وبلىس ورتالىعىنداعى كوركەمسۋرەت مۋزەيىندە اسسامبلەيا جىلىنا وراي «ايرەنيك» ەتنومادەني بىرلەستىگىنىڭ ۇيىمداستىرۋىمەن «ارمەنيا ونەرى: كونە جانە بۇگىن» اتتى كورمە اشىلدى.
وبلىستاعى «ايرەنيك» قوعامدىق بىرلەستىگى 1995 جىلى قۇرىلدى. سودان بەرى ەلميرا پەتروسيان باسقاراتىن ءبىرلەستىك ەلدىك تۇتاستىق پەن كەلىسىمدى ساقتاۋدا, ارميان حالقىنىڭ ۇلتتىق مادەنيەتىن, سالت-ءداستۇرىن, ادەت-عۇرپىن جاڭعىرتۋدا ۇلگىلى قىزمەت اتقارىپ كەلەدى.
ەتنومادەني بىرلەستىكتە اقساقالدار كەڭەسى جانە ونىڭ جاستار قاناتى, ادەبي, بي ۇجىمدارى جۇمىس جاسايدى. كورمەدەن ۇققانىمىز, ارميان حالقى مادەنيەتىنىڭ كونە زاماننان – تاۋ-جارتاستارداعى جازبالار مەن تاس جانە قولا مۇسىندەردەن, اشەكەيلى قارۋ-جاراقتار, شىنى جانە قىش ىدىستاردان باستاۋ الاتىنى. ياعني, ساۋلەت ونەرىنىڭ تۋىندىلارىن, قابىرعاعا سالىنعان سۋرەتتەرىن, مۇسىندەر مەن تۇرمىستىق زاتتارىن دۇنيەگە اكەلگەن ەجەلگى ۋرارتۋ مەملەكەتىنىڭ مادەنيەتىن قالىپتاستىرادى.
وسى ونەر ورتالىعىنىڭ ءبىرى 2783 جىل بۇرىن ىرگەسى قالانعان كونە ەرەبۋني (ەرەۆان) قالاسى ەكەن. كورمەدە وتكەن جىلدارداعى سۋرەتشىلەر ماريام, ەرانۋي اسلامازيان, ارا بەكاريان, دميتري نالبانديان, سيمون گالوستيان جانە قازىرگى زامانعى ارميان سۋرەتشىلەرىنىڭ تۋىندىلارى قويىلعان. ال قاراعاندىلىق سۋرەتشى ساركيس سانوسيان (1922-2004) بولسا, 1980-جىلدارى ءبىزدىڭ وبلىستىق كوركەمسۋرەت مۋزەي قورىنا ءوزىنىڭ تۋىندىلارىن سىيعا تارتىپتى.
كورمەگە, سونداي-اق, ەل ەسىندە جۇرگەن وگانەس زارداريان, رۋبەن گابريەليان, البەرت پاپيكيان, الەكساندر گريگوريان, پەتروس مالايان, لاۆينيا باجبەۋك-مەليكيان, سەدا كاراگەزيان جانە باسقا دا اتاقتى سۋرەتشىلەردىڭ سۋرەتتەرى قويىلىپتى. ارميان حالقىنىڭ قيلى ءومىرى سۋرەت ارقىلى كورىنىس تاپقان.
فاريدا بىقاي,
«ەگەمەن قازاقستان».
پاۆلودار.