مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي ورتالىق مەملەكەتتىك ورگانداردىڭ قىزمەتشىلەرىمەن مەملەكەتتىك قىزمەتتى دامىتۋ باعىتتارى مەن الداعى باسىم مىندەتتەرىن تالقىلاۋعا ارنالعان كەزدەسۋ وتكىزدى, دەپ حابارلايدى Egemen.kz.
كەزدەسۋدە مەملەكەت باسشىسىنىڭ ۇلتتىق قۇرىلتايدىڭV وتىرىسىندا ايقىنداعان باعدارلارى اياسىندا مەملەكەتتىك سەكتورداعى ۇيىمداستىرۋشىلىق مادەنيەتتى جاڭعىرتۋ ماسەلەلەرى قارالدى. اتالعان وزگەرىستەر مەملەكەتتىك اپپاراتتىڭ تيىمدىلىگىن ارتتىرۋعا جانە قوعام سەنىمىن نىعايتۋعا ارنالعان.
اگەنتتىك توراعاسى مەملەكەتتىك باسقارۋ جۇيەسىن جەتىلدىرۋ, ادامعا باعدارلانعان سەرۆيستىك اپپاراتتى قالىپتاستىرۋ جانە مەملەكەتتىك قىزمەتتەردىڭ ساپاسىن ارتتىرۋ اگەنتتىكتىڭ نەگىزگى باسىمدىقتارى ەكەنىن اتاپ ءوتتى. سونداي-اق «زاڭ مەن ءتارتىپ», «حالىق ۇنىنە قۇلاق اساتىن مەملەكەت», «ادال ازامات» قاعيداتتارىن ورنىقتىرۋ ادىلەتتى قازاقستاندى قالىپتاستىرۋدىڭ ينستيتۋتسيونالدىق نەگىزى رەتىندە بەلگىلەندى.
كەزدەسۋ بارىسىندا مەملەكەتتىك قىزمەتتىڭ گيبريدتى مودەلىن ەنگىزۋ, جەكە جانە كۆازيمەملەكەتتىك سەكتوردان كاسىبي كادرلاردى تارتۋ, سونداي-اق «ە-قىزمەت» تسيفرلىق ىرىكتەۋ جۇيەسى ارقىلى اشىقتىق پەن مەريتوكراتيانى كۇشەيتۋ جونىندەگى شارالار تانىستىرىلدى.
دارحان جازىقباي مەملەكەتتىك قىزمەتشى كاسىبي, جاۋاپتى جانە قوعام سەنىمىنە يە تۇلعا بولۋى ءتيىس ەكەنىن اتاپ ءوتىپ, اشىق, ءادىل جانە ادامعا باعدارلانعان مەملەكەتتىك قىزمەتتىڭ جاڭا ۇلگىسىن قالىپتاستىرۋعا بەلسەندى قاتىسۋعا شاقىردى.
ايتا كەتەيىك, بۇعان دەيىن ەلىمىزدە مەملەكەتتىك اقپاراتتىق جۇيەلەردى بىرىڭعاي تسيفرلىق پلاتفورماعا كەزەڭ-كەزەڭىمەن كوشىرۋ باستالعانىن حابارلاعان ەدىك.