مەملەكەت باسشىسى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆتى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
اسقاربەك ەرتاەۆ پرەزيدەنتكە ۆەدومستۆو قىزمەتىنىڭ بيىلعى باسىم باعىتتارى جونىندە بايانداپ, حالىقتى جۇمىسپەن قامتۋ جوسپارى تۋرالى مالىمەت بەردى.
مينيستر بۇل باعىتتا ۋاقىتشا شارالاردان گورى تۇراقتى جانە ساپالى جۇمىس ورىندارىن اشۋ, ەڭبەك ۇتقىرلىعىن ارتتىرۋ جانە ءبىلىم بەرۋ جۇيەسى مەن نارىق سۇرانىسى اراسىندا تىعىز بايلانىس ورناتۋ جوسپارلانىپ وتىرعانىن ايتتى. جاستاردى, سونىڭ ىشىندە NEET ساناتىنداعى ازاماتتاردى جۇمىسپەن قامتۋعا باسا ءمان بەرىلەدى.
سونداي-اق اسقاربەك ەرتاەۆ اتاۋلى الەۋمەتتىك كومەك جۇيەسىن ودان ءارى جەتىلدىرۋ جوسپارىن دا تانىستىردى.
مينيسترلىك تسيفرلىق باعالاۋ قۇرالدارى ارقىلى قولداۋ شارالارىنىڭ ناقتى ادرەسىنە جەتۋ مۇمكىندىگىن كەڭەيتۋگە نيەتتى. سونىمەن قاتار كومەك الاتىن ءارى ەڭبەككە جارامدى ازاماتتاردى مىندەتتى تۇردە جۇمىسپەن قامتي وتىرىپ, الەۋمەتتىك كەلىسىمشارت تاجىريبەسىن كەڭەيتۋدى كوزدەپ وتىر.
مينيستر پرەزيدەنتكە زەينەتاقى جۇيەسىنىڭ ۇزاق مەرزىمدى تۇراقتىلىعىن قامتاماسىز ەتۋ جانە زەينەتاقى تولەمدەرىنىڭ لايىقتى دەڭگەيىن ساقتاۋ جونىندە دە مالىمەت بەردى.
مۇگەدەكتىگى بار تۇلعالاردى الەۋمەتتىك تۇرعىدان قورعاۋ ماسەلەلەرىنە باسا نازار اۋدارىلدى. مينيسترلىك ارناۋلى الەۋمەتتىك قىزمەتتەردى جان باسىنا قاراي قارجىلاندىرۋ تەتىگىن ودان ءارى دامىتۋدى, ولاردىڭ ساپا ستاندارتتارىن ارتتىرۋدى, وڭالتۋ قىزمەتتەرى مەن تەحنيكالىق قۇرالداردى قولجەتىمدى ەتۋدى جوسپارلاپ وتىر. سونىمەن قاتار ينكليۋزيۆتى جۇمىس ورىندارىن اشۋعا دەن قويادى.
ەڭبەك جانە حالىقتى الەۋمەتتىك قورعاۋ ءمينيسترى تاعايىندالدى
سونداي-اق كوشى-قون ساياساتىنىڭ 2030 جىلعا دەيىنگى تۇجىرىمداماسىن ىسكە اسىرۋ جونىندەگى ءىس-قيمىل جوسپارى جايىندا اقپارات بەرىلدى.
كوشى-قون ۇدەرىسىن باسقارۋ جانە بولجاۋ دەڭگەيىن جاقسارتۋ, ىشكى ميگراتسيانى تەڭگەرىمدى جۇرگىزۋ, ەلدەگى ەڭبەك نارىعىن قورعاۋعا باسىمدىق بەرە وتىرىپ, ەڭبەك كوشى-قونىن رەتتەۋدى جەتىلدىرۋ كوزدەلگەن.
مەملەكەت باسشىسى اسقاربەك ەرتاەۆقا حالىقتى جۇمىسپەن قامتۋ, ازاماتتاردىڭ تابىسىن ۇلعايتۋ, الەۋمەتتىك قولداۋدىڭ شىن مۇقتاج جاندارعا جەتۋىن باقىلاۋدى كۇشەيتۋ, زەينەتاقى جۇيەسىن جەتىلدىرۋ, تەڭگەرىمدى كوشى-قون ساياساتىن ىسكە اسىرۋ, الەۋمەتتىك قورعاۋدا ينكليۋزيۆتى تاسىلدەردى دامىتۋ, سونداي-اق تسيفرلىق شەشىمدەردى قولدانۋ ارقىلى ەڭبەكتى قورعاۋ جۇيەسىن نىعايتۋ جانە قاۋىپ-قاتەرلەردىڭ الدىن الۋ بويىنشا بىرقاتار تاپسىرما بەردى.