بۇگىن ۇكىمەت وتىرىسىندا وقۋ-اعارتۋ ءمينيسترى جۇلدىز سۇلەيمەنوۆا مەملەكەت باسشىسىنىڭ تاپسىرمالارى شەڭبەرىندە ازىرلەنگەن 2026-2030 جىلدارعا ارنالعان «قازاقستان بالالارى» بىرىڭعاي تۇجىرىمداماسىن ۇسىندى, دەپ جازادى Egemen.kz.
تۇجىرىمداما بالا قۇقىقتارى جونىندەگى ۋاكىلمەن جانە بەيىندى مينيسترلىكتەرمەن بىرلەسىپ دايىندالعان. قۇجات بالالاردىڭ قۇقىن قورعاۋ سالاسىندا قابىلداناتىن شارالاردىڭ دايەكتىلىگى مەن تيىمدىلىگىن ارتتىرۋعا باعىتتالعان.
ۇكىمەتتە «قازاقستان بالالارى» باعدارلاماسىنىڭ تۇجىرىمداماسى قارالدى
«تۇجىرىمدامادا قاۋىپسىزدىك, ءبىلىم بەرۋ, دەنساۋلىق ساقتاۋ, وتباسى قۇقىعى جانە الەۋمەتتىك قورعاۋ سىندى ءتورت نەگىزگى باعىت قامتىلعان. تيىمدىلىكتى باعالاۋ ءۇشىن 10 ينديكاتور, ال جۇزەگە اسىرۋ ءۇشىن 158 ءىس-شارا كوزدەلگەن. قارجىلاندىرۋدىڭ جالپى كولەمى – 1,3 ترلن تەڭگە», دەدى جۇلدىز سۇلەيمەنوۆا.
تۇجىرىمداما شەڭبەرىندە «زاڭ مەن ءتارتىپ» يدەولوگياسىن كەڭىنەن تاراتۋ, مەكتەپتەردە پەداگوگ-پسيحولوگ ساعاتىن ەنگىزۋ, بالالاردى «ادال ازامات» رۋحىندا تاربيەلەۋ, زورلىق-زومبىلىقتان زارداپ شەككەن بالالارعا كومەك كابينەتتەرىن اشۋ, پسيحولوگيالىق دياگنوستيكانىڭ بىرىڭعاي تسيفرلىق پلاتفورماسىن قۇرۋ, قاداعالاۋدى تالاپ ەتەتىن بالالاردى تالىمگەرلەرمەن 100% قامتۋ جوسپارلانىپ وتىر.
«قازاقستان بالالارى» ونكۇندىگىنە 5 ميلليوننان استام بالا قاتىسقان
سونداي-اق بۋللينگتى انىقتاۋ ءۇشىن بەينەباقىلاۋ كامەرالارىنا جي تەحنولوگيالارىن ەنگىزۋ, قۇقىققا قايشى كونتەنتتى جويماعانى ءۇشىن ينتەرنەت-پلاتفورمالاردىڭ جاۋاپكەرشىلىگىن كۇشەيتۋ دە قاراستىرىلعان.
ايتا كەتەيىك, قاسىم-جومارت توقاەۆ ۇلتتىق قۇرىلتايدىڭ IV وتىرىسىندا بالا تاربيەسىندەگى وزەكتى ماسەلەلەرگە توقتالىپ, «قازاقستان بالالارى» اتتى ءبىرتۇتاس باعدارلاما قابىلداۋدى ۇسىنعان بولاتىن.