قورعانىس مينيسترلىگىنىڭ دەلەگاتسياسى ينسپەكتسيالىق ساپارمەن گولان جوتالارىنداعى بۇۇ كۇشتەرىنىڭ بولىنگەن ايماقتى باقىلاۋ جونىندەگى ميسسيا ورىندالاتىن وڭىرگە باردى. ساپاردى قارۋلى كۇشتەر قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكباەۆ باسقاردى, دەپ حابارلايدى Egemen.kz.
ساپار بارىسىندا ميسسيا قولباسشىلىعىمەن كەزدەسۋ ءوتىپ, ونىڭ شەڭبەرىندە بىرىككەن ۇلتتار ۇيىمىنىڭ بولىنگەن ايماقتى باقىلاۋ مانداتىن ىسكە اسىرۋ ماسەلەلەرى, وڭىردەگى احۋال مەن قازاقستان كونتينگەنتىنىڭ قىزمەتى تالقىلاندى.
جوعارى باعا
قورعانىس مينيسترلىگىنىڭ ءباسپاسوز قىزمەتىنىڭ مالىمدەۋىنشە, بۇۇ ميسسيا باسشىسى جانە بۇۇ بولىنگەن ايماقتى باقىلاۋ جونىندەگى كۇشتەرىنىڭ قولباسشىسى گەنەرال-مايور انيتا اسما وتاندىق بىتىمگەرلەردىڭ قويىلعان مىندەتتەردى ساپالى ورىنداعانى ءۇشىن العىسىن ءبىلدىرىپ, ولاردىڭ ءىس-قيمىلىن, كاسىبيلىگىن, ءتارتىبى مەن ۇيلەسىمدى ارەكەتىن جوعارى باعالادى.
قازاقستاننىڭ ۇلتتىق كونتينگەنتى جەدەل ارەكەت ەتۋ بولىمشەسىنىڭ فۋنكتسيالارىن ورىنداپ, ءموبيلدى پاترۋلدەۋدى جۇزەگە اسىرادى, جەدەل ارەكەت ەتۋ توپتارىنىڭ دايىندىعىن, مەديتسينالىق ەۆاكۋاتسيالاۋدى جانە ينجەنەر-ساپەرلەردىڭ ىلەسىپ ءجۇرۋىن قامتاماسىز ەتەدى. ودان باسقا باقىلاۋ بەكەتتەرىندە دە مىندەتتەر ورىندايدى.
گولان جوتالارىنداعى قازاقستاندىق بىتىمگەرلەر مەدالدارمەن ماراپاتتالدى
ستاتيستيكا
ميسسياعا قاتىسا باستاعاننان بەرى ۇلتتىق كونتينگەنت 675, ونىڭ ىشىندە 500-دەن اسا پاترۋلدەۋدى, جاتتىعۋ ءىس-شارالارىن وتكىزۋدى, جارىلىس قاۋپى بار زاتتاردى زالالسىزداندىرۋ وپەراتسيالارىن, لەكتەردى الىپ ءجۇرۋدى جانە ۋاقىتشا باقىلاۋ بەكەتتەرىن قويۋدى ورىنداعان.
قازىرگى ۋاقىتتا گولان جوتالارىندا قازاقستانننىڭ 139 بىتىمگەرى قىزمەت ەتىپ ءجۇر.
بۇۇ ميسسياسىنىڭ قولباسشىسى گولان جوتالارىنداعى قازاقستاندىق بىتىمگەرلەرمەن كەزدەستى