىن ارتتىرۋ ماقساتىندا قولدانىلادى.
اۋقىمدى تسيفرلاندىرۋ ۇدەرىسىن جۇزەگە اسىرۋ وسى سالاعا ماماندانعان ءارى بىلىكتى كادرلارسىز مۇمكىن ەمەس ەكەنى بەلگىلى. سوعان بايلانىستى قارۋلى كۇشتەر قاتارىندا زاماناۋي تسيفرلىق بىلىكتىلىككە يە وفيتسەرلەر مەن ماماندار كورپۋسى دايارلانىپ جاتىر. ازاماتتىق IT-سەكتورمەن, وتاندىق سالا ماماندارىمەن جانە عىلىمي ۇيىمدارمەن ءوزارا ءىس-قيمىل جولعا قويىلىپ, قولدانبالى سيپاتتاعى ءبىلىم باعدارلامالارى ەنگىزىلىپ كەلەدى.
«تسيفرلىق مۇمكىندىكتەردى كەڭەيتۋمەن قاتار, ونىڭ تاۋەكەلدەرى دە ەسكەرىلەدى. تسيفرلىق ترانسفورماتسيا كەزىندە سەنىمدى كيبەرقورعانىستى قامتاماسىز ەتۋ مەن تەحنولوگيالىق ەگەمەندىكتى نىعايتۋ ماسەلەلەرى ءبىرىنشى كەزەكتەگى ماڭىزعا يە. وسىلايشا, قارۋلى كۇشتەردىڭ تسيفرلىق مۇمكىندىكتەرىنىڭ دامۋى پرەزيدەنت تاپسىرمالارىن جۇيەلى ءارى دايەكتى ورىنداۋدىڭ ناتيجەسى بولىپ وتىر جانە ول زاماناۋي, ورنىقتى ءارى تەحنولوگيالىق تۇرعىدان دامىعان ارميا قالىپتاستىرۋعا باعىتتالعان ستراتەگيالىق باعىتتى ايقىندايدى», دەيدى ب.مىرزاعاليەۆ.
قورىتا ايتقاندا, ماماندار تسيفرلاندىرۋ ۇدەرىسى اسكەردى باسقارۋدىڭ تيىمدىلىگىن ارتتىرۋدىڭ, قورعانىس جۇيەسىنىڭ ورنىقتىلىعىن قامتاماسىز ەتۋدىڭ, قارۋلى كۇشتەردىڭ قازىرگى جانە بولاشاق سىن-قاتەرلەرگە قارسى تۇرۋى ءۇشىن قابىلەتىن جان-جاقتى ارتتىرۋدىڭ شەشۋشى فاكتورىنا اينالعانىن ءبىراۋىزدان ايتادى. بۇل – زامان كوشىنەن قالىپ قويماي, الدىڭعى قاتارلى ەلدەرمەن بىرگە دامىپ, ىلگەرى باسۋدىڭ بىردەن-ءبىر جولى.