ءارى جارىس ءارى مەرەكە سانالاتىن مارافوندا نەبىر قىزىقتار مەن ادام تاڭعالارلىق ناتيجەلەر ءجيى بولىپ تۇرادى. ماسەلەن, 2023 جىلدىڭ 8 قازانىندا چيكاگو كوشەلەرىندە بولعان مارافون تاريحتا قالدى. كەنيالىق جەلاياق كەلۆين كيپتۋم 42,195 شاقىرىمدىق جارىستا مارەگە 2 ساعات 35 سەكۋندتا كەلىپ, الەم رەكوردىن جاڭارتتى. بۇل ناتيجە World Athletics تاراپىنان رەسمي تۇردە بەكىتىلدى. رەكورد 6 اقپان 2024 جىلى راتيفيكاتسيالانعان, دەپ حابارلايدى Egemen.kz.
كيپتۋمنىڭ 2:00:35 كورسەتكىشىنە دەيىنگى بۇرىنعى الەم رەكوردى – 2:01:09. بۇل رەكوردتى 2022 جىلى بەرليندە كەنيالىق جەلاياق ەليۋد كيپچوگە ورناتقان ەدى.
سىرتتاي قاراساڭ, ەكەۋىنىڭ ايىرماشىلىعى جارتى-اق مينۋت سياقتى. بىراق مارافوننىڭ الەمدىك دەڭگەيىندە 34 سەكۋند كوپ نارسەنى شەشەدى.
2:00:35 – تەك ۋاقىت ەمەس, ەسەپ. مۇنداي ناتيجە ءۇشىن سپورتشى مارافون بويى ورتا ەسەپپەن, ياعني ءار شاقىرىمدى شامامەن 2 مينۋت 51 سەكۋندتا, ءار ميليانى (1,609 كم) شامامەن 4 مينۋت 36 سەكۋندتا باعىندىرۋى كەرەك.
80 جاستاعى سپورتشى نيۋ-يورك مارافونىن باعىندىردى
بۇل – كوپشىلىك ءۇشىن 400 مەتردىڭ وزىنە اۋىر تەمپ. ال كيپتۋم ءدال وسى قارقىندى 42 شاقىرىم بويى ۇستاپ قانا قويماي, سوڭىنا قاراي ۇدەتكەن. World Athletics چيكاگودا ونىڭ ناتيجەسى كەرەمەت ەكەنىن ايتا وتىرىپ, جارىستىڭ الەم رەكوردىنا ساي وتكەنىن جازادى.
چيكاگو مارافونى – الەمدەگى ەڭ بەدەلدى التى «World Marathon Majors» جارىسىنىڭ ءبىرى سانالاتىن ۇلكەن دودا. 2023 جىلعى جارىستا دا مىڭداعان قاتىسۋشى ستارتقا تۇردى, ەليتا باسەكەسى بولەك اڭگىمە بولدى. سول كۇنى كيپتۋم باستاپقى جوسپاردى «جاي عانا ۇتقىر» ورىنداپ قويماي, مارەگە جاقىنداعاندا جىلدامدىق قوسىپ, رەكوردقا ءبىر-اق شىقتى. Associated Press جارىس كۇنىندەگى حابارىندا ونىڭ الەم رەكوردىن جاڭارتقانىن, ناتيجەسىنىڭ 2:00:35 بولعانىن جانە بۇرىنعى رەكوردتان 34 سەكۋندقا وزىپ كەتكەنىن ناقتىلاپ جازدى.
54 جىلعا سوزىلعان مارافون
كيپتۋمنىڭ ەرەكشەلىگى – ونىڭ الەمدىك ارەناعا وتە جىلدام «جارق» ەتىپ شىعۋى. ول ەليتالىق دەڭگەيدە از عانا مارافون جۇگىرىپ ۇلگەرسە دە, ءار قاتىسقان جارىسىندا جوعارى ناتيجە كورسەتتى. 2023 جىلعى لوندون مارافونىندا ول 2:01:25 ۋاقىتپەن جەڭىسكە جەتىپ, الەم رەكوردىنا تىم جاقىن بارعانى دا سول جىلى-اق كوپتىڭ نازارىن اۋدارتقان. التى ايدان سوڭ چيكاگودا رەكوردتى جاڭارتتى.
روبوتتار مارافونى
كيپتۋمنىڭ داڭقى اسقاقتاپ تۇرعان كەزدە الەم جەڭىل اتلەتيكاسى اۋىر حابار ەستىدى. كەلۆين كيپتۋم 2024 جىلعى 11 اقپاندا كەنيادا جول اپاتىنان قازا تاپتى. قايعىلى وقيعادا ونىڭ باپكەرى جەرۆايس حاكيزيمانا دا كوز جۇمعان. Reuters اگەنتتىگى وسى دەرەكتى, ونىڭ چيكاگودا الەم رەكوردىن ورناتقانىن جانە جاسى 24-تە بولعانىن حابارلادى. جارىستان نەبارى بەس كۇن بۇرىن عانا ونىڭ رەكوردى World Athletics تاراپىنان رەسمي تۇردە بەكىتىلگەن ەدى.