قازاقستان پارلامەنتى ءماجىلىسى توراعاسىنىڭ ورىنباسارى سەرگەي دياچەنكو موڭعوليا ۇلى مەملەكەتتىك حۋرالىنىڭ دەپۋتاتى, «قازاقستان – موڭعوليا» ىنتىماقتاستىق جونىندەگى پارلامەنتارالىق توبىنىڭ جەتەكشىسى المالىق تىلەيحان باستاعان دەلەگاتسيا وكىلدەرىمەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
تاراپتار ەكىجاقتى قارىم-قاتىناستى دامىتۋدىڭ وزەكتى ماسەلەلەرىن تالقىلادى. كەزدەسۋ يەلەرى ەكى ەل پرەزيدەنتتەرىنىڭ ءوزارا مەملەكەتتىك ساپارلارى بارلىق سالاداعى ىنتىماقتاستىقتى تەرەڭدەتۋدىڭ ايقىن دالەلى ەكەنىن باسا اتاپ ءوتتى. قوس تاراپ ساۋدا-ەكونوميكالىق بايلانىستى ودان ءارى نىعايتۋ جايىن ءسوز ەتە كەلىپ, اۋىل شارۋاشىلىعى, كولىكتىك-ترانزيتتىك الەۋەتتى ارتتىرۋدىڭ ماڭىزدىلىعىنا توقتالدى.
س.دياچەنكو استانادا وتەتىن ەكسپو-2017 كورمەسىنە ەرەكشە نازار اۋدارىپ, موڭعول كاسىپكەرلەرىن حالىقارالىق كورمەگە بەلسەنە قاتىسۋعا شاقىردى. سونداي-اق, موڭعول تارابىنا قازاقستاننىڭ ماڭىزدى باستامالارىنا, سونىڭ ىشىندە, اوسشك, الەمدىك جانە ءداستۇرلى دىندەر كوشباسشىلارىنىڭ سەزدەرىن, سونىمەن قاتار, ءبىزدىڭ ەلىمىزدىڭ «ازيا-ەۋروپا» فورۋمىنا كىرۋ جونىندەگى قادامدارىنا قولداۋ كورسەتكەنى ءۇشىن العىس ءبىلدىردى.
حالىقارالىق قارىم-قاتىناس جايىن ءسوز ەتكەندە ۆيتسە-سپيكەر ەكى ەلدىڭ حالىقارالىق قاۋىپسىزدىك توڭىرەگىندەگى ۇستانىمدارىنىڭ ۇقساستىعىن العا تارتا كەلىپ, بۇۇ اياسىنداعى ىقپالداستىقتى نىعايتۋدىڭ قاجەتتىلىگىنە توقتالدى. وسىعان وراي, موڭعوليانىڭ قازاقستاننىڭ بۇۇ قاۋىپسىزدىك كەڭەسىنىڭ 2017-2018 جىلدارعا تۇراقتى ەمەس مۇشەلىگىنە كانديداتۋراسىن قولدايتىندىعىنا سەنىم ءبىلدىردى. سونىمەن قاتار, س.دياچەنكو دەلەگاتسيا وكىلدەرىن قازاقستاننىڭ «نۇرلى جول» جاڭا ەكونوميكالىق ساياساتىننىڭ باسىم باعىتتارى جايىندا حاباردار ەتىپ, پارلامەنت ماجىلىسىندەگى زاڭ شىعارماشىلىق جۇمىستار جونىندە اڭگىمەلەدى.
ءوز كەزەگىندە دەلەگاتسيا باسشىسى ءبىزدىڭ ەلىمىزدىڭ بارلىق سالاداعى جەتىستىكتەرىنە جوعارى باعا بەرىپ, موڭعوليانىڭ سىرتقى ساياساتىندا قازاقستاننىڭ ورنى ەرەكشە ەكەنىن اتاپ ءوتتى. تاراپتار پارلامەنتارالىق بايلانىستى كۇشەيتۋگە دە ايرىقشا كوڭىل ءبولىپ, الداعى ۋاقىتتا دا بەيىندى كوميتەتتەر, ىنتىماقتاستىق جونىندەگى توپتار ارقىلى ارىپتەستىكتى نىعايتۋعا دايىن ەكەندىكتەرىن جەتكىزدى.