شىمكەنتتە 21 جاستاعى قىزدى ءولدىردى دەپ ايىپتالعان كۇدىكتى ەر ادام ۇستالدى. ىزدەۋ جۇمىستارىنا شىمكەنت قالاسى پوليتسيا دەپارتامەنتىنىڭ بارلىق جەكە قۇرامى جۇمىلدىرىلعان, دەپ جازادى Egemen.kz.
شىمكەنت قالاسى پوليتسيا دەپارتامەنتىنىڭ مالىمەتىنشە, كۇدىكتىنى ىزدەۋ بارىسىندا قالانىڭ كىرەبەرىستەرى مەن شىعابەرىستەرىندە باقىلاۋ كۇشەيتىلىپ, اۋماقتى جاپپاي تەكسەرۋ جۇمىستارى ۇيىمداستىرىلعان.
ناتيجەسىندە كۇدىكتى قالادان شامامەن 10 شاقىرىم قاشىقتىقتاعى اشىق اۋماقتا قولعا تۇسكەن.
«قازىر 28 جاستاعى شىمكەنت تۇرعىنى ۋاقىتشا ۇستاۋ يزولياتورىنا قامالدى. الدىن الا مالىمەتتەرگە سايكەس, كۇدىكتى مارقۇم قىزدىڭ تانىسى بولعان. قىلمىستىڭ سەبەپتەرى مەن وزگە دە ءمان-جايلارى تەرگەۋ بارىسىندا انىقتالادى», دەلىنگەن حابارلامادا.
اتالعان دەرەك بويىنشا ادام ءولتىرۋ فاكتىسى بويىنشا قىلمىستىق ءىس قوزعالىپ, جەدەل-تەرگەۋ ءىس-شارالارى جۇرگىزىلىپ جاتىر.
ەسكە سالايىق, شىمكەنتتەگى تولەمەتوۆ كوشەسى بويىنداعى كوپقاباتتى ءۇيدىڭ الدىنان پىشاق جاراقاتىنان جان تاپسىرعان جاس قىزدىڭ ءمايىتى تابىلعان ەدى.
بۇعان دەيىن الماتى تاۋلارىندا ءۇش ادام جوعالىپ كەتىپ, ءبىر ادامنىڭ ءمايىتى تابىلعانىن حابارلاعانبىز. جەلتوقسان سوڭىندا الماتى تاۋلارىندا سنوۋبورد تەپكەن قىز كوز جۇمىپ, قۇتقارۋشىلار ونىڭ ءمايىتىن تاپقانىن مالىمدەگەن.
وتكەن جىلدىڭ قاراشا ايىندا جامبىل وبلىسى بايزاق اۋدانىنىڭ سارىكەمەر اۋىلىندا №3 بايزاق كوللەدجىنىڭ 16 جاستاعى ستۋدەنتى ءوز-وزىنە قول جۇمساپ, كەيىننەن ءمايىتى تابىلعان ەدى.