سەنات سايتىندا 2024 جىلعا ارنالعان تابىس دەكلاراتسيالارى جاريالاندى. قۇجاتتار سەناتورلاردىڭ جەكە پاراقشالارىندا ارنايى بولىمدە ورنالاستىرىلعان. قازىرگى ۋاقىتتا اشىق قولجەتىمدى دەرەك 6 سەناتورعا قاتىستى, دەپ جازادى Egemen.kz.
جاريالانعان مالىمەتتەردىڭ كوپشىلىگى دەپۋتاتتاردىڭ ءوز تابىسىن ەمەس, جۇبايلارىنىڭ كىرىسىن كورسەتەدى. اشىق دەرەكتە تەك ساعىندىق لۇقپانوۆتىڭ جەكە دەكلاراتسياسى بار. ول 2024 جىلى 44000 تەڭگە تابىس تاپقانىن كورسەتكەن.
قالعان سەناتورلار بويىنشا جۇبايلاردىڭ تابىسى جاريالانعان. نۇرلان بەكەنوۆتىڭ جۇبايى سارا 2024 جىلى 11 400 000 تەڭگە تاپقان. سۇلتان دۇيسەمبينوۆتىڭ جۇبايى رايا قىدىرباەۆا 5 000 000 تەڭگە تابىس العان. زاكىرجان كوزيەۆتىڭ جۇبايى تاسميانىڭ كىرىسى 3 300 000 تەڭگەنى قۇراعان. جانبولات جۇرگەنباەۆتىڭ جۇبايى دانيا 12 000 000 تەڭگە تابىسىن كورسەتكەن. شاكارىم بۇقتۇعۇتوۆتىڭ دەكلاراتسياسىندا دا تەك جۇبايى گۇلنار بۇقتۇعۇتوۆانىڭ كىرىسى بار. ونىڭ 2024 جىلعى تابىسى 12 300 000 تەڭگە بولعان.
قازىرگى تاڭدا سەنات سايتىندا باسقا سەناتورلاردىڭ 2024 جىلعا ارنالعان دەكلاراتسيالارى اشىق تۇردە جاريالانباعان. بۇل رەتتە كوپتەگەن دەپۋتاتتىڭ جەكە پاراقشاسىندا ءتيىستى ءبولىم بار, الايدا دەرەك ءالى تولىقتىرىلعان جوق.
مۇنداي اقپاراتتىڭ جاريالانۋىنا زاڭداعى وزگەرىستەر نەگىز بولدى. سىبايلاس جەمقورلىققا قارسى ءىس قيمىل تۋرالى زاڭعا ەنگىزىلگەن تۇزەتۋلەر 2025 جىلعى 1 قاڭتاردان باستاپ كۇشىنە ەندى. سوعان سايكەس مەملەكەتتىك ورگاندار ءوز باسشىلارىنىڭ جانە ولاردىڭ جۇبايلارىنىڭ تابىسى تۋرالى مالىمەتتى اشىق كورسەتۋگە مىندەتتەلدى.
بۇعان دەيىن دە شەنەۋنىكتەر جىل سايىن دەكلاراتسيا تاپسىرعان. الايدا ول اقپارات سالىق قۇپياسىنا جاتقىزىلىپ, كوپشىلىككە جاريالانباعان. ەندى بۇل ءتارتىپ وزگەردى.
العاش رەت مۇنداي دەرەكتەر اقوردادا, ۇكىمەتتە جانە اكىمدىكتەردە جاريالاندى. 2024 جىلعى مالىمەت بويىنشا ەڭ جوعارى تابىس كورسەتكەن لاۋازىمدى تۇلعانىڭ جۇبايى ەربولات دوساەۆتىڭ جۇبايى گۇلنار بولدى. ونىڭ كىرىسى 2 300 000 000 تەڭگەنى قۇراعان.
2025 جىلعى جەلتوقساننىڭ سوڭىنان باستاپ دەكلاراتسيالار مىندەتتى تۇردە جاريالانا باستادى. دەگەنمەن ولار جەڭىلدەتىلگەن فورماتتا ۇسىنىلادى. اشىق دەرەكتە تەك اتى ءجونى مەن جيىنتىق تابىس كورسەتىلەدى. اكتيۆتەر مەن بانك شوتتارى تۋرالى مالىمەت بەرىلمەيدى.