امەريكالىق جۋرناليست دجەننيفەر ميۋللەر ماڭعىستاۋعا جاساعان ساپارىنان كەيىن, «Washington Post» گازەتىنە كولەمدى ماقالا جاريالادى. ءتىلشى اتالعان ءوڭىردىڭ تابيعي ەرەكشەلىكتەرى مەن تاريحي بايانىن تاقىرىپ ەتتى. اۆتور ماڭعىستاۋدىڭ جاقپار-جاقپار جارتاستارىن اقش-تاعى مونۋمەنت-ۆەللي ۇلتتىق پاركىمەن سالىستىرىپ, جوعارى باعا بەرگەن, دەپ جازادى Egemen.kz.
ء«بىز ارالاعان اڭعار ەجەلگى زاماندا تەتيس مۇحيتىنىڭ تابانى بولعان. كەيىن جەر قىرتىسى قوزعالىپ, پانگەيا ءبولىنىپ, سۋ كەيىن شەگىندى. ءسويتىپ مىڭداعان جىلدار بويى تابيعات الىپ تاس مۇسىندەردى قالىپتاستىردى. جازىقتىڭ ورتاسىنان قىلىشتاي وتكىر جارتاس شوقىلار, ۇستىرتتەر مەن يىلگەن كۇمبەزگە ۇقساس بيىكتەر بوي كوتەرەدى. بۇل ايماق سونشالىقتى ۇزاق ۋاقىت بويى قۇرعاق ءارى يەن قالعاندىقتان, ميلليونداعان جىلدىق تاريحتىڭ ءىزى ءالى كۇنگە دەيىن انىق كورىنەدى», دەپ جازادى ساياحاتشى-جۋرناليست.
ءتىلشىنىڭ تىلىنە تيەك بولىپ وتىرعان تەتيس سۋى – مەزوزوي داۋىرىندەگى الىپ مۇحيت-تۇعىن. ول قازىرگى ەۋرازيا مەن افريكا-ارابيا ارالىعىن الىپ جاتقان. جەر قىرتىسىنىڭ قوزعالىسىنا بايلانىستى ازايىپ, ءبىر جولا تارتىلىپ كەتكەن. قازىرگى ماڭعىستاۋ ءدال وسى تەتيس مۇحيتىنىڭ استىندا جاتقان. عالىمدار ونى تەڭىز جانۋارلارىنىڭ قالدىقتارى ارقىلى دالەلدەگەن.
بۇل نارسە امەريكادان كەلگەن ءجۋرناليستتىڭ دە نازارىن اۋدارعان. بۇعان قوسا دجەننيفەر ميۋللەر ماڭعىستاۋداعى كەرۋەن-سارايلاردىڭ قيراندىلارىن, سوپىلىق عيباداتحانالارى مەن جەراستى مەشىتتەرىن اسقان تاڭدانىسپەن باسىلىمعا جاريالاعان.
«عالىمدار ولاردىڭ قالاي پايدا بولعانى جونىندە ءالى كۇنگە دەيىن ورتاق پىكىرگە كەلگەن جوق. ال ماعان بۇل القاپ ءبىر كەزدەرى قۇدايلاردىڭ ويىن الاڭى بولعان دەگەن نۇسقا كوبىرەك ۇنايدى», دەپ جازادى جۋرناليست.
اۆتوردىڭ ايتۋىنشا, ۇزاق ۋاقىت بويى بۇل ءوڭىر حالىقارالىق تۋريستەردىڭ نازارىنان تىس قالىپ كەلگەن, الايدا بۇگىندە وعان دەگەن قىزىعۋشىلىق ارتىپ وتىر. ساپار بارىسىندا جۋرناليست رەسەي, قىتاي جانە يتاليادان كەلگەن تۋريستەردى جولىقتىرعانىن ايتادى. ال امەريكالىق ساياحاتشىلار بۇل باعىتتى ەندى عانا تاني باستاعان. جۋرناليست جولسەرىگى انتون ديكيننەن بىلگەنىنشە, ول ون جىلدان استام ۋاقىت بويى وڭىردە تۋر ۇيىمداستىرىپ جۇرسە دە, اقش-تان كەلگەن قوناقتى ءالى كەزدەستىرمەگەن.
دجەننيفەر ميۋللەر ءبىر ءتۇندى «كيىز ءۇي موتەلىندە» وتكىزگەندەرىن ايتادى. الايدا كەيىن توپ مۇشەلەرىنىڭ ءبارى ءبىر اۋىزدان دالادا, تابيعات اياسىندا ويانعاندى قالار ەدىك دەگەن ويعا كەلگەن. بۇل ماڭعىستاۋعا كەلەتىن ساياحاتشىلاردىڭ وڭىرگە ەڭ الدىمەن بىرەگەي تابيعاتپەن جانە ادام قولى تيمەگەن كەڭىستىكتەرمەن قاۋىشۋ ءۇشىن ات باسىن بۇراتىنىن كورسەتەدى.
ايتا كەتەيىك, «Washington Post» 1877 جىلى ۆاشينگتون قالاسىندا قۇرىلعان. العاشىندا ايماقتىق باسىلىم بولعانىمەن, ۋاقىت وتە كەلە The Washington Post ۇلتتىق ءارى حالىقارالىق دەڭگەيدەگى, قوعامدىق پىكىر مەن ساياسي كۇن تارتىبىنە ەلەۋلى ىقپال ەتەتىن باسىلىمعا اينالدى. 2025 جىلعى جاعداي بويىنشا The Washington Post باسىلىمىنىڭ شامامەن 2,5 ميلليون تسيفرلىق جازىلۋشىسى بار. بۇل سايتتىڭ اقىلى اۋديتورياسى مەن تسيفرلىق جاڭالىقتارعا جازىلعان وقىرماندار سانىن كورسەتەدى. ال باسپا نۇسقاسىنىڭ تارالىمى – كۇندەلىكتى شامامەن 97 مىڭ دانا.
بۇدان ەكى اپتا بۇرىن اقش-تىڭ جەتەكشى ديۋك ۋنيۆەرسيتەتىنىڭ گازەتىندە قازاق فولكلورى تۋرالى ماقالا جارىق كورگەن ەدى.