تسيفرلىق تاڭبالاۋ جۇيەسى ءدارى-دارمەك اينالىمىندا بۇرىن بايقالماي كەلگەن بىرقاتار زاڭبۇزۋشىلىقتى انىقتادى. تەگىن بەرىلۋگە ءتيىس پرەپاراتتاردىڭ ءدارىحانالاردا ساتىلۋى, ءبىر تاڭبالاۋ كودىن قايتا-قايتا پايدالانۋ جانە جارامدىلىق مەرزىمى وتكەن دارىلەردىڭ ساۋداعا ءتۇسۋى سونىڭ ايعاعى, دەپ جازادى Egemen.kz.
بۇل ماسەلە دەنساۋلىق ساقتاۋ مينيسترلىگى الاڭىندا ۆەدومستۆو باسشىسى اقمارال ءالنازاروۆا توراعالىق ەتكەن جيىندا تالقىلاندى. باسقوسۋعا مينيسترلىكتىڭ ۆيتسە-مينيسترلەرى, مەديتسينالىق جانە فارماتسەۆتيكالىق باقىلاۋ كوميتەتىنىڭ, «فارماتسيا» وكىلدەرى, سونداي-اق تاۋارلاردى تاڭبالاۋ مەن قاداعالاۋدىڭ بىرىڭعاي وپەراتورى قازاقتەلەكوم قاتىستى.
قازاقستاندا 400-دەن استام جاڭا ءدارى-دارمەك شىعارىلادى
جيىندا دارىلىك زاتتاردىڭ قوزعالىسىن باقىلاۋعا ارنالعان ارناۋلى تسيفرلىق پلاتفورما تانىستىرىلدى. بۇل جۇيە ءدارىنىڭ زاۋىتتان نەمەسە شەتەلدەن اكەلىنگەن ساتىنەن باستاپ, قويما, ءدارىحانا ارقىلى حالىققا جەتكەنگە دەيىنگى جولىن تولىق كورسەتەدى. ءار قاپتامانىڭ قايدا, قاشان جانە كىم ارقىلى وتكەنىن ناقتى ۋاقىت رەجيمىندە كورۋگە مۇمكىندىك بار.
ءدارىحانالار نەگە الەۋمەتتىك ماڭىزى بار دارىلەردى ساتىپ الۋدان باس تارتىپ وتىر؟
جۇيەنى سىناقتان وتكىزۋ بارىسىندا كوڭىل كونشىتپەيتىن دەرەكتەر انىقتالدى. اتاپ ايتقاندا, تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا حالىققا اقىسىز تاراتىلۋى ءتيىس 15 مىڭنان استام دارىلىك زاتتىڭ كوممەرتسيالىق ءدارىحانالاردا ساتىلعانى تىركەلگەن. سونىمەن قاتار ءبىر تاڭبالاۋ كودىنىڭ 6,5 مىڭنان استام ءتۇرى 385 مىڭ رەت قايتا پايدالانىلعان. بۇعان قوسا, جارامدىلىق مەرزىمى ءوتىپ كەتكەن 750-دەن استام ءدارى قاپتاماسى ساۋداعا شىققانى بەلگىلى بولدى.
قوسىلعان قۇن سالىعى ءدارى-دارمەك باعاسىنا اسەر ەتپەيدى
جيىن قورىتىندىسىندا مينيستر تسيفرلىق تاڭبالاۋ جۇيەسىن كۇندەلىكتى باقىلاۋ قۇرالىنا اينالدىرۋدى تاپسىردى. بۇل ءدارى-دارمەك اينالىمىن رەتكە كەلتىرۋگە, بيۋدجەت قارجىسىنىڭ ىسىراپ بولماۋىنا جانە ەڭ باستىسى, حالىققا ساپالى ءارى قاۋىپسىز ءدارىنىڭ جەتۋىنە جول اشۋى ءتيىس.