ميحايل شايدوروۆ – وليمپيادا چەمپيونى!

جەتى بىردەي قىسقى وليمپيادا دوداسىندا بۇيىرماي كەلگەن التىن مەدال ەنشىمىزگە جازىلدى. جاھان­نىڭ جامپوزدارى كوكسۇڭگى مۇزدىڭ ۇستىندە قازاق سپورتشىسىمەن شەندەسە الماي, تالانتىنا ءتانتى بول­­دى. XXV قىسقى وليمپيا ويىن­دارى­ن­دا مانەرلەپ سىرعاناۋدان ەرلەر ارا­سىنداعى سايىس اسا تارتىس­تى ءوتتى.

الدىمەن قىسقا باعدارلامادا الەمنىڭ تاڭداۋلى مايتالمان مانەرلەپ سىرعاناۋشىلارى ايدىنعا شىقتى. جەرلەسىمىز ميحايل شايدوروۆتىڭ ونەرىن قازىلار القاسى 5-ورىنعا لايىق دەپ سانادى. قىسقا باعدارلامادا امەريكالىق يليا مالينين 108,16 ۇپايدى قانجىعاسىنا بوكتەرىپ, تالاسسىز كوشباسشى ەكەنىن اڭعارتتى. ءارى ول 1976 جىلدان 2024 جىلعا دەيىن تىيىم سالىنعان ارتقا سالتو جاسايتىن اسا قاتەرلى ەلەمەنتتى مۇلتىكسىز ورىندادى. قىسقا باعدارلامادا 2-ورىنعا جاپون ءۇمىتى يۋما كاگياما (103,07 ۇپاي) جايعاسسا, فرانتسيالىق ادام سياو حيم فا 102,55 ۇپاي ولجالاپ, ۇزدىك ۇشتىكتى تۇيىندەدى. يتاليا ەلى ءۇمىت ارتقان دانيەل گراسسل 93,46 ۇپايمەن 4-ساتىعا جايعاستى.

ساراپشىلار ەكى دۇركىن الەم چەمپيونى, ءتورت قۇرلىق دوداسى, گران-پري كەزەڭدەرىندە الدىنا قارا سالماي توپ جارىپ جۇرگەن ءمالينيننىڭ مەرەيى ۇستەم تۇسەدى دەپ تون ءپىشتى. ويتكەنى ەركىن باعدارلاما سايى­سى باستالماس بۇرىن يليا مالينين ءتورت اينالىم ەلەمەنتىن ءبىر ەمەس جەتى مارتە جۇزەگە اسىرادى دەگەن بولجام ايتىلدى. يۋما كاگياما مەن ادام سيا حيم فا ءتورت رەت ءتورت اينالىم ەلەمەنتىن ورىندايمىن دەپ جوسپار ءتۇزدى. م.شايدوروۆ تا ەركىن باعدارلامادا وسى ەلەمەنتتى ورىنداۋدى جوسپارلادى. ول ءبىرىنشى ەلەمەنتىن وتە مۇلتىكسىز ورىندادى. ياعني ءۇش اينالىم اكسەل ورىنداعان سوڭ بىردەن ءۇزىلىسسىز ءتورت اينالىم سالحوۆ ەلەمەنتىن جالعاپ سەكىرۋ ءادىسىن تەك شايدوروۆ قانا جۇزەگە اسىرا الدى. ءسويتىپ, نەگىزگى باعدارلاماسىن وتە ءساتتى اياقتاپ, 198,64 ۇپايدى ەنشىسىنە جازدى. اۋەل باستا ءتورت اينالىم ەلەمەنتىن ءتورت مارتە جاسايمىن دەگەن جەرلەسىمىز ايدىنعا ايبىندانىپ شىعىپ, بەس رەت ءتورت اينالىم ەلەمەنتىن, ودان كەيىن ءۇش اينالىم اكسەلگە ءتورت اينالىم سالحوۆ ەلەمەنتىن قوسا ءساتتى ورىندادى. وليمپيادا الامانىنا قاتىسقان مانەرلەپ سىرعاناۋشىلاردىڭ ەشبىرى بۇل ەلەمەنتتى قايتالاي العان جوق. قوس باعدارلامادا 291,58 ۇپاي ولجالاعان وتانداسىمىز تالاسسىز مەدال الاتىندار ساناتىنا قوسىلدى. شايدوروۆ ەركىن باعدارلامادا قازاقستاننىڭ حالىق ءارتىسى ديماش قۇدايبەرگەننىڭ ورىن­داۋىنداعى تۋىندىنىڭ اۋەنىمەن ونەر كورسەتتى.

نەگىزگى باعدارلاماسىن ورىنداۋ كەزىندە سۇرىنگەن ادام سيا حيم فا مەن يۋما كاگياما التىن جۇلدەدەن قا­عىلدى. باستى باسەكەلەسى يليا مالينين دە ەركىن باعدارلاما بارىسىندا ەكى رەت قۇلاپ, باسقا ەلەمەنتتەردى دە ويداعىداي ورىنداي المادى. ناتيجەسىندە, قوس سايىس­تىڭ قورىتىندىسىندا 8-ورىنعا ءبىر-اق سىرعىدى. ەكىنشى, ءۇشىنشى ورىندارعا يۋما كاگياما مەن تاعى ءبىر جاپوندىق سپورتشى شۋن ساتو يە بولدى.

بىلتىر 20 جاسىندا الەم چەمپيوناتىنان كۇمىس, ءتورت قۇرلىق الامانىنان التىن مەدال ولجالاعان ميحايلدىڭ جارقىن جەڭىسى كەزدەيسوق تابىس ەمەس, بۇل – التى جاسىندا اكەسى ستانيسلاۆ شايدوروۆتىڭ باعىتتاۋىمەن مۇز سارايىنا كەلگەن بالانىڭ تاباندى ەڭبەگى مەن توككەن تەرىنىڭ وتەۋى. ەلىمىزدە مانەرلەپ سىر­عاناۋ مەكتەبىنىڭ ىرگەسى مىعىم ەكەنىن 2014 جىلى سوچي وليمپياداسىندا دەنيس تەن ايگىلەپ, قولا مەدال ەنشى­لەگەن-ءدى. جاھاندىق دودالاردان دا العان جۇلدەمىز از ەمەس.

1994 جىلى ليللەحاممەر (نورۆەگيا) وليمپياداسىندا شاڭعى سپورتىنان ۆلاديمير سميرنوۆ التىن مەدال يەلەنىپ, ءانۇرانىمىزدى شىر­قاتقان ەدى. ارادا 32 جىل وتكەندە اق الاماننىڭ تو­رىندە مەرەيىمىزدى تاسىتقان ميحايل شايدوروۆ قانداي سىي-قۇرمەتكە دە لايىق.

تۋريزم جانە سپورت ءمينيسترى ەربول مىرزابوسىنوۆ تالانتتى سپورتشىنى تاريحي جەتىستىگىمەن قۇتتىقتاپ, زور تابىس تىلەدى.

بۇگىندە شەتەلدىك اقپارات قۇرالدارىنىڭ نازارىندا دا – شايدوروۆ ەسىمى. ءميحايلدىڭ جەڭىسىن وليمپيادانىڭ سەن­ساتسيا­سى دەپ باعالاپ, قازاق سپورت­­شى­سىنىڭ فەنومەنىنە تاڭداي قاعىپ جاتىر بارشا الەم حالقى.

مانەرلەپ سىرعاناۋدان ليللەحاممەر قىسقى وليم­پياداسىنىڭ چەمپيونى الەكسەي ۋرمانوۆتان ءتالىم الاتىن ميحايل تولايىم تابىسىنا العاشىندا سەنە الماعانىن دا جاسىرمادى. «شىنىمدى ايتسام, بۇعان سەنە المادىم. ويتكەنى بۇكىل ماۋسىم بويى ءوز-وزىممەن كۇرەستىم, كەم-كەتىكتى بۇتىندەۋگە ۇمتىلدىم. بۇرناعى جارىس­تاردا بەس رەت تورتتىك سەكىرۋدى ورىنداۋعا تىرىسقانىممەن جۇزەگە اسىرا الماي كەلگەن ەدىم. وليمپيادا ايدىنىندا ءبارى ساتىمەن ىسكە استى. بارشا جانكۇيەرگە ال­عىسىم شەكسىز, بۇل ءبىزدىڭ ورتاق جەتىستىگىمىز», دەدى التىن ازامات.