قاسىم-جومارت توقاەۆ: دامۋ كوشىنىڭ باعىتىن ناقتى ايقىنداۋىمىز كەرەك

«كوميسسيا مۇشەلەرى ۇسىنعان زاڭنامالىق ەرەجەلەردە ادام قۇقىقتارى بارىنەن جوعارى تۇراتىنى جانە ادام كاپيتالى ەڭ قىمبات قۇندىلىق ەكەنى ايقىن كورسەتىلگەن. سونداي-اق ءار ازاماتتىڭ ءوز الەۋەتىن ىسكە اسىرۋعا تەڭدەي مۇمكىندىك بەرەتىن ءادىل قوعام قۇرۋدى كوزدەيدى.

عىلىم-ءبىلىم, يننوۆاتسيا سالالارىن دامىتۋدىڭ ماڭىزىنا ەرەكشە نازار اۋدارىلىپ وتىر. جاڭا تاريحي كەزەڭدە ەلىمىزدىڭ تسيفرلىق داۋىرگە بەيىمدەلۋى جەتكىلىكسىز. جاساندى ينتەللەكت جانە باسقا دا وزىق تەحنولوگيالار ءبىزدىڭ قوعامعا قىزمەت ەتۋى قاجەت. سوندىقتان دامۋ كوشىنىڭ باعىتىن ناقتى ايقىنداۋىمىز كەرەك. اتا زاڭىمىزدا ادامگەرشىلىك قۇندىلىقتاردى ەرەكشەلەپ, بولەك جازۋ ۇسىنىلدى. بۇل دا – وتە ماڭىزدى.

باسقاشا ايتقاندا, ادام جاساندى ينتەللەكتىگە قىزمەت ەتپەيدى, كەرىسىنشە, ادامزاتتىڭ اقىل-ويىنان تۋىنداعان جاساندى ينتەللەكت تۇرمىس-تىرشىلىكتىڭ بارلىق سالاسىندا تولايىم تابىسقا جەتۋى ءۇشىن ازاماتتارعا كومەكتەسەدى», دەدى قاسىم-جومارت توقاەۆ.

قاسىم-جومارت توقاەۆ ۆولونتەرلەر فورۋمىندا ءسوز سويلەدى

سونداي-اق مەملەكەت باسشىسى باي مادەني مۇرامىزدى ساقتاۋعا, دارىپتەۋگە باعىتتالعان ۆولونتەرلەردىڭ قىزمەتىنە دە قولداۋ بىلدىرەتىنىن ايتتى.

«كونستيتۋتسيادا گۋمانيتارلىق قۇندىلىقتاردى قالىپتاستىرۋ ماڭىزدى دەپ سانايمىن. اتاپ ايتقاندا, جالپىۇلتتىق بىرەگەيلىكتى نىعايتۋعا, تابيعاتتى ايالاۋعا باسىمدىق بەرۋ جونىندە ءسوز قوزعاپ وتىرمىز. بۇل ماسەلە بۇگىنگى بايانداماشىلاردىڭ سوزىندە قامتىلدى. يدەيالارىڭىزدى قولدايمىن. سونىمەن قاتار باي مادەني مۇرامىزدى ساقتاۋعا, دارىپتەۋگە باعىتتالعان ۆولونتەرلەرىمىزدىڭ قىزمەتىن دە قۋاتتايمىن», دەدى پرەزيدەنت.

پرەزيدەنت ءوز سوزىندە كونستيتۋتسياعا ەنگىزىلەتىن وزگەرىستەر ەلىمىزدىڭ دامۋىن جاڭا ءارى ساپالى دەڭگەيگە كوتەرەتىنىن ايتتى.

«بۇكىل مەملەكەتتىك جۇيەنى قايتا قۇرىپ, بيلىك پەن قوعامنىڭ ىقپالداستىعىن جەتىلدىرە تۇسەدى. ۇسىنىلعان تۇزەتۋلەردىڭ ىشىندە جاۋاپتى ءارى جاسامپاز وتانشىلدىق تۋرالى يدەيا بار. پاتريوتيزم – قۇر ۇران ەمەس. بۇل قاسيەتتى ۇعىمعا جاۋاپكەرشىلىكپەن قاراعان ابزال. مەن بۇل جايىندا جاقىندا وتكەن ۇلتتىق قۇرىلتاي وتىرىسىندا ايتقان بولاتىنمىن.

وتانشىل ازامات دەگەنىمىز – جاۋاپكەرشىلىگى جوعارى جانە جاسامپاز ازامات. مەن ەلىمىزدەگى ءاربىر ەرىكتىنى – بارشاڭىزدى ءدال وسىنداي ناعىز وتانشىل ازاماتتار دەپ سانايمىن. جاۋاپتى ءارى جاسامپاز پاتريوتيزم يدەياسى ءاربىر ۆولونتەردىڭ جانىنا جاقىن. مەنىڭ بۇعان ەش كۇمانىم جوق. ءاربىر ازامات ءوزىنىڭ جانە قوعامنىڭ يگىلىگى جولىندا كۇندەلىكتى ادال ەڭبەك ەتىپ, الەمدى جاقسارتا تۇسۋگە ۇمتىلۋعا ءتيىس. وتانعا دەگەن شىنايى سۇيىسپەنشىلىك – وسى. تانىمال قوعام قايراتكەرى پاستور مارتين ليۋتەر كينگ «I have a dream», ياعني «مەنىڭ دە ارمانىم بار» دەگەن ەدى. سوندىقتان «مىنا الەمدى جاقسارتا تۇسەمىن» دەپ ارمانداڭىزدار. مۇراتتارىڭىزعا جەتەسىزدەر دەپ ويلايمىن», دەدى مەملەكەت باسشىسى.

ايتا كەتەيىك, قازىر ەلىمىزدە ۆولونتەرلەر سانى 300 مىڭعا جەتكەن. 

سونداي-اق پرەزيدەنت ۆولونتەردىڭ تسيفرلى پاسپورتىن جاساۋ تۋرالى ۇسىنىسقا قولداۋ ءبىلدىرىپ, بيزنەس وكىلدەرىن ۆولونتەرلىك قىزمەتكە قولداۋ كورسەتۋگە شاقىردى.