اقتوبەدە اپتاپ ىستىق ۇرىپ تۇر. سوڭعى ەكى اپتانىڭ ىشىندە ودان زارداپ شەككەن 11 ادام اۋرۋحاناعا تۇسكەن. جەدەل جاردەم بەكەتى باس دارىگەرىنىڭ ورىنباسارى داستان نيەتاليەۆتىڭ ايتۋىنشا, زارداپ شەككەندەردىڭ 6-ۋى بالا ەكەن. ال, ۇلكەندەر جاعى ساياجايدا جۇمىس ىستەپ, كۇن وتكىزىپ العان. سونداي-اق, كۇنى بويى سۋعا تۇسكەن ەكى بالا دا مەديتسينالىق جەدەل جاردەم كومەگىنە جۇگىنۋگە ءماجبۇر بولعان.
سينوپتيكتەر اپتاپ ىستىقتىڭ لەبى ماۋسىم ايىنىڭ اياعىنا دەيىن باسىلمايتىنىن ايتادى. «قازگيدرومەتتىڭ» اقتوبە فيليالىنىڭ ينجەنەر-سينوپتيگى ناتاليا سينگەرەۆانىڭ ءمالىمدەۋىنشە, ىستىق ماۋسىم ايىنىڭ اياعىنا دەيىن بىرتىندەپ كوتەرىلە بەرەتىن سىڭايلى. كۇننىڭ قىزۋى وبلىستىڭ كەي جەرلەرىندە 42 گرادۋسقا دەيىن جەتەدى دەگەن بولجام بار.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.