پاۆلوداردا جاياۋ جۇرگىنشىلەر وتكەلىندە 13 جاستاعى ءجاسوسپىرىم قازا تاپتى. قايعىلى وقيعا 6 اقپان كۇنى كەشكە «يابلونكا» باۋ-باقشاسىنىڭ اۋماعىندا بولدى. جولدان ءوتىپ بارا جاتقان جەتكىنشەكتى كولىك قاعىپ كەتكەن, دەپ جازادى Egemen.kz.
مارقۇمنىڭ اتى-ءجونى – ءامىر جامبىل. قازىر بالانىڭ تۋىستارى وقيعا كۋاگەرلەرىن ىزدەپ جاتىر. ولاردىڭ ايتۋىنشا, ءبىر كولىك توقتاپ, بالانى وتكىزىپ جىبەرگەنىمەن, ارتقى جاقتان كەلگەن كروسسوۆەر توقتاماي سوققان.
«جۇرگىزۋشى ۇستالدى. بىراق ءبىز ءىستىڭ بارلىق ءمان-جايى انىقتالعانىن قالايمىز. كامەراداعى جازبالار شىندىقتى اشۋعا كومەكتەسۋى مۇمكىن», دەيدى جاقىندارى.
وقيعا ورنىندا بولعان وڭىرلىك بالا قۇقىقتارى جونىندەگى ۋاكىل ساۋلە شاكەنەۆا بۇل اۋماقتىڭ بۇرىننان قاۋىپتى ەكەنىن ايتتى. اتالعان جول – رەسپۋبليكالىق ماڭىزداعى تاسجولدىڭ بولىگى. تۇرعىندار مۇندا كولىكتەر توقتاماي وتەتىنىن, ال جاياۋ جۇرگىنشىلەردىڭ ءومىرى كۇن سايىن قاتەرگە تىگىلىپ جاتقانىن جەتكىزدى.
جول-كولىك وقيعاسىن ازايتۋدىڭ ءبىر شاراسى
«جول بويىنداعى قورشاۋلار جۇرگىزۋشىلەرگە بۇل جەردى جىلدام جۇرەتىن تاسجول سياقتى كورسەتەدى. جاياۋ جۇرگىنشى وتكەلى بار ەكەنىن ەلەمەيتىندەر كوپ. كامەرالار ايىپپۇل سالعانىمەن, ادام ءومىرىن قورعاي الماي وتىر. بىزگە باتىرماسى بار باعدارشام قاجەت», دەيدى تۇرعىندار.
بۇل اۋماقتا 500-گە جۋىق ءۇي بار, جۇزدەن استام بالا كۇن سايىن وسى جولدى كەسىپ وتەدى. جەرگىلىكتى حالىق بىرنەشە رەت جاۋاپتى مەكەمەلەرگە جۇگىنگەنىن, بىراق ماسەلە ءسوز جۇزىندە قالىپ وتىرعانىن ايتادى.
«مۇندا ەرەسەك ادامنىڭ ءوزى قاۋىپتەنەدى. ال بالا ءۇشىن بۇل وتكەل – ناعىز قاتەر. باعدارشام قويىلمايىنشا, مۇنداي جاعداي قايتالانا بەرەدى», دەدى ساۋلە شاكەنەۆا.
ول وسى ماسەلەنى شەشۋ جونىندە حاسار حابىلبەكوۆكە ۇندەۋ جولداعان.
ءامىر جامبىل كوپبالالى وتباسىنداعى كەنجە بالا ەدى. ونى كولىك ۇيىنە جاقىن جەردە قاعىپ كەتكەن. پوليتسيا بۇل دەرەك بويىنشا قىلمىستىق ءىس قوزعادى. الدىن الا مالىمەتكە سايكەس, Jac ماركالى كولىكتىڭ جۇرگىزۋشىسى بالانى قاعىپ كەتكەن. ءجاسوسپىرىم العان جاراقاتىنان اۋرۋحانادا كوز جۇمدى.
قازاقستاندا باعدارشام ءتارتىبى وزگەرەدى: نەنى ءبىلۋ كەرەك؟
قازىرگى تاڭدا كولىك ارنايى تۇراققا قويىلىپ, وقيعانىڭ سەبەپتەرى انىقتالىپ جاتىر. تۇرعىندار بولسا, كەزەكتى ۋادە ەمەس, ناقتى شەشىم قاجەت ەكەنىن ايتىپ وتىر.
بۇدان ەكى اي بۇرىن ءدال وسى پاۆلوداردا ەكى جۇرگىزۋشى جول-كولىك اپاتىنان كوز جۇمعانىن جازعان ەدىك.