تالعار اۋدانىندا توعىزقۇمالاقتان الماتى وبلىسىنىڭ جەكە چەمپيوناتى ءوتتى. جارىسقا 2012 جىلى تۋعان جانە ودان ۇلكەن جاستاعى شامامەن 75 سپورتشى قاتىسىپ, وزدەرى تۇراتىن اۋدانداردىڭ نامىسىن قورعادى, دەپ حابارلايدى Egemen.kz.
تۋرنير جەكە ەسەپتە شۆەيتساريالىق جۇيە بويىنشا ۇيىمداستىرىلىپ, ەكى فورماتتى قامتىدى – «كلاسسيكا» جانە «بليتس». جارىستىڭ نەگىزگى ماقساتى – ۇلتتىق مۇرانى ۇلىقتاۋ جانە 11-اقپاندا پاۆلودار قالاسىندا باستالاتىن قازاقستان چەمپيوناتىنا قاتىساتىن الماتى وبلىسىنىڭ قۇراما كومانداسىنا ۇمىتكەرلەردى ىرىكتەۋ.
«چەمپيونات – ۇيىمداستىرۋشىلىق جانە سپورتتىق دەڭگەيى جوعارى دەڭگەيدە ءوتتى. جىل سايىن باسەكەنىڭ ارتىپ, ويىنشىلاردىڭ ويىنى اناعۇرلىم كەمەلدەنىپ كەلە جاتقانى قۋانتادى. مۇنداي جارىستار سپورتشىلارعا قۇندى تاجىريبە بەرىپ, ءارى قاراي دامۋعا ىنتالاندىرادى», دەدى جارىستىڭ باس تورەشىسى ەربولات قىلىشباەۆ.
كۇنى بويىنا ۇلاسقان جارىستا قاتىسۋشىلار جوعارى دايىندىق دەڭگەيىن, ستراتەگيالىق ويلاۋ قابىلەتىن جانە جىلدام شەشىم قابىلداي الۋ شەبەرلىگىن كورسەتتى. اسىرەسە بليتس پارتيالارىندا زەيىن مەن ەسەپتەۋ جىلدامدىعى الدىڭعى ورىنعا شىقتى.
ء «ار پارتيا وڭاي بولعان جوق, قارسىلاستار وتە مىقتى بولدى. اسىرەسە قاتەلىككە جول بەرۋگە بولمايتىن بليتس فورماتى قيىنعا سوقتى. بارلىق جەڭىستەرىم – تىنىمسىز جاتتىعۋلار مەن باپكەرىمنىڭ قولداۋىنىڭ ناتيجەسى», دەدى 15–17 جاس ارالىعىنداعى مەكتەپ وقۋشىلارى اراسىندا توعىزقۇمالاقتان تۇڭعىش الەم چەمپيونى اتانعان باتىر ەرنۇر.
باسەكەلى جارىس قورىتىندىسىندا جەڭىمپازدار باعالى سىيلىقتارمەن ماراپاتتالدى.
الماتى وبلىسى