اقتوبە قالاسىنىڭ جاڭاقونىس-2 تۇرعىن ءۇي الابىندا 600 وقۋشىعا لايىقتالعان جاڭا مەكتەپ پايدالانۋعا بەرىلدى. تىعىز قونىستانعان اۋماق تۇرعىندارى كوپتەن كۇتكەن ءبىلىم ورداسى «كەلەشەك مەكتەپتەرى» ۇلتتىق جوباسى اياسىندا بوي كوتەردى, دەپ حابارلايدى Egemen.kz.
مەكتەپالدى دايارلىق توپتارىنان باستاپ, جوعارى سىنىپتارعا دەيىنگى سىنىپتارعا لايىقتالعان وقۋ كابينەتتەرىمەن جاساقتالعان ءبىلىم ورداسىندا 662 وقۋشى ءۇشىنشى توقسان ساباقتارىن باستاپ كەتتى. ولار ءۇشىن 48 وقۋ كابينەتى اشىلدى.
«كەلەشەك مەكتەپتەرى» بارلىق مەكتەپتىڭ دامۋىنا نەگىز بولادى
وقۋشىلاردىڭ ساباقتان تىس ۋاقىتتاردا قوسىمشا ءبىلىم الۋى مەن بەيىمدىك باعىتتارىن تاڭداۋىنا, سپورتپەن اينالىسۋىنا بارلىق جاعداي جاسالعان. فيزيكا, حيميا, بيولوگيا پاندەرىنىڭ زەرتحانالارى, ەر بالالار مەن قىزدار ءۇشىن ەڭبەككە باۋلۋ كابينەتتەرى, بىرنەشە سپورت تۇرىنە لايىقتالعان سپورت زالى, ەڭسەلى كىتاپحاناسى, مادەني شارالار مەن كەزدەسۋلەر وتكىزۋگە لايىقتالعان اكت زالى, كەڭ دە جارىق اسحاناسى بار.
ءبىلىم بەرۋ ۇدەرىسىنە كاسىبي بىلىكتىلىكتەرى جوعارى مۇعالىمدەر تارتىلىپ, جۇمىسقا قابىلدانعان ۇستازداردىڭ باسىم كوپشىلىگى «پەداگوگ-زەرتتەۋشى», «پەداگوگ-ساراپشى» جانە «پەداگوگ-مودەراتور» بىلىكتىلىك ساناتتارىنا يە.
ورالدا «كەلەشەك مەكتەبى» اشىلدى
سونداي-اق بالالاردى الەۋمەتتەندىرۋ جۇمىستارىنا دا باسىمدىق بەرىلىپ, وقۋ داعدىلارىن مەڭگەرۋ مەن ولاردىڭ جاسىنا ساي دامۋىن قاداعالاپ وتىرۋ ءۇشىن پسيحولوگ, الەۋمەتتىك پەداگوگ, لوگوپەد جانە دەفەكتولوگ ماماندار دا قابىلداندى. ەڭسەلى ءبىلىم ورداسىنىڭ ىشكى جابدىقتالۋى, ىڭعايلى پارتالار مەن كورنەكىلىك وقۋ قۇرالدارى, زاماناۋي تسيفرلىق وقۋ تەحنيكالارى وقۋشىلاردىڭ وقىپ-ۇيرەنۋگە دەگەن زەيىنىن اشۋعا مۇمكىندىك بەرەدى.
«كەلەشەك مەكتەپتەرى»: ساۋراندا 3 زاماناۋي مەكتەپ پايدالانۋعا بەرىلدى