قحپ ورتالىق كەڭسەسىندە جاڭا كونستيتۋتسيا جوباسىنا ارنالعان اشىق پىكىرتالاس ءوتتى. ءىس-شارا پارتيا مەكتەبىنىڭ كوپشىلىك الدىندا پىكىر ايتۋ مادەنيەتىن قالىپتاستىرۋعا باعىتتالعان الاڭىندا ۇيىمداستىرىلىپ, وعان پارتيا بەلسەندىلەرى قاتىستى, دەپ جازادى Egemen.kz.
پىكىرتالاس فورماتى قاتىسۋشىلاردىڭ ناقتى فاكتىگە سۇيەنىپ سويلەۋ, دالەلمەن جۇمىس ىستەۋ, ويدى جۇيەلى جەتكىزۋ, ريتوريكا مەن ۋاقىت رەگلامەنتىن ساقتاۋ ماشىعىن جەتىلدىرۋگە قۇرىلعان. جاس ەرەكشەلىگىنە, ماماندىعى مەن قىزمەت سالاسىنا شەكتەۋ قويىلمايدى. بۇل الاڭدا ءتۇرلى الەۋمەتتىك توپ وكىلدەرى ءبىر تاقىرىپتى ءار قىرىنان تالقىلاۋعا مۇمكىندىك الادى.
الەۋمەتتىك زەرتتەۋ: قازاقستان حالقىنىڭ 85%-ى جاڭا كونستيتۋتسيا جوباسىن قولدادى
جوبا بۇگىندە ەلىمىزدىڭ بارلىق وڭىرىندە قحپ فيليالدارىنىڭ بازاسىندا جۇزەگە اسىرىلىپ كەلەدى. ورتالىق كەڭسەدە وتكەن بۇل كەزدەسۋ سوعان ۇقساس پىكىرتالاستار سەرياسىنىڭ ءبىر بولىگى.
«وكىنىشكە قاراي, كەيدە بەلگىلى ءبىر سالانىڭ بەيىندى ماماندارى ءتيىستى ءبىلىم مەن تاجىريبەگە يە بولا تۇرا, ءوز باستاماسىن ناقتى تۇجىرىمداپ, ۇستانىمىن دالەلدى تۇردە قورعاي الماي جاتادى. ال شىن مانىندە ولار ادامداردىڭ, پارتيانىڭ, سالانىڭ, بيزنەستىڭ مۇددەسىن قورعاۋى ءتيىس. پولەميكالىق شەبەرلىكتى شىڭداۋ ءۇشىن وسىنداي الاڭ قۇردىق», دەدى ءىس-شارانى ۇيىمداستىرۋشىلاردىڭ ءبىرى, ءماجىلىس دەپۋتاتى, قحپ «JAS ORTA» جاستار قاناتىنىڭ باسشىسى يسلام سۇڭقار.
قازاقستاننىڭ ازاماتتىق اليانسى كونستيتۋتسيالىق رەفورمانى قولدادى
پىكىرسايىس شارتىنا سايكەس, سپيكەرلەر الدىن الا دايىندالمايدى. ءسوز سويلەۋ تاقىرىبى مەن قورعاۋعا ءتيىس ۇستانىمىن ولار پىكىرتالاس باستالعان ساتتە عانا بىلەدى. قازىلار القاسى قاتىسۋشىلاردىڭ ويدى جەتكىزۋ لوگيكاسىنا, دالەلىنىڭ دايەكتىلىگىنە جانە اۋديتوريانى يلاندىرا الۋ قابىلەتىنە باعا بەرەدى.
بۇل جولى پىكىرتالاس جاڭا كونستيتۋتسياسى جوباسى اياسىندا ءوتتى. قاتىسۋشىلار «كونستيتۋتسيانىڭ پرەامبۋلاسى – بولاشاقتىڭ كومپاسى» جانە «ادامعا باعدارلانعان مەملەكەت» تاقىرىپتارىن تالقىلادى. پىكىرتالاسقا قاتىسقان قحپ بەلسەندىسى, جوبالاۋ كومپانياسىنىڭ باسشىسى نايليا اپپاسوۆا ءبىر پالاتالى پارلامەنت قۇرۋ باستاماسىنا قولداۋ ءبىلدىردى.
«ساياسي جۇيە رەفورمالانىپ, ترانسفورماتسيا ءجۇرىپ جاتىر. بۇل ءبىر پالاتالى پارلامەنتكە كاسىبي ءارى تاجىريبەلى مامانداردى شوعىرلاندىرىپ, ولارعا شەشىم قابىلداۋدىڭ ناقتى جاۋاپكەرشىلىگىن جۇكتەۋگە مۇمكىندىك بەرەدى», دەدى ول.
ال ساياساتتانۋشى, «ەۋرازيالىق مونيتورينگ» اناليتيكالىق زەرتتەۋ ورتالىعىنىڭ ديرەكتورى الىبەك تاجىباەۆ «كۇشتى تۇلعالاردىڭ ورنىنا كۇشتى ينستيتۋتتار» تاقىرىبىندا بايانداما جاساپ, قازىرگى كونستيتۋتسيالىق رەفورمانىڭ نەگىزگى ماقساتى باسقارۋ جۇيەسىن نىعايتۋ ەكەنىن اتاپ ءوتتى.
استانادا جاڭا كونستيتۋتسيا جوباسىن تالقىلاۋعا ارنالعان كەزدەسۋ ءوتتى
«بۇل ءۇشىن جاڭا كونستيتۋتسيادا بارلىق قۇقىقتىق جانە ينستيتۋتسيونالدىق جاعداي قاراستىرىلعان», دەدى ساراپشى.
قازاقستان حالىق پارتياسى مۇنداي پىكىرتالاس الاڭدارىن الداعى ۋاقىتتا دا جالعاستىرۋدى جوسپارلاپ وتىر. مۇنداعى ماقسات – ساياسي قۇجاتتاردى قوعامعا ءتۇسىندىرۋ عانا ەمەس, ازاماتتاردىڭ پىكىر ايتۋ مادەنيەتىن كۇشەيتۋ.