ەلوردادا كوممۋنالدىق قىزمەتتەر قىس مەزگىلى باستالعالى بەرى تاۋلىك بويعى كۇشەيتىلگەن جۇمىس رەجيمىنە كوشكەن. بوران مەن قولايسىز اۋا رايىنا قاراماستان, قار كۇرەۋ جۇمىسى ۇزدىكسىز جۇرگىزىلىپ جاتىر, دەپ جازادى Egemen.kz.
قالا اكىمدىگىنىڭ مالىمەتىنشە, وتكەن تۇندە قالادان 3 146 اۋىر جۇك كولىگىنىڭ رەيسىمەن 42 مىڭنان استام تەكشە مەتر قار شىعارىلدى. 9 قاڭتار كۇنى تاڭەرتەڭگى اۋىسىمدا قار تازالاۋ جۇمىستارىنا 3 مىڭنان استام جول جۇمىسشىسى جانە 1 500-دەن اسا ارنايى تەحنيكا جۇمىلدىرىلدى. جالپى قىس باستالعالى بەرى قالادان قار پوليگوندارىنا 155 982 رەيسپەن ەكى ميلليون تەكشە مەتردەن استام قار شىعارىلعان.
«ەڭ الدىمەن نەگىزگى كوشە ماگيسترالدارى مەن قوعامدىق كولىك باعىتتارى تازارتىلىپ جاتىر. ودان كەيىن قوزعالىس قارقىنى ورتاشا اۋلالاردا, الاڭداردا, جاياۋ جۇرگىنشىلەر جولى مەن ايالدامالاردا قار تازالاۋ جۇمىسى جۇرگىزىلەدى. قالا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا جولدارعا, جاياۋ جۇرگىنشىلەر جولى مەن كوشەلەرگە تەحنيكالىق تۇز سەبىلىپ جاتىر. بۇل جۇمىس تا تاۋلىك بويى اتقارىلادى», دەلىنگەن قالا اكىمدىگى تاراتقان حابارلامادا.
سونىمەن قاتار, اۋلا اۋماقتارىنىڭ تازالىعىن قامتاماسىز ەتۋ پاتەر يەلەرى كووپەراتيۆى مەن م ۇلىك يەلەرى بىرلەستىگىنىڭ مىندەتى. اتالعان ۇيىمدار تۇرعىنداردىڭ قاۋىپسىزدىگى مەن قولايلىلىعى ءۇشىن اۋلالاردى قار مەن مۇزدان ۋاقىتىلى تازالاۋى ءتيىس.
بۇعان دەيىن قالا اكىمدىگى استانا تۇرعىندارىنان اۋلالارىن جاڭارتۋعا وتىنىم قابىلداۋ باستالعانىن حابارلاعان.
ەسكە سالايىق, الداعى دەمالىس كۇندەرى استانادا اۋىل شارۋاشىلىعى جارمەڭكەسى وتەدى.