اقش پرەزيدەنتى دونالد ترامپ يرانمەن ساۋدا-ساتتىق جاسايتىن بارلىق ەلگە 25 پايىزدىق باج سالىعىن ەنگىزەتىنىن مالىمدەدى, دەپ حابارلايدى Egemen.kz.
«وسى ساتتەن باستاپ يران يسلام رەسپۋبليكاسىمەن كاسىپ جۇرگىزەتىن كەز كەلگەن ەل اقش-پەن جاسالاتىن بارلىق ىسكەرلىك وپەراتسيالار بويىنشا 25 پايىزدىق باج سالىعىن تولەيتىن بولادى. بۇل جارلىق تۇپكىلىكتى جانە قايتا قاراۋعا جاتپايدى», دەپ جازدى اق ءۇي باسشىسى Truth Social الەۋمەتتىك جەلىسىندەگى پاراقشاسىندا.
ترامپتىڭ ايتۋىنشا, 25 پايىزدىق باج سالىعى يران ۇكىمەتىنە قىسىم كورسەتۋ قۇرالى رەتىندە قولدانىلماق. ول ەلدەگى نارازىلىق شەرۋلەرىن كۇشپەن باسىپ-جانشىپ وتىرعان بيلىككە وسىلايشا ىقپال ەتۋدى كوزدەيدى.
Bloomberg اگەنتتىگىنىڭ مالىمەتىنشە, يراننىڭ نەگىزگى ساۋدا سەرىكتەستەرى قاتارىندا ءۇندىستان, قىتاي جانە تۇركيا بار. اگەنتتىك اتاپ وتكەندەي, قىتاي ونىمدەرىنە قوسىمشا 25 پايىزدىق تاريف ەنگىزىلۋى ترامپتىڭ وتكەن جىلدىڭ سوڭىندا سي تسزينپينمەن جاساعان ساۋدا بىتىمىنە نۇقسان كەلتىرۋى مۇمكىن.
ايتا كەتەيىك, يرانداعى جاپپاي تارتىپسىزدىكتەر جەلتوقسان ايىنىڭ سوڭىنان بەرى جالعاسىپ كەلەدى. ولار باستاپقىدا ريال باعامىنىڭ كۇرت قۇلدىراۋى مەن ەلدەگى ەكونوميكالىق جاعدايدىڭ ناشارلاۋىنا بايلانىستى باستالعان. كەيبىر قالالاردا ميتينگىلەر كۇشتىك قۇرىلىمدارمەن قاقتىعىسقا ۇلاسىپ, قولدانىستاعى ساياسي جۇيەگە قارسى ۇراندارمەن قاتار جۇرگەن.
Iran Human Rights (IHR) قۇقىق قورعاۋ ۇيىمىنىڭ دەرەكتەرىنە سايكەس, 12 قاڭتار كەشىندەگى جاعداي بويىنشا يران بيلىگىنىڭ نارازىلىقتاردى باسىپ-جانشۋ بارىسىندا كەمىندە 648 ادام قازا تاپقان, ولاردىڭ ىشىندە توعىز كامەلەتكە تولماعان بالا بار. الايدا كەيبىر باعالاۋلار بويىنشا قازا تاپقاندار سانى 6 مىڭنان اسىپ كەتكەن. بۇل تۋرالى نورۆەگيادا ورنالاسقان ۇيىم وكىلدەرى ناقتىلادى.
قۇقىق قورعاۋشىلاردىڭ ايتۋىنشا, يراندا ينتەرنەتتىڭ 100 ساعاتتان استام ۋاقىت بويى بۇعاتتالۋىنا بايلانىستى بۇل اقپاراتتى تاۋەلسىز تۇردە تەكسەرۋ «وتە قيىن». ولاردىڭ باعالاۋىنشا, شامامەن 10 مىڭ ادام قاماۋعا الىنعان.
كۇنى كەشە اقش پرەزيدەنتى دونالد ترامپ يرانداعى ينتەرنەتتى قالپىنا كەلتىرۋ ماسەلەسىن تالقىلاۋ ءۇشىن ميللياردەر يلون ماسكپەن سويلەسۋدى جوسپارلاپ وتىرعانىن ايتقان ەدى.
سونىمەن قاتار يران ۇكىمەتى جاپپاي نارازىلىق كەزىندە قازا تاپقان قاۋىپسىزدىك كۇشتەرىنىڭ قىزمەتكەرلەرىن ەسكە الۋ ماقساتىندا ۇش كۇندىك ۇلتتىق ازا تۇتۋ جاريالادى.
يرانداعى احۋالعا بايلانىستى الەمدىك نارىقتا مۇناي باعاسى كۇرت ءوستى