ەلباسى نۇرسۇلتان نازارباەۆ قوس كيەنىڭ ساقشىسى, ساۋد ارابياسىنىڭ كورولى سالمان بەن ابدەل ءازيز ءال ساۋدپەن تەلەفون ارقىلى سويلەستى, دەپ حابارلادى پرەزيدەنتتىڭ ءباسپاسوز قىزمەتى.
اڭگىمەلەسۋ بارىسىندا ساۋد ارابياسىنىڭ كورولى مەملەكەت باسشىسىن بارشا مۇسىلمان ءۇشىن قاسيەتتى رامازان ايىنىڭ باستالۋىمەن قۇتتىقتاپ, قازاقستاندىقتارعا باق-بەرەكە تىلەدى.
ەكى مەملەكەت باسشىلارى قازاقستان-ساۋديا سەرىكتەستىگىنىڭ باسىمدىعى بار باعىتتارىن تالقىلادى. تاراپتار حالىقارالىق ۇيىمدار اياسىنداعى ساياسي ۇنقاتىسۋ مەن جەمىستى ىقپالداستىقتىڭ دەڭگەيى جوعارى ەكەنىن اتاپ ءوتتى.
سونىمەن قاتار, ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى ارتتىرۋ ماسەلەلەرى جونىندە پىكىر الماسىلدى.
سالمان بەن ابدەل ءازيز ءال ساۋد ەلدەرىمىزدىڭ عاسىرلار بويعى دوستىق پەن ءوزارا ءتيىمدى ىنتىماقتاستىققا نەگىزدەلگەن قارىم-قاتىناسى الداعى ۋاقىتتا دا قازاقستان مەن ساۋد ارابياسىنىڭ دوستاس حالىقتارى مۇددەسىنە قىزمەت ەتە بەرەتىنىنە سەنىم ءبىلدىردى.