مينيسترلىكتىڭ مالىمەتىنشە, بۇل باستامانىڭ باستى ماقساتى – ىشكى ءتۋريزمدى جانداندىرۋ جانە قازاقستاننىڭ تۋريستىك الەۋەتىن تولىق اشۋ.
«2026 جىلعا ارنالعان كۇنتىزبە – مەملەكەت باسشىسىنىڭ 2025 جىلعى 14 ناۋرىزدا بۋرابايدا وتكەن ۇلتتىق قۇرىلتاي وتىرىسىندا بەرگەن تاپسىرمالارىن ىسكە اسىرۋ اياسىنداعى قادامداردىڭ ءبىرى. بۇل باستاما وقيعالى ءتۋريزمدى جۇيەلى دامىتۋعا, وڭىرلەردىڭ تۋريستىك بىرەگەيلىگىن نىعايتۋعا, قولايلى تسيفرلىق شەشىمدەر قالىپتاستىرۋعا جانە قازاقستان بويىنشا ساياحاتتاردىڭ تارتىمدىلىعىن ارتتىرۋعا باعىتتالعان», دەلىنگەن حابارلامادا.
كۇنتىزبەگە ەنگىزىلگەن 55 ءىس-شارا مادەني, ەتنومادەني, سپورتتىق, گاسترونوميالىق جانە ەكولوگيالىق باعىتتاردى قامتيدى. ولاردىڭ باسىم بولىگى جىل سايىن ءداستۇرلى تۇردە وتكىزىلەتىن وقيعالار.
باستى جاڭاشىلدىقتار:
ونلاين-پلاتفورما: تۋريستەرگە ىڭعايلى بولۋ ءۇشىن ارنايى www.event.qaztourism.kz ۆەب-رەسۋرسى ىسكە قوسىلدى. پلاتفورمادا ءىس-شارالاردىڭ وتەتىن كۇنى, ءوڭىرى جانە ساناتى بويىنشا اقپارات الۋعا بولادى.
بيزنەس قولداۋى: جوبالاردىڭ كوپشىلىگى بيزنەس وكىلدەرىنىڭ قاتىسۋىمەن نەمەسە دەمەۋشىلىگىمەن ۇيىمداستىرىلادى, بۇل بيۋدجەتكە قوسىمشا سالماق تۇسىرمەيدى.