ۇكىمەتتە پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ توراعالىعىمەن شىعىس قازاقستان وبلىسىنىڭ الەۋمەتتىك سالاسىن دامىتۋ ماسەلەلەرى بويىنشا كەزدەسۋ ءوتتى. جيىنعا سالالىق مينيسترلىكتەردىڭ باسشىلارى مەن وكىلدەرى, سونداي-اق وبلىس اكىمى نۇرىمبەت ساقتاعانوۆ قاتىستى.
شىعىس قازاقستان وبلىسى وتكەن جىلى انا ءولىمى تىركەلمەگەن ساناۋلى وڭىرلەردىڭ قاتارىندا اتالدى. سونىمەن قاتار وڭىردە مەديتسينالىق كادرلاردىڭ تاپشىلىعىنا بايلانىستى بىرقاتار جۇيەلى ماسەلەلەر بار ەكەنى, سونداي-اق ءبىر جاسقا دەيىنگى بالالاردى ۆاكتسيناتسيالاۋ بويىنشا بەلگىلەنگەن كورسەتكىشتىڭ تولىق ورىندالماعانى ايتىلدى.
وبلىستا عىلىمدى دامىتۋ ماسەلەسىنە دە ەرەكشە نازار اۋدارىلدى. بۇل سالادا ايتارلىقتاي ناتيجە بار. اتاپ ايتقاندا, 664 عىلىمي جۇمىس جاريالانىپ, 67 ازىرلەمە وندىرىسكە ەنگىزىلگەن. وڭىردە وڭدەۋشى ونەركاسىپكە ارنالعان كوبالتسىز قاتتى قورىتپالار ازىرلەنىپ جاتىر, سونداي-اق تراۆماتولوگيا مەن ورتوپەديادا قولدانىلىپ جاتقان 20-دان استام مەديتسينالىق يمپلانتات ءتۇرى جاسالادى.
سونىمەن قاتار وبلىستا ورتا ءبىلىم بەرۋ ساپاسىن ارتتىرۋعا باعىتتالعان جۇمىستى كۇشەيتۋ قاجەتتىگى اتاپ ءوتىلدى. وڭىردە ەرەكشە نازار اۋدارۋدى تالاپ ەتەتىن باسىم باعىتتار ايقىندالىپ, سونىڭ ىشىندە وقۋشىلاردىڭ وقۋ, ماتەماتيكالىق جانە جاراتىلىستانۋ-عىلىمي ساۋاتتىلىعىن جۇيەلى تۇردە دامىتۋ جۇمىستارىن جانداندىرۋ قاجەتتىگى كورسەتىلدى.
ەڭبەك جانە حالىقتى الەۋمەتتىك قورعاۋ مينيسترلىگى دەرەكتەرىنە سايكەس, وڭىردە جۇمىسسىزدار سانى, ونىڭ ىشىندە جاستار اراسىنداعى جۇمىسسىزدىقتىڭ ارتقانى بايقالادى. وندىرىستىك جاراقاتتانۋ ماسەلەلەرى دە وزەكتى بولىپ وتىر.
وڭىردە تۋريستىك ينفراقۇرىلىمدى, ناۆيگاتسيا مەن سالانى اقپاراتتىق قولداۋدى, سونداي-اق ينكليۋزيۆتى سپورتتى دامىتۋ قوسىمشا نازار اۋدارۋدى قاجەت ەتەدى.
جيىن قورىتىندىسى بويىنشا ايدا بالاەۆا الەۋمەتتىك سالادا كورسەتىلەتىن قىزمەتتەردىڭ ساپاسىن ارتتىرۋ, حالىق اراسىندا اقپاراتتىق-ءتۇسىندىرۋ جۇمىستارىن كۇشەيتۋ مەن ۆەدومستۆوارالىق ءوزارا ءىس-قيمىلدى جولعا قويۋ جونىندە ناقتى تاپسىرمالار بەردى.