اباي اتىنداعى قازاق ۇلتتىق وپەرا جانە بالەت تەاترىندا «اباي» وپەراسىنىڭ جاڭارتىلعان نۇسقاسىنىڭ پرەمەراسى ءوتتى. سەكسەن جىلدان استام ۋاقىت بويى بۇل شىعارما ۇلتتىق وپەرا ونەرىنىڭ جاۋھارى ءارى تەاتردىڭ ايرىقشا بەت-بەينەسىنە اينالىپ ۇلگەردى.
سپەكتاكلدە كوركەمدىك جانە مۋزىكالىق شەشىمدەر جاڭارتىلىپ, كلاسسيكالىق تۇپنۇسقاسىنىڭ مازمۇنى ساقتالعان. ۇرپاقتار ساباقتاستىعى جالعاسىپ, ءداستۇر مەن زاماناۋي وي دا توعىسادى.
جاڭا قويىلىم ابايدىڭ ىشكى جان دۇنيەسىن, ونىڭ ادامگەرشىلىك تاڭداۋى مەن ءوز داۋىرىمەن رۋحاني قايشىلىعىن تەرەڭىرەك اشۋعا باعىتتالدى. قويىلىمنىڭ ستسەنوگرافياسى مەن ۆيزۋالدىق شەشىمدەرىندە ايتارلىقتاي وزگەرىستەر جاسالعان. قويىلىم سۋرەتشىسى ەسەنگەلدى تۇياقوۆ ساحنالىق كەڭىستىكتى دالانىڭ جيناقتالعان بەينەسى رەتىندە قالىپتاستىردى. راۋان قايرۋللاەۆا جاساعان ساحنالىق وبرازدار تاريحي فورمالار مەن ۇلتتىق ناقىشتارعا نەگىزدەلىپ, زاماناۋي كوركەمدىك تۇرعىدا قايتا پايىمدالدى.
ال وپەرانىڭ مۋزىكالىق پارتيتۋراسى وزگەرمەگەن. قويىلىمنىڭ باس ديريجەرى نۇرجان بايبوسىنوۆتىڭ باسقارۋىمەن وركەستر, حور جانە سوليستەر پارتيتۋرانىڭ اۋقىمىن ايشىقتاپ, تۇتاس ءارى ۇيلەسىمدى مۋزىكا ۇسىنادى. قويىلىم رەجيسسەرى فارحات مولداعالي جاڭا نۇسقادا ۇرپاقتار ساباقتاستىعى تاقىرىبى ايرىقشا كوتەرىلگەنىن اتاپ ءوتتى.
شىعارمادا كاسىبي وپەرا ونەرىنىڭ باي فورمالارى – اريالار, رەچيتاتيۆتەر, انسامبلدەر كەڭىنەن قولدانىلعان.