«اتامەكەن» ۇلتتىق كاسىپكەرلىك پالاتاسىنىڭ رەيتينگى بويىنشا ۇلىتاۋ وبلىسى شاعىن بيزنەس پەن ورتا كاسىپكەرلىكپەن اينالىسۋعا قولايلى ءۇش ءوڭىردىڭ قاتارىنا كىردى. ۇلىتاۋلىق 195 جاس كاسىپكەرگە قايتارىمسىز گرانت قاراجاتى بەرىلدى.
قايتارىمسىز گرانت كولەمى بيزنەس جوبانىڭ اتقاراتىن قىزمەتىنە قاراي 1 ملن تەڭگەدەن – 7 ملن تەڭگە ارالىعىن قۇرايدى. قارجى جاستاردىڭ بيزنەس باستامالارىن ىنتالاندىرىپ, جاڭا كاسىپ اشۋعا نەمەسە جۇمىس ىستەپ تۇرعان كاسىپتى كەڭەيتۋگە باعىتتالادى. بىلتىر بولىنگەن قارجىنىڭ جالپى كولەمى 300 ملن تەڭگە بولدى.
جاقىندا ۇلىتاۋ وبلىسى اكىمىنىڭ ورىنباسارى نۇرتاس كارىپباەۆتىڭ قاتىسۋىمەن وتكەن كەڭەستە كاسىپكەرلىكتى, سونىڭ ىشىندە جاس بيزنەس يەلەرىن قولداۋ شارالارى تالقىلانىپ, ينۆەستيتسيالىق جوبالاردى ىسكە اسىرۋ ماسەلەلەرى ءسوز بولدى.
ن.كارىپباەۆتىڭ ايتۋىنشا, وبلىستا مەملەكەت قولداۋىنا يە بولعان جاس كاسىپكەرلەر سانى ارتىپ كەلەدى. ولاردىڭ باسىم بولىگى اۋىلدىق جەردە تۇرادى. گرانت يەگەرلەرى قۇرال-جابدىقتار ساتىپ الىپ, كاسىپتەرىن كەڭەيتۋگە قام جاساپ جاتىر.
سونىڭ ءبىرى – جەزدى كەنتىنىڭ تۇرعىنى گۇلنۇر جانالينوۆا. ول تۇراتىن كەنتتە وسىعان دەيىن ناۋبايحانا بولماي, جەرگىلىكتى تۇرعىندار نان ونىمدەرىن وزدەرى قولدان جاسايتىن نەمەسە جەزقازعان قالاسىنان اكەلەتىن ەدى.
گ.جانالينوۆا بىلتىر وبلىستىق گرانتتان 2,5 ملن تەڭگە ۇتىپ الىپ, شاعىن ناۋبايحانا اشتى. نان اشىتاتىن اپپارات, ەلەكتر پەش ساتىپ الدى. قازىر ول كۇنىنە 500 بولكە نان ءپىسىرىپ, مەكەمەلەرگە, دۇكەندەرگە جەتكىزىپ تۇرادى. قاراماعىندا التى ادام جۇمىس ىستەيدى.
«بيىل قايتارىمسىز گرانت مولشەرى بىلتىرعىدان جوعارى بولادى. سەبەبى وبلىستا كاسىپكەرلىك سالاسىندا تۇراقتى ءوسىم بايقالعاندىقتان 400 ملن تەڭگە كولەمىندە قايتارىمسىز گرانت ءبولىنۋ جوسپارلانىپ وتىر. بۇل قاراجات ءوڭىردىڭ كاسىپكەرلىك الەۋەتىن ارتتىرۋعا باعىتتالادى», دەيدى ۇلىتاۋ وبلىستىق كاسىپكەرلىك جانە ونەركاسىپ باسقارماسىنىڭ ءبولىم باسشىسى نۇرجان ساعىندىق.
مامانداردىڭ ايتۋىنشا, بيىل گرانتقا ءوتىنىش بەرۋ كەزىندە ءىت جانە تۋريزم سالالارىنا باسىمدىق بەرىلەدى.
ۇلىتاۋ وبلىسى