الماتى وبلىسىندا ءبىلىم سالاسىن تسيفرلاندىرۋ جانە جاساندى ينتەللەكت قۇرالدارىن وقۋ ۇدەرىسىنە ەنگىزۋ باعىتىندا تاجىريبەلىك ترەنينگ ءوتتى.
ىلە اۋدانىنداعى №53 ورتا مەكتەپ بازاسىندا وتكەن «EdTech & AI: يننوۆاتسيا جانە ينتەگراتسيا» تاقىرىبىنداعى ءىس-شارا پارلامەنت ءماجىلىسى مەن «Amanat» پارتياسى توراعاسىنىڭ حاتتامالىق تاپسىرمالارىنا سايكەس «Daryn.ai» پلاتفورماسىندا مۇعالىمدەرگە ارنالعان جاساندى ينتەللەكت كۋرسىن ىسكە اسىرۋ اياسىندا ۇيىمداستىرىلدى. بۇل باستاماعا الماتى وبلىسىنىڭ ءبىلىم باسقارماسى ۇيىتقى بولدى.
ءىس-شارانىڭ اشىلۋىندا وبلىستىق ءبىلىم باسقارماسىنىڭ باسشىسى ارايلىم تولەۋبەكوۆا جاساندى ينتەللەكتىنىڭ ءبىلىم جۇيەسىندەگى ستراتەگيالىق ماڭىزىنا توقتالىپ, ونىڭ ساپالى ءبىلىم بەرۋدەگى ءرولىن اتاپ ءوتتى.
«جاساندى ينتەللەكتىنى ءتيىمدى قولدانۋ – ۋاقىت تالابى عانا ەمەس, ساپالى ءبىلىمنىڭ باستى كەپىلى. بۇل باعىتتا مۇعالىمدەردىڭ كاسىبي دايىندىعى مەن زاماناۋي كوزقاراسى شەشۋشى مانگە يە», دەدى ول.
تاجىريبەلىك ترەنينگكە وبلىستىق ءبىلىم باسقارماسىنىڭ وكىلدەرى, ادىستەمەلىك ورتالىق ماماندارى, اۋدان جانە قالا ءبىلىم بولىمدەرىنىڭ باسشىلارى, ءبىلىم ۇيىمدارىنىڭ ديرەكتورلارى, سونداي-اق «eData.kz», «Bilim Media Group (Bilimland)», «Daryn.AI» جانە «الماتىكىتاپ» كومپانيالارىنىڭ وكىلدەرى قاتىستى. سونىمەن قاتار «Daryn.ai» پلاتفورماسى ارقىلى كۋرستان ءوتىپ, ءوز جوبالارىن ازىرلەگەن پەداگوگتەر دە تاجىريبەcىمەن ءبولىستى.
ترەنينگتىڭ نەگىزگى ماقساتى – پەداگوگتەرگە جاساندى ينتەللەكت قۇرالدارىن پايدالانا وتىرىپ, وقۋ ۇدەرىسىن جەكەلەندىرۋ, دارالاپ وقىتۋ, كاسىبي تاجىريبە الماسۋعا مۇمكىندىك جاساۋ. تانىستىرىلىم الاڭىندا تەحنولوگيالىق كومپانيا وكىلدەرى TEDx فورماتىندا وزدەرىنىڭ يننوۆاتسيالىق شەشىمدەرى مەن ۇسىنىستارىن ايتىپ, ءبىلىم سالاسىنداعى ىنتىماقتاستىقتى نىعايتۋعا باعىتتالعان وي-پىكىرىن ورتاعا سالدى.
تسيفرلىق تەحنولوگيالاردى ءبىلىم جۇيەسىنە ەنگىزۋ – وقىتۋ ساپاسىن ارتتىرۋدىڭ ماڭىزدى تەتىگىنىڭ ءبىرى. وسى باعىتتا ەلىمىزدە جاساندى ينتەللەكتىگە نەگىزدەلگەن زاماناۋي پلاتفورمالاردى ءبىلىم ۇيىمدارىنا بەيىمدەپ, ءتيىمدى قولدانىسقا ەنگىزۋ جۇمىستارى جۇرگىزىلىپ كەلەدى. اتالعان باستامانىڭ ماڭىزى مەن جۇزەگە اسىرىلۋ بارىسى تۋرالى «eData.kz» كومپانياسىنىڭ ديرەكتورى سانجار كەنجەحان تىلگە تيەك ەتتى.
ء«بىز – «eData.kz» كومپانياسى ەلىمىزدەگى «Google», «Canva», «Quizizz ai» دەگەن كومپانيالاردىڭ رەسمي وكىلىمىز. بۇل قۇرىلعىلار جاساندى ينتەللەكت نەگىزىندە جۇمىس ىستەيدى. ول ءبىلىم سالاسىنىڭ ماماندارى, مۇعالىمدەر مەن وقۋشىلارعا كەڭەيتىلگەن مۇمكىندىك بەرەدى. بۇل – قۇجات اينالىمىن اۆتوماتتاندىرۋدان باستاپ, ىشكى وقۋ ۇدەرىستەرىن وڭتايلاندىرۋ جانە وقۋشىلارعا جەكەشەلەندىرىلگەن ءبىلىم ارقىلى ءبىلىم ساپاسىن كوتەرۋگە باعىتتالعان بىرىڭعاي ەكوجۇيە. سول ءۇشىن الماتى وبلىسىندا قالا مەكتەپتەرى مەن اۋىل مەكتەپتەرىندەگى ءبىلىم ساپاسىن تەڭەستىرۋ ماقساتىندا جۇمىس ىستەپ جاتىرمىز. رەسپۋبليكا بويىنشا بۇل پلاتفورمالارعا 13 وبلىس قوسىلعان. سونىڭ ىشىندە ەندى الماتى وبلىسى دا بۇل تىزىمگە ەنىپ وتىر», دەيدى س.كەنجەحان.
ال وبلىس ۇستازدارى وزدەرىنىڭ اۆتورلىق جوبالارىن تانىستىرىپ, جاساندى ينتەللەكتىنى ساباق بارىسىندا ءتيىمدى قولدانۋ جولدارىن ناقتى مىسالدار ارقىلى كورسەتتى. قاتىسۋشىلار تسيفرلىق ءبىلىم رەسۋرستارىنىڭ مۇمكىندىكتەرى مەن تاۋەكەلدەرى, «EdTech» سالاسىنداعى زاماناۋي ترەندتەر جانە جي قۇرالدارىن وقۋ ۇدەرىسىنە ينتەگراتسيالاۋ ماسەلەلەرى بويىنشا پىكىر الماستى.
الماتى وبلىسى