جاز مەزگىلى تۇركىتىلدەس تەاترلار ءۇشىن تابىستى باستالدى. جاقىندا قازان قالاسى تەاتر فەستيۆالىنە قاتىسۋشى قوناقتاردى قارسى الىپ, ساحنا سىنىنىڭ ءحىى ماۋسىمداعى شىمىلدىعىن ءتۇردى.
تۇركىتىلدەس التى مەملەكەت جانە رەسەيدىڭ بىرنەشە ايماعىنان ات ارىلتىپ جەتكەن ونەر كوشى تاتار ەلىنىڭ تورىندە باس قوستى. قازاقستان, تۇركيا, ازەربايجان, قىرعىزستان مەملەكەتتەرىنىڭ جانە التاي رەسپۋبليكاسى, ياكۋتيا, باشقۇرتستان, تاتارستان اۆتونوميالارىنىڭ تەاتر تىنىسىمەن تانىستىرۋشى ۇجىم وكىلدەرى ونەرىن قازان جۇرتشىلىعىنا تارتۋ ەتتى.
ونەرتانۋ عىلىمدارىنىڭ دوكتورى, پروفەسسور, بەلگىلى شەكسپيرتانۋشى مامان الەكسەي بارتوشەۆيچ (ماسكەۋ) توراعالىق ەتكەن ونەر سىنىندا باشقۇرتستان رەسپۋبليكاسىنىڭ ەڭبەك سىڭىرگەن قايراتكەرى, تەاتر سىنشىسى دينا داۆلەتشينا (ۋفا), ونەرتانۋ كانديداتى, پروفەسسور ءسانيا قابديەۆا (الماتى), حالىقارالىق «ناۋرىز» فەستيۆالى كوركەمدىك جەتەكشىسىنىڭ ورىنباسارى, «زولوتايا ماسكا» بۇكىلرەسەيلىك فەستيۆالى ساراپشىلار كەڭەسىنىڭ مۇشەسى, تەاتر سىنشىسى نياز يگلاموۆ, ەكاتەرينبۋرگ مۋنيتسيپالدىق جاس كورەرمەندەر تەاترى ديرەكتورىنىڭ ورىنباسارى ولەگ لوەۆسكي (ەكاتەرينبۋرگ), تەاترتانۋشىلار ەلەنا كوۆالسكايا (ماسكەۋ), كريستينا موتيۆەنكو (ماسكەۋ), نادەجدا ستوەۆا (سانكت-پەتەربۋرگ) سياقتى ءبىر توپ رەسەيلىك ساحنا ماماندارى تۇركىتىلدەس تەاترلارمەن قاتار, قازاق تەاترلارىنىڭ بۇگىنگى اياق الىسى مەن كاسىبي قارىمىنا باعا بەرىپ, فەستيۆال باعدارلاماسىنا ەنگەن قويىلىمداردىڭ كوركەمدىك دەڭگەيىن تالقىعا سالدى.
بيىلعى «ناۋرىز», اسىرەسە, قازاق تەاترلارى ءۇشىن ەرەكشە جاڭالىققا تولى بولدى: ءحىى تەاتر ماۋسىمى تولىعىمەن قازاق ونەرىنىڭ ەرەكشەلىگىن ەكشەپ, ناسيحاتتاۋعا ارنالدى. ەلىمىزدىڭ اتىنان قاتىسقان ءۇش بىردەي ترۋپپا: م.اۋەزوۆ اتىنداعى مەملەكەتتىك اكادەميالىق قازاق دراما تەاترى (الماتى), ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترى (اقتاۋ) جانە استانا قالاسى اكىمدىگىنىڭ «جاستار تەاترى» ۇجىمى ونەرىنە تاتار جۇرتشىلىعى ءتانتى بولىپ, رەسەيلىك سىنشىلار باس ءيدى. اسىرەسە, استانا قالاسى اكىمدىگىنىڭ جاستار تەاترى ساحنالاعان ۋ.شەكسپيردىڭ «اساۋعا – تۇساۋ» كومەدياسى (قويۋشى-رەجيسسەرى قازاقستاننىڭ ەڭبەك سىڭىرگەن قايراتكەرى نۇرقانات جاقىپباي) جاستىق جالىنى, پلاستيكالىق تاپقىر شەشىمى ارقىلى, قويىلىمنىڭ قۋاتتى ديناميكاسىمەن فەستيۆال جاڭالىعىنا اينالدى.
«اساۋعا – تۇساۋ» – جاستار تەاترى ۇجىمىنىڭ تۇتاستاي ترۋپپا بولىپ قاتىسار ءھام ۇجىم ونەرىنىڭ بار مۇمكىندىگى مەن ەرەكشەلىگىن پاش ەتەر بىردەن-ءبىر قويىلىم.
ۇلتتىق قۇندىلىقتارىمىز بەن بۇگىنگى قازاق تەاترىنىڭ تىنىس-تانىمى, دەڭگەي-تالعامىمەن تانىستىرۋ جاۋاپكەرشىلىگىن ارقالاپ جەتكەن ەلوردالىق جاستار تەاترى قازان قالاسىندا وسىلايشا ابىرويلى ونەر كورسەتىپ, ۇلتتىق ونەردىڭ تۋىن جەلبىرەتىپ قايتتى. ءسويتىپ, بەس كۇنگە سوزىلعان ونەر جارمەڭكەسى قازاق تەاترلارى تۋرالى رەسەيلىك كاسىبي مامانداردىڭ سىنى مەن ساليقالى ساراپتاماسىنا قانىعىپ, تۇركى الەمى تەاترلارىنىڭ نەمەن تىنىستاپ جاتقاندىعىن سەزىنىپ-بىلۋگە, تالداپ-تارازىلاۋعا مول مۇمكىندىك تۋعىزىپ بەردى. وسى ارقىلى فەستيۆال تۇركىتىلدەس حالىقتاردىڭ ءتىلى مەن دىلىنە جاڭاشا تىنىس اشىپ, ۇلتتار اراسىنداعى مادەنيەت پەن ءداستۇر الماستىعىنا تىڭ سەرپىن سىيلادى. باستىسى, تۇركى حالىقتارىنا ورتاق مادەنيەت مەرەكەسىندە ءتۇبى ءبىر تۇركى اعايىندار قازاق ونەرىنىڭ قارىمدى اياق الىسىنا ءتانتى بولىپ تارقاستى.
نازەركە جۇماباي,
تەاترتانۋشى.
استانا – قازان – استانا.