جاڭا كونستيتۋتسيانىڭ جوباسى كاسىبي زاڭگەرلەردىڭ, ءارتۇرلى سالا ساراپشىلارىنىڭ جانە ازاماتتىق قوعام وكىلدەرىنىڭ ۇزاق ءارى جۇيەلى جۇمىسى ناتيجەسىندە ازىرلەندى. بۇل تۋرالى كونستيتۋتسيالىق رەفورما جونىندەگى كوميسسيانىڭ سەگىزىنشى وتىرىسىندا ءماجىلىس دەپۋتاتى, «Respublika» پارتياسىنىڭ جەتەكشىسى ايداربەك قوجانازاروۆ مالىمدەدى, دەپ حابارلايدى Egemen.kz.
ايداربەك قوجانازاروۆ, رەفورمانى تالقىلاۋ التى ايدان استام ۋاقىت بويى جۇرگىزىلگەنىنە توقتالدى. وسى كەزەڭ ىشىندە جۇزدەگەن, مىڭداعان ازامات ءوز ۇسىنىستارىن جولدادى. كوميسسيا مۇشەلەرى عانا ەمەس, جۇرتشىلىق تا بۇل قۇجاتتى قازىرگى زامان تالاپتارىنا تولىق جاۋاپ بەرەتىن, تەرەڭ ويلاستىرىلعان جانە ەلدىڭ ۇزاق مەرزىمدى دامۋ باعدارىن ايقىندايتىن ماڭىزدى قۇجات رەتىندە باعالاپ وتىر. سوعان وراي ول جاڭا كونستيتۋتسيانىڭ جوباسىن رەفەرەندۋمعا شىعارۋدى ۇسىندى.
«كونستيتۋتسيالىق كوميسسيانىڭ مۇشەسى رەتىندە جەكەلەگەن باپتاردىڭ رەداكتسياسى پىسىقتالعاننان كەيىن جاڭا كونستيتۋتسيا جوباسىن جالپىحالىقتىق داۋىس بەرۋگە – رەفەرەندۋمعا شىعارۋدى ۇسىنامىن», دەدى دەپۋتات.
كونستيتۋتسيالىق رەفورما جاستارعا قانداي مۇمكىندىكتەر ۇسىنادى؟
سونداي-اق, ول ۇلتتىق ۆاليۋتا مارتەبەسىن اتا زاڭدا بەكىتۋ تۋرالى دا مالىمدەدى. بۇل ەل ازاماتتارى تاراپىنان تۇسكەن ۇسىنىستىڭ ءبىرى. ۇلتتىق ۆاليۋتانىڭ بولۋى – مەملەكەتتىڭ ەكونوميكالىق تاۋەلسىزدىگى مەن ەگەمەندىگىن ايقىندايتىن نەگىزگى كورسەتكىشتىڭ ءبىرى سانالادى.
«ۇلتتىق ۆاليۋتانىڭ مارتەبەسىن كونستيتۋتسيا دەڭگەيىندە بەكىتۋ – تەڭگەنىڭ ينستيتۋتسيونالدىق ماڭىزىن ناقتىلاپ, قارجى-ۆاليۋتا اينالىمى سالاسىنداعى مەملەكەتتىك ساياساتتىڭ ساباقتاستىعىن قامتاماسىز ەتەدى. سونىمەن قاتار, ۇلتتىق ۆاليۋتامىزدى كونستيتۋتسيادا بەكىتۋ ارقىلى بولاشاقتا ءارتۇرلى الىپقاشپا پىكىرلەر مەن الىپساتارلىق اڭگىمەلەردىڭ الدىن الار ەدىك», دەپ ناقتىلاپ ءوتتى دەپۋتات.
ايداربەك قوجانازاروۆتىڭ ايتۋىنشا, قازىر تەڭگە مارتەبەسى زاڭمەن رەتتەلگەن. «قازاقستان رەسپۋبليكاسىنىڭ ۇلتتىق بانكى تۋرالى» زاڭعا سايكەس ۇلتتىق ۆاليۋتا – تەڭگە. الايدا الەمدىك قارجى جۇيەسى وزگەرىپ جاتقان جاعدايدا بۇل ماسەلەنى كونستيتۋتسيا دەڭگەيىندە ناقتىلاۋ اسا ماڭىزدى.
زاڭگەرلەر جاڭا كونستيتۋتسيانىڭ تۇجىرىمداماسىن تالقىعا سالدى
«بۇل – حالىقارالىق تاجىريبەدە بار دۇنيە. ماسەلەن, ازەربايجان رەسپۋبليكاسى كونستيتۋتسياسىنا سايكەس, ازەربايجان رەسپۋبليكاسىنىڭ اقشا بىرلىگى رەتىندە مانات بەلگىلەنگەن. سول سياقتى, ارمەنيا كونستيتۋتسياسىندا ۇلتتىق ۆاليۋتانىڭ ارميان درامى ەكەنى تىكەلەي جازىلعان. ال قىرعىزستان كونستيتۋتسياسىندا ۇلتتىق اقشا بىرلىگى سوم دەپ ناقتى كورسەتىلگەن. سوندىقتان كونستيتۋتسيادا «قازاقستاننىڭ ۇلتتىق ۆاليۋتاسى – تەڭگە» دەپ ناقتى بەكىتۋ وتە ورىندى دەپ سانايمىن. وسىعان بايلانىستى اتالعان تۇزەتۋدى كونستيتۋتسيا جوباسىنا ەنگىزۋدى كوميسسيا قاراۋىنا ۇسىنامىن», دەپ تۇيىندەدى ءسوزىن ءماجىلىس دەپۋتاتى.
«بايتاق» پارتياسى «ەكولوگيا جانە ادام دەنساۋلىعى» ۇعىمىن مەملەكەتتىڭ بازالىق قۇندىلىعى رەتىندە بەكىتۋدى ۇسىندى