سپورتتىق مانسابىن اياقتاعان بەكزات نۇرداۋلەتوۆ باسشىلىق قىزمەتكە تاعايىندالدى

بۇل جونىندە ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسى ءمالىم ەتتى.

بەكزات جالعاسباي ۇلى 1998 جىلعى 10 ساۋىردە دۇنيەگە كەلگەن. تانىمال بىلعارى قولعاپ شەبەرى 2019 جىلى الەم جانە 2024 جىلى ازيا چەمپيونى اتاندى. 2021 جىلى وليمپيادا ويىندارىنا قاتىسسا, 2025 جىلى الەم كۋبوگىنىڭ يەگەرى بولدى.

باسقارمانىڭ حابارالۋىنشا, بەكزات جالعاسباي ۇلى نۇرداۋلەتوۆ ماڭعىستاۋ وبلىسى بوكس بويىنشا وليمپيادالىق رەزەرۆتىڭ مامانداندىرىلعان بالالار مەن جاسوسپىرىمدەر مەكتەبىنىڭ باسشىسى قىزمەتىنە تاعايىندالدى.

بەكزات نۇرداۋلەتوۆ 2015-2019 جىلدارى الماتى قالاسىنداعى قازاق سپورت جانە تۋريزم اكادەمياسىندا «دەنە شىنىقتىرۋ جانە سپورت» ماماندىعى بويىنشا ءبىلىم الىپ, جوعارى وقۋ ورنىن ءتامامدادى. 2021 جىلدىڭ قىركۇيەك ايىنان باستاپ كاسپي تەحنولوگيالار جانە ينجينيرينگ ۋنيۆەرسيتەتىندە (Yessenov University) «قۇقىقتانۋ» ماماندىعى بويىنشا باكالاۆر دارەجەسىن الدى.

ەڭبەك جولىن «ماڭعىستاۋ بوكس كلۋبى» جشس-نە بوكستان نۇسقاۋشى-سپورتشى رەتىندە باستاعان ەدى.