جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى بەيجىڭ ورمان شارۋاشىلىعى ۋنيۆەرسيتەتىمەن ءوزارا ىنتىماقتاستىق تۋرالى مەموراندۋمعا قول قويدى. ەندى قىتاي عالىمدارى ورالعا كەلىپ, قازاقستان عالىمدارىنىڭ عىلىمي جوباسىمەن تانىسىپ ءجۇر.
ەكى ەلدىڭ ۋنيۆەرسيتەتتەرى اراسىندا عىلىمي ىزدەنىستى ۇشتاستىرىپ, ءبىلىم جانە عىلىمي زەرتتەۋ رەسۋرستارىن دامىتۋعا باعىتتالعان ۋاعدالاستىق اياسىندا ورالعا بەيجىڭ ورمان شارۋاشىلىعى ۋنيۆەرسيتەتىنىڭ قاۋىمداستىرىلعان پروفەسسورى سينحۋ تسين جۇمىس ساپارىمەن كەلدى. عالىم باتىسقازاقستاندىق ارىپتەستەرىمەن حالىقارالىق دەڭگەيدە بايلانىس ورناتىپ, بىرلەسە عىلىمي زەرتتەۋ جۇرگىزۋگە, تاجىريبە الماسىپ, تاعىلىمداما ۇيىمداستىرۋعا مۇددەلى ەكەنىن ايتادى. قىتاي پروفەسسورى باتىس قازاقستان اگرارلىق-تەحنيكالىق ۋنيۆەرسيتەتىنىڭ زەرتحانالارىن ارالاپ, وقۋ ورنىنىڭ عىلىمي الەۋەتىمەن دە تانىستى.
قىتايلىق عالىمدى ۋنيۆەرسيتەت رەكتورى اسقار نامەتوۆ, عىلىم جونىندەگى پرورەكتور ءالجان ءشامشىدىن, عىلىم جانە تەحنولوگيالاردى كوممەرتسيالاندىرۋ دەپارتامەنتىنىڭ ديرەكتورى ينديرا بەيشوۆا قابىلداپ, حالىقارالىق ىنتىماقتاستىق بويىنشا ءىس-شارالاردى زەردەلەدى. سينحۋ تسين مەموراندۋم شەڭبەرىندە دوكتورانتتار مەن ماگيسترانتتارعا «ماشينالىق وقىتۋ جانە پوپۋلياتسيالىق گەنەتيكا ادىستەرىن قولدانۋ ارقىلى بيوالۋانتۇرلىلىكتى ساقتاۋدى كۇشەيتۋ» تاقىرىبىندا ءدارىس وقىدى.
وسى ساپاردا سينحۋ تسين ۆەتەريناريا عىلىمدارىنىڭ دوكتورى, پروفەسسور قايسار كوشاليەۆتىڭ عىلىمي مەكتەبىنەن ءتالىم العان شاكىرتتەرىمەن كەزدەستى. قىتاي پروفەسسورى بىرنەشە باعىتتا عىلىمي زەرتتەۋ جوبالارىمەن اينالىسىپ جۇرگەن بقاتۋ عالىمدارىنىڭ ىزدەنىسىنە ەرەكشە نازار اۋداردى. بولاشاقتا بىرلەسە ەڭبەكتەنۋگە, ۇلكەن جوبالاردى بىرگە جۇزەگە اسىرۋعا نيەت ءبىلدىرىپ, بەيجىڭ ۋنيۆەرسيتەتىندە تاعىلىمدامادان وتۋگە شاقىردى.
ايتا كەتەيىك, بەيجىڭ ۋنيۆەرسيتەتى عالىمدارى جاڭگىر حان ۋنيۆەرسيتەتىنىڭ كيىكتى قولعا ۇيرەتۋ جوباسىنا كوپتەن نازار اۋدارىپ كەلەدى. بىلتىر قازان ايىندا بقاتۋ عالىمدارى قايسار كوشاليەۆ پەن ۆاديم ۋليانوۆ كورشى ەلگە ارنايى شاقىرتۋمەن بارىپ قايتقان ەدى.
«قازاقستان پرەزيدەنتى قىتايعا 1 500 باس كيىك بەرۋ جونىندە شەشىم قابىلدادى. وتكەن جىلى ۋنيۆەرسيتەتىمىزگە كەلگەن ەلىمىزدىڭ قوس عالىمى كيىكتى قولعا ۇستاۋ, ولارعا عىلىمي زەرتتەۋ جۇرگىزۋ بويىنشا تاجىريبەسىن ايتىپ بەرگەن ەدى. وسى جولى كيىكتى ءوز كوزىممەن كوردىم. بۇل جانۋار ەرتەرەكتە قىتايدا دا بولعان, بىراق قازىر كەزدەسپەيدى. الەم بويىنشا ازايىپ كەتكەن بۇل جانۋاردى قورعاۋ ىسىنە ءبىز دە اتسالىسساق دەيمىز. جالپى كيىك – كۇنىنە 80 شاقىرىمعا دەيىن جوڭكىلىپ جايىلاتىن, ءوزىن-ءوزى ەمدەپ الاتىن قىزىق جانۋار عوي. ولاردىڭ سانىن تابيعات ءوزى رەتتەپ وتىرادى. عالىم رەتىندە وسى ماسەلەگە قىزىعىپ, زەرتتەپ ءجۇرمىن. بۇدان ءارى جاڭگىر حان ۋنيۆەرسيتەتىمەن حالىقارالىق دەڭگەيدە عىلىمي ىنتىماقتاستىق ورناتىپ, بىرگە جۇمىس ىستەۋگە نيەتتىمىز», دەدى قىتايلىق عالىم.
باتىس قازاقستان وبلىسى