مەملەكەت باسشىسى قاسىم-جومارت توقاەۆتىڭ «Turkistan» گازەتىنە بەرگەن اۋقىمدى سۇحباتى قوعامدا ۇلكەن سەرپىلىس تۋعىزدى. پرەزيدەنتتىڭ بيىل ءدال وسى باسىلىمدى تاڭداۋى ءبىز ءۇشىن, ياعني كيەلى شاھارداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ۇجىمى ءۇشىن ايرىقشا مانگە يە. تۇركىستان مەن ياساۋي ەسىمى – بۇكىل تۇركى الەمىنىڭ رۋحاني تەمىرقازىعى. سوندىقتان بۇل قادامدى پرەزيدەنتتىڭ تۇركى ينتەگراتسياسىنا, ورتاق تاريح پەن بولاشاققا دەگەن ەرەكشە قۇرمەتى دەپ تۇسىنەمىز.
سۇحباتتى مۇقيات زەردەلەي وتىرىپ, وندا قىسقا مەرزىمدى ناۋقانداردىڭ ەمەس, ۇزاق جىلدار بويى جۇرگىزىلگەن جۇيەلى رەفورمالار مەن تەرەڭ اناليتيكالىق تالداۋ ناتيجەسىنىڭ جاتقانى اڭعارىلادى. مەملەكەت باسشىسى ۇسىنعان «ادىلەتتى قازاقستان» كونتسەپتسياسى – جاي عانا ۇران ەمەس, قوعامنىڭ ءاربىر سالاسىن قامتيتىن اۋقىمدى ترانسفورماتسيا. الايدا مۇنداي تەرەڭ وزگەرىستەردى جۇزەگە اسىرۋ ءۇشىن تەك ساياسي ەرىك جەتكىلىكسىز, ترانسفورماتسيالىق كوشباسشىلىق قاجەت.
ترانسفورماتسيا دەگەنىمىز – ۇيرەنشىكتى ەسكى جولدان باس تارتىپ, بۇرىن ەشكىم ءجۇرىپ وتپەگەن جاڭا سوقپاققا ءتۇسۋ. بۇل – ماسەلەنى جاسىرماي, شىنايى احۋالدى اشىق ايتۋ جانە ەل بولاشاعى ءۇشىن تاباندىلىق تانىتۋ. مەملەكەت باسشىسىنىڭ سۇحباتىنان ءبىز ءدال وسىنداي جاۋاپكەرشىلىكتى سەزىندىك.
مەن وبلىستىق ءماسليحات دەپۋتاتى رەتىندە وڭىرلەردى ارالاعاندا حالىقتىڭ مۇڭ-مۇقتاجىن ءجيى تىڭدايمىن. تاۋەلسىزدىكتىڭ وتىز جىلىندا قوردالانعان ينفراقۇرىلىمدىق ماسەلەلەردىڭ بۇگىندە كەزەڭ-كەزەڭىمەن شەشىلىپ جاتقانىنا كۋامىن. پرەزيدەنت ىقپالدى توپتاردىڭ ارزان ۇراندارمەن جەڭىل جەتىستىككە جەتۋ ارەكەتتەرىن سىنعا الدى. شىن مانىندە, ناقتى جۇمىس ۇزاقمەرزىمدى قاجىرلى ەڭبەكتى تالاپ ەتەدى.
مۇنداي جاعدايدى ءبىز ءوز ۋنيۆەرسيتەتىمىزدىڭ مىسالىندا دا كوردىك. قىزمەتكە كەلگەن كەزىمىزدە وقۋ ورنىنىڭ ماتەريالدىق بازاسى مەن ينفراقۇرىلىمى ابدەن توزعان ەدى. كەيىنگى بەس جىلدا جۇرگىزىلگەن جۇيەلى جۇمىستىڭ ناتيجەسىندە 15 عيماراتتىڭ شاتىرى جاڭارتىلىپ, قازاندىقتار اۋىستىرىلدى, بوتانيكالىق باققا تاس جول توسەلىپ, قالاشىق اۋماعىنداعى اسفالت جاڭارتىلدى. بۇل وزگەرىستەر ەلدەگى جاڭا ساياسي ۇستانىمنىڭ, مەملەكەتتىك مەكەمەلەر تاراپىنان كورسەتىلگەن شىنايى قولداۋدىڭ ارقاسىندا جۇزەگە استى. حالىقپەن كەزدەسۋلەردە ء«بارىبىر ورىندالمايدى» دەگەن كۇمانمەن قاراعان ازاماتتاردىڭ بۇگىندە ناقتى ناتيجەنى كورىپ, سەنىمى ويانعانىن كورۋ – ءبىز ءۇشىن ۇلكەن مارتەبە.
پرەزيدەنت 2026 جىلدى «تسيفرلاندىرۋ جانە جاساندى ينتەللەكت جىلى» دەپ جاريالاۋى تەگىن ەمەس. بۇل – زاماناۋي تەحنولوگيالار ارقىلى ەكونوميكالىق ترانسفورماتسيانى جەدەلدەتۋدىڭ توتە جولى. ياساۋي ۋنيۆەرسيتەتى دە بۇل باعىتتا قالىس قالماي, جاساندى ينتەللەكت سالاسىندا ىرگەلى جوبالاردى باستاپ كەتتى. وڭىردەگى مەكەمەلەرمەن جاسالعان مەموراندۋمدار عىلىمي زەرتتەۋلەردىڭ پراكتيكالىق قولدانىسقا يە بولۋىنا مۇمكىندىك بەرىپ جاتىر.
قورىتا ايتقاندا, بۇل سۇحبات بىزگە تەك اقپارات بەرىپ قويماي, ۇلكەن سەنىم مەن جىگەر سىيلادى. ادىلەتتى جۇيە قۇرۋ جولىنداعى رەفورمالار سابىر مەن قوعامدىق قولداۋدى قاجەت ەتەدى. ەگەر بۇل جول جەڭىل بولسا, ونى الدەكىمدەر الدەقاشان ءجۇرىپ وتەر ەدى. قازىرگى مىندەت – كۇندەلىكتى اقپاراتتىق شۋعا ەرمەي, ەلدىڭ ستراتەگيالىق ماقساتتارىنا جۇمىلۋ. وتكەننىڭ قاتەلىگىنەن ساباق الا وتىرىپ, بولاشاققا نىق قادام باسۋ – ادىلەتتى قازاقستاننىڭ باستى باعدارى بولماق.
جانار تەمىربەكوۆا,
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى