ەرتىس-بايان وڭىرىندە 23 ءبىلىم بەرۋ مەكەمەسىن جوندەۋ جوسپارلانعان. سونداي-اق اقپاراتتىق تەحنولوگيالار كوللەدجىنىڭ جاتاقحانا عيماراتىن قايتا جاڭعىرتۋ كوزدەلىپ وتىر, دەپ حابارلايدى Egemen.kz.
وڭىردەگى ءبىلىم بەرۋ ۇيىمدارىندا كۇردەلى جوندەۋ جۇمىستارىن جۇرگىزۋ بويىنشا وتكىزىلگەن كونكۋرس راسىمدەرىنىڭ جەڭىمپازدارى انىقتالدى.
− 2026 جىلى 27 جوبا اياسىندا ءبىلىم بەرۋ سالاسىنداعى 23 نىساندا كۇردەلى جوندەۋ جۇرگىزۋ جوسپارلانعان. ونىڭ ىشىندە پاۆلودار, ەكىباستۇز, اقسۋ قالالارىندا, سونداي-اق باياناۋىل, ۋسپەن, پاۆلودار اۋداندارى مەن تەرەڭكول اۋدانىندا ورنالاسقان 10 بالاباقشا مەن 13 مەكتەپ بار. بۇدان بولەك, اقپاراتتىق تەحنولوگيالار كوللەدجىنىڭ جاتاقحانا عيماراتىن قايتا جاڭعىرتۋ جوسپاردا تۇر, − دەپ حابارلادى وڭىرلىك ءبىلىم بەرۋ باسقارماسىنان.
مەردىگەرمەن قۇرىلىس-مونتاج جۇمىستارىنىڭ ساپاسى مەن مەرزىمدەرىنىڭ ساقتالۋى, سونداي-اق جوبالاۋ-سمەتالىق قۇجاتتاما تالاپتارى مەن تەحنيكالىق قاداعالاۋ نورمالارىن قاتاڭ ورىنداۋ جايى تالقىلانعان.
سەبەبى بۇعان دەيىنگى جىلداردا كەيبىر مەكتەپتەردىڭ جوندەۋى كەشىگىپ, بالالاردىڭ وزگە مەكتەپتەردە ۋاقىتشا ءبىلىم الۋىنا تۋرا كەلگەن.
پاۆلودار وبلىسى